Dom urang y, bac si lac dom anh hùng gandi gandang angaok mblang mesruh oh hu sap phao

Di labik brei daok karei Pasak Pato megru quốc phòng an ninh Sang bac Đại học Tây Nguyên, sa kapal kakuh bahrau hu padang tagok piah ka sa-ai Trần Thị Hương (ndih tapui thun 1983) lac urang điều dưỡng di Sang iek ruak Y học cổ truyền Đắk Lắk daok ngak bruk pak ini kakuh ame di drei lahik di harei 1/9. Aia meta haok bak mbaok tuk sa-ai tok kakuh ame di drei meng atah; bruk ngak ndam di sang pak Nam Định tok hu mboh tapa zalo angaok mbaok phon. Sa-ai Hương caong lac, jit COVID -19 samar hu jhul kadhul likuk piah ka sa-ai meda mai veik puk palei cuh gilau ka ame:“Hè meng blaoh drei jeng kuhria ba anek kamuan nao palei piah ma-in haong ong amuk  kayua ong amuk prong thun paje, min kayua jit ruak oh nao sang hu, urak ini ong palang lahik blaoh nan ye oh taom gaok hu tra. Caong lac yaok manuac urang ba tangin tame piah jhul kadhul likuk jit ruak piah ka drei hu nao palei cuh gilau ka ame.”

15 thun ngak bruk di Khoa Dut iek- Duah thau tapa rup thaot – Duah thau chức năng di Pasak Pasang iek ruak kik tỉnh Đắk Lắk, sa-ai Nguyễn Thị Kim Tuyền hu taom gaok haong rilo janih jit ruak angaok manuac urang. Min tal tuk lac urang dalam kapul duah thau ka 3, lac manuac urang ba akaok nao dahlau dalam bruk mesruh pacang Covid-19 sa-ai meng thau hu dom glaih glar, kan kandah, mbuan ba tal metai lahik tuk nao ngak bruk.

Sa-ai Tuyền brei thau, labaih 3 bilan tapa, tuk jit COVID -19 di Đắk Lắk rah tabiak khang, oh kuhria harei melam, tuk pak halei hu urang ruak ye kapul di sa-ai ba gauk tagok jalan piah duah labik pambak ruak. Yaom lac ngak bruk luac harei melam dalam khan ao pacang khik abih rup, min thau lac bruk mek mẫu dut iek hu makna biak prong dalam bruk pacang caga jit, nan ye dom sa-ai kham merat abih drei piah ngak hu bruk dalam samar drah di abih. Rai diuk di drei, bruk ngak hadiuk, ngak amaik njauk caik veik gah likuk bruk ngak: “Bruk ngak hu tuk lac page, hu tuk ngak tal kreh melam. Tuk halei ngak blaoh abih bruk meng hu mbang huak, gaok tuk tal mon 1, mon 2 kreh melam meng mbang, min mbang hasit brei hu dalam tian min. Page hadei jeng oh hu tukvak piah ngak mbang, nan ye mbang ổ bánh mì atau menyum kalaok aia la-an. Urak ini hu Zalo, drei iew, drei mboh mbaok anek bhik di drei min, oh ngak hagait karei hu. Caong khin khik caga ka anek saong psang ye drei njauk ngak yau nan, daok kayua bruk ngak tra.”

Meng harei 15/8, tuk Khoa Njaom mbak di Sang iek ruak Đa khoa Bhum Tây Nguyên hu salih jeng labik taong ruak ka urang ruak COVID-19 trak di bhum Tây Nguyên, 21 urang lac urang y tế, bác sĩ, điều dưỡng, hộ lý saong kỹ thuật viên njauk ngak bruk rilo jang dom mbang piah daong ka dom urang ruak plaih di metai.

Bác sĩ chuyên khoa II Trịnh Hồng Nhựt, akaok Khoa pasiam veik pren yava samar drah pacang caga jru mek, iek labik taong ruak urang ruak COVID -19 trak di Sang iek ruak Đa khoa Bhum Tây Nguyên brei thau, dom urang ruak ba mai ini thei jeng hu ruak dalam rup saong biak mbuan ba tal metai lahik. Bruk metai lahik yau mboh di anak meta, dom gru jru di labik taong ruak ka urang ruak COVID -19 trak tuk halei jeng khang hatai meblah mek ja-yak dalam bruk mesruh ini: “Khaol dahlak duah abih jalan ngak, gam lac thar vak, gam lac ilamu bruk ngak, hatung hatai di gru jru piah meblah veik suan yava, bruk diukrai di urang ruak anak bruk metai lahik.”

Bruk mesruh pacang jit covid-19 daok suai lavik saong rilo kan kandah, dom menuac urang di labik mesruh pacang jit di Đắk Lắk jeng daok paglaong hatai khang, harei melam nao duah labik pambak ruak, pasang iek, khik caga suan yava di urang ruak saong bhap bani. Dom urang nan lac dom anh hùng gandi gandang angaok mblang mesruh oh hu sap phao./.

Urang lang: Jasi – 10/09