Bui sambai meyaih khan ka mblang taneh angaok mbuan ceik pala phun keo lai tamuh hijao mekre, ong Sùng Minh Phương, daok di palei Ea Bar, xã Cư Pui, huyện Krông Bông brei thau: hu siam mekre yau ini binah prong mai meng bruk salih janih phun pala. Dahlau diah, angaok 3 hec ta taneh thu lagu, sang ong pala tangei, bei plom, ratak…, năng suất biar, yaom kaom tuk trun tuk tagok nan ye kan kathaot nyu ndam gam miat. Bilan 5/2019, meng bruk daong di danak dak patrun kathaot khang kajap, ong khang hatai salih tapa pala phun keo. Tuk vak pablei hu jien duai atah 4-5 thun, min phun jien buh tame biar, takik pren mong iek, meda pala pablak haong dom janih phun karei nan ye ong meng khang hatai salih tapa. Ong Sùng Minh Phương ndom lac: “Meng harei hu karja daong salih tapa pala phun keo lai, dahlak mboh hu rilo kein laba, oh abih rilo pren yava, yaom blei jeng glaong. Jaik 2 thun tra, glai di sang dahlak kaoh pablei hu, dahlak jeng patui veik pala phun keo saong caong khin peih prong jang mblang taneh”.

Jeng hu mbang tui meng dom bruk daong di Danak dak patrun kathaot khang kajap bhum Tây Nguyên, meng bilan 8/2018, amuk Hà Thị Hồng, daok di palei Ea Bar hu salih 6 sào cà phê taha kurang baoh tapa pala meniah oh hu daruai. Menaih di Cư Pui jeng yau di Krông Bông baoh biak prong, mbang mboh racam saong yamen, nan ye hu rilo urang takre blei mbang. Urak ini yaom pablei meng 15.000 – 18.000 đồng sa baoh, bein menaih ba jien tame meng 50 - 70 triệu đồng sa vụ. Langiu di nan, meng yaom 1.000 đồng/sa phun menaih pajaih, sang sa-ai daok hu jien mek tame jaik pluh triệu đồng. Amuk Hà Thị Hồng khan lac: “Sang dahlak hu daong meng danak dak 6 sào, hadei di nan sang dahlak buh jien tabiak blei 1 hécta taneh piah pala, thun bloh hu baoh pablei. Tui kuhria thun ini,  sang dahlak meda peih prong jang jaik 8 sào tra”.   

  Ong Nguyễn Văn Tâm, Bí thư Đảng ủy xã Cư Pui, huyện Krông Bông brei thau: Cư Pui lac xã biak kan kandah di Đăk Lăk, hu 90% bhap bani lac urang bangsa takik. Meng hu danak dak patrun kathaot khang kajap bhum Tây Nguyên, 3 thun tapa, 200 hec-ta taneh mbuan ceik thu lagu hu mikva khang hatai salih janih phun pala: yau pala keo lai, bạch đàn, menaih lai… ba jien tame glaong. Meng kein laba di bruk mbuan ceik – glai pambuak gauk, rilo sang di Cư Pui hu tut angan pala glai piah cak rok patagok kinh tế. Meng hu taneh ria prong nan ye bruk ngak kinh tế meng glai, abih di nyu lac pala glai piah ngak pandap jeng lac sa dalam dom jalan piah cak rok patagok di puk palei dalam tukvak anak tal. Ong Nguyễn Văn Tâm brei thau, dalam thun  2021 ini, xã Cư Pui kham merat pala hu 300 hec-ta glai piah ngak pandap: “Tapa dom bruk di danak dak jeng yau dom sarak daong baoh sang kathaot di karja, puk palei daok jhul pakhang bruk pala glai. Kayua kein laba di pala glai piah me-om hijao mbuan taneh kalu, patrun bruk glut jaleih di labik glaong saong dom mblang taneh ini oh laghaih piah pala njam patam nan ye pala glai meda daong ka mikva hu jien mek tame hadei di jaik 5 thun. Khaol dahlak palaghaih tui jalan ngak tapa danak dak patrun kathaot khang kajap daong brei pajaih, daong ka mikva mesre phun jien meng gilang pariak sarak karja piah pala glai”. 

Meng kein laba di bruk ngak mbang kinh tế meng mbuan ceik – glai di Cư Pui hu daong ka mikva salih bruk bhian randah dalam ngak mbang, oh daok hatai saneng cang bruk daong di karja, thau pambak tame dom pren khang di puk palei piah duah jalan ngak mbang cak rok patagok kinh tế ka nyu laghaih. Ini jeng lac jalan ngak di rilo puk palei dalam tỉnh Đắk Lắk piah cak rok patagok kein laba danak dak bruk ngak pakat negar patrun kkathaot khang kajap./.

Urang lang: M.Phương - 12/3/2021