Tukvak tapa, gam saong bruk ngak brei patagok pandap OCOP, padang bruk khik iek, taong yaom, padang angan je pandap hu tỉnh Sóc Trăng iek praong. Dua thun tapa, dom doanh nghiep, po ngak pandap OCOP pakhang bruk pathau khan, yaih khan pandap panda. Langiu di nan, gah chức năng tỉnh Sóc Trăng daok daong doanh nghiep padang ngak saong patagok angan je tapa nyaom darak, parang iek, pambuak bruk pablei saong blei pandap OCOP. Gam haong nan, hu mbaoh tangin tame 25 harak pambuak bruk blei pandap panda, 75 harak pahadar pambuak bruk pabei salih di dom doanh nghiep saong dom siêu thị, dom cửa hàng pablei rai, labik praong pablei pandap yau Co.opMart, Lotte, Tứ Sơn. Ong Võ Văn Chiêu,Yam ndoc Sở Công thương Sóc Trăng brei thau: “Palih ruah labik padang pasak OCOP saong kaya đặc sản di tỉnh, piah yaih khan, pambuak bruk pablei salih pandap panda kaya nong di tỉnh Sóc Trăng saong dom tỉnh, ban dalam negar. Padang blah web pablei salih, jhul pasamar bruk cak rok patagok pabei salih online, ba pandap đặc sản di tỉnh Sóc Trăng abih di nyu lac pandap OCOP tame dom labik pablei di dom tỉnh, ban dalam negar, bloh patui di nan nao tame darak dunya”.

Dalam tuk padang ngak pandap OCOP, tỉnh Vĩnh Long pataom tame  4 nyaom pandap lac kaya mbang menyum, pandap alin, pandap ngak mekre sang danaok saong dich vụ dulich palei pala. Tal urak ini, tỉnh hu 34 pandap hu tanut meng  3 tal 4 patuk di 24 po lac doanh nghiep, HTX saong baoh sang pablei salih. Dalam nan, hu 8 pandap 4 patuk saong 26 pandap 3 patuk.

Yau nan min, dalam tuk peih ngak, rilo labik ngak pandap gaok kan kandah kayua kurang phun jien piah peih praong bruk ngak mbang, pandar công nghệ birau, salih mẫu mã pandap, jhul pasamar bruk pablei salih saong ngak tabiak ralo pabak sumu bruk blei pandar di tuai damuai. Yaom lac dom pandap OCOP pablei samar min oh hu khang kajap tuk daok rilo pandap kan duah labik pablei. Muk Đoàn Thanh Xuân, Phaok akok pasak dịch vụ kỹ thuật ngak nong, Sở Ngak nong saong Patagok palei pala tỉnh Vĩnh Long ndom lac: “Peih dom danak dak jhul pasamar bruk pablei salih, patagok bruk pathau khan ka dom pandap palei ngak di palei pala saong brei paglaong ilamu ka dom kapol nyaom, menuac urang hu pandap tame danak dak. Praong di abih dalam lac bhian taong yaom, dak angan dom pandap OCOP piah ngak brei patagok dom pandap nan hu siam jang dalam tukvak anak tal”. 

Meng prein khang lac kaya ikan dalam ia, baoh kayau saong padai brah, dom tỉnh di bhum taneran karaong Cuu Long hu peih ngak, patagok, pamedeih prein khang kaya pandap di bhum palei tame yaok pandap OCOP saong pamedeih tagok jalan sahaneng padang bruk ngak mbang birau di bhap bini. Hu blaoh labaih 500 pandap OCOP di bhum taneran kraong Cuu Long hu pok angan, rilo pandap hu darak pasar dalam saong langiu negar takre blei. Oh lac yaih khan di dom blah web pablei salih, dom tỉnh ban hu peih nyaom darak pasar, mbaoh tangin tame harak pahadar pambuak bruk ba pandap tame sieu thị, pasak pablei salih piah urang blei thau saong blei pandar dom pandap OCOP.

Min anak meta jeng mboh lac, dom pandap OCOP urak ini daok oh ka mekre rilo, oh ka caik hatai rilo tal thaik thaok, ao papaok pandap atau mbaok meta angan je, dom kadha nan ba tal pandap oh ka hu labik dang lagaih siam di nyu. Langiu di nan, bruk hu mesre phun jien piah ba tame pandar ilamu saong công nghệ ngak tabiak pandap tui tanut chuan, asar oh ka siam rilo, ini lac dom kan kandah piah pandap OCOP papar atah.

Ong Phạm Thiện Nghĩa, Akok Ủy ban bhap bini tỉnh Đồng Tháp brei thau, Đồng Tháp hu 161 pandap OCOP hu angan, piah pandap hu par atah, par glaong, karja palei brei padang Pasak yaih khan đặc sản saong yaih khan dulich Đồng Tháp di Hà Nội saong Ban raya HCM, tuk camereip hu urang blei caik hatai jia, takre blei. Langiu di nan, dalam jalan cak rok patagok pandap OCOP palei brei cak rok patagok dom pandap lagaih ralo piah patagok angan je, jien mek tame. Ong Phạm Thiện Nghĩa daok brei thau lac:“Anak tal, Đồng Tháp brei pachreih ngak khang jang, pathau khan khang jang, jak ba khang jang, ba tabiak bruk padang mbang ngui, bruk abaih bhap bini  peih ngak dom pandap ini meda hu khang jang dalam tukvak anak tal. Sa bruk bui sambai di Đồng Tháp langiu bruk patagok pandap OCOP ye Đồng Tháp brei pakhang bruk duah thau dom tanut chuan, tieu chi tanut chuan dalam negar saong negar langiu, gam haong nan Đồng Tháp kak kajap haong bruk patagok gah pablei salih”.

Tui ong Lê Minh Hoan, Thứ trưởng Mentri Ngak nong saong Patagok palei pala, dom tỉnh di bhum taneran kraong Cuu Long njauk sahaneng tal bruk padang Pasak pablei salih pandap OCOP saong pandap đặc sản di dom palei caik di dom tỉnh karei, abih di nyu lac di Ha Noi. Tukvak tapa, Đồng Tháp hu padang Pasak kaya nong đặc sản di Hà Nội, ini jeng lac tỉnh akok meti di bhum ba akaok nao dahlau dalam bruk ba pandap đặc sản di palei tabiak Ha Noi.

Thứ trưởng Lê Minh Hoan brei thau, tuk padang Pasak pablei salih pandap OCOP saong đặc sản, ye dom palei njauk brei peih ngak dom bruk ilamu ndung bak ilamu di tỉnh drei piah brei mboh thaik thaok karei di drei. Ini lac jalan ngak piah dom tỉnh yaih khan saong pablei hu samar dom pandap kayua kapol urang ngak tabiak.

“Padang hu rup binguk tabiak di Hà Nội gam haong thaik thaok, pandap di bhum taneran kraong Cuu Long, pandap di yaok palei. Dahlak sahaneng tuk nan khol drei peih tabiak hu darak pasar dalam negar 100 trieu bhap bini”.

Bruk peih dom Pasak Yaih khan saong pablei pandap OCOP brei mboh hatai caong khin ba pandap tal tangin urang blei pandar hu dom tỉnh biak caik hatai sangka, patagok bruk ngak tabiak pambuak saong rami ramik veik gah nong nghiep, salih jalan ngak kinh tế palei pala, paglaong jien mek tame ka bhap bini, peih praong bruk pambuak gauk ngak tabiak rilo pandap hu yaom pagam saong bruk padang angan je saong pablei pandap./.

Urang lang: Aí Nghiêm - 30/3/2021