Urang lin khik iek jalan tapen negar pak di huyen An Phu, tinh An Giang 

Meyah dut song  bruk pasang iek jalan tapen negar bak ia yau tasik di bilan ia ndik ye  bruk pasang iek jalan prong, jalan sit, urak ni di bhum tapen negar An Giang hu dom kan kandah karei karei. Dom labik di jalan tapen negar Việt Nam-Campuchia tok lac sa dhar krong, ribaong sit, atau jalan sit, jalan prong tame bein boh kayau di bhap bini. Piah pacang cakak urang tame tabiak suan hukum, dom kapul nyaom labik pacang caga jit  Covid-19 brei khik iek catang, meng labik kapul ini daok tal kapul daih jeng maong mboh gauk. Min, pambak tame tuk gah chức năng joa menuac, rilo urang loa nao mai tapa jalan tapen negar, song hu bruk dong pren di dom urang haqua jien karei karei. Meng akaok thun  2020 mbiah tal urak ni, urang lin BP An Giang hu mboh song chap khik  288 mbang song  683 urang tame tabiak suan hukum, tapa nan brei mboh  bruk “pandiak” di jalan tapen negar atah jiak  100km di An Giang.

Đại tá Nguyễn Thượng Lễ, Chỉ huy trưởng BĐBP An Giang, brei thau, meng di tuk taduan hu panuac khan ka urang ruak  1440, BĐBP  An Giang samar ngak dom bruk duh ka bruk pacang cakak,  pasang iek, duah thau, pacang caga bruk njom mbak di jit ruak. Saong tacei pato dom jabat  nghiệp vụ di BĐBP tỉnh, gam song dom đồn BP abih drei pambuak bruk song  Công an dom huyện, ban sit  duah thau, pasang iek  dom urang mboh yau pambuak tal jalan ba menuac tame tabiak suan hukum, piah samar duah tabiak dom menuac gam tal bruk nan.

Langiu di nan, Bộ Chỉ huy BĐBP An Giang hu pabak menuac brei ka dom đồn Biên phòng, peih bruk pasang iek duah thau di jalan tapen negar, pambah mbang negar, dom mblang ghe, gilai, mblang radeih di labik tapen negar, samar pacang cakak, cap khik, langyah catang dom jalan, urang ba menuac tame tabiak suan hukum di labik drei khik iek. Pambuak bruk pathau khan, jak ba bhap bini tacei tabiak, khan brei thau dom urang hu pagam tal bruk ba menuac tame tabiak jalan tapen negar.

Đại tá Huỳnh Văn Đông, Chính ủy BĐBP Kiên Giang brei thau, meng akaok thun  2020 tal ni, jabat tuk halei jeng peih ngak siam dom bruk mesruh pacang khol kanyah jhak, pablei salih lậu di bhum tapen negar, bhum tasik, abih di nyu nan lac peih ngak catang bruk mesruh pacang bruk tame tabiak suan hukum, pambuak hong pacang caga jit Covid-19. Meng caga dahlau, kham merat yau nan ye urang lin biên phòng Kiên Giang hu chap mek, song langyah  34 mbang gam song  90 urang tame tabiak suan hukum  song yaok rituh mbang pablei salih lậu tapa jalan tapen negar. Langiu di 79 kapul, chốt song  5 kapul , cơ động pak di labik, jabat hu peih ngak  1 biên đội kapan 4 sruh piah patagok bruk tui iek bhum tasik, palao kaoh meng  Hà Tiên tal  Phú Quốc.

Đồng Tháp, di jalan tapen negar atah labaih  50km, BĐBP tỉnh hu padang rilo bilai piah khik iek, yaok bilai hu meng  5 tal  7 urang dalam nan hu BĐBP, Công an, dân quân tự vệ, tui iek luac harei melam piah pacang cakak bruk tame tabiak  tỉnh. Langiu di bruk khik iek, dom bilai dok hu pathau khan  dom jalan pacang caga jit Covid-19 ka bhap bini piah paglong hatai sahneng dalam bruk pacang caga jit ruak, meng nan hu panuac kakei urang cuk patiah pacang mbaok, rao tangin, pametai anek ruak tal bruk caik hatai sangka tal  menuac urang halei tame tabiak jalan tapen negar...

Urak ni, oh lac di Kiên Giang, An Giang song  Đồng Tháp bo BĐBP dom tỉnh bhum tapen negar Tây Nam dok kham merat pambuak bruk song gah chức năng, dom  huyện, ban sit tapen negar daok tagok glaong tong abih  dom jalan pacang caga jit. Gam haong nan, patagok bruk khik iek jalan mbak, khik kajap jalan tapen negar , peih bruk pacang cakak luac harei melam, abih di nyu nan lac di dom jalan sit, jalan prong, khik iek catang bruk tame tabiak jalan tapen negar, pacang cakak klaoh dom menuac urang tame tabiak negar suan hukum./.

Urang lang: Hanipha -3/3