Sang  ong Võ Văn Ly daok di palei Xóm Huế, xã Tân An Hội, huyện Củ Chi biak bui sambai kayua hu tabiak truh kan kathaot meng rilo thun ni mai,, dom urang anek nao ngak công nhân jeng hu jien bilan, jien thưởng. Ong Ly bui sambai di abih lac Kapul patrun kathaot di palei kayua ong ngak tổ trưởng dok hu 3 boh sang kathaot min, 25 boh sang jiak si kathaot song dok hu labaih 500 boh sang dalam palei dong, klah rabha. Thun 1992, sang ong lac sa dalam boh sang camereip hu danak dak patruh kathaot di huyện Củ Chi brei mesraiy 800 ribau đồng jien phun piah rong pabui. Meng drei pabui camereip nan, ong patak patom blei hu drei limo, bloh tagok tal tuk ginup jien padang sang, tabiak truh bruk iek lipa. Ngan song ong Ly, 800 ribau đồng phun jien camereip nan biak hu yaom glaong, min hu yaom glaong jang nan lac hatai anit di mik va puk paga. Ong oh hu hamu, dom sang ginup meda jang hu brei ka ong nyim meteh ha hamu piah ngak padai mek brah mbang song mek pong rong limo. Jalan bo ong hu dong di labaih 20 thun dahlau jeng lac jalan bo mik va dok ngak urak ni piah dong ka dom boh sang kan kathaot, jiak si kan kathaot. Yaok pluh ha hamu dok hu urang dong ka boh sang kan kandah nyim piah ngak padai, tani tanat bruk mbang huak. Ong  Võ Văn Ly khan lac:

Meng thun 1992 mbiah tal ni, hulin dok di palei ni. Hulin sahaneng lac, karja sangka tal drei lac siam ye, drei njauk kham merat. Nan ye, meng jien mesraiy 800 ribau đồng bo hulin ngak mbang bloh hu sang do, biak uan tabuan. Rilo boh sang di labik ni meng hu jien mesraiy ni bo ngak mbang hu.

Brei nyim taneh ngak mbang, daong pren payeng gauk, brei anek pajaih, phun pajaih … lac jalan bo bhap bini Củ Chi ngak piah klah rabha kan kandah song gauk. Jalan ngak ni lagaih song bruk di puk palei, kein laba ka dom boh sang kan. Hadei di thun 1992, bruk patruh eik patrun kathaot patabiak meng Cu Chi hu pambak praong dalam ban raya. Hadei di nan, oh daok baoh sang eik lipa tra, bruk nan hu jeng danak dak patrun kathaot , patagok sang meda, patrun kan kathaot khang kajap, patrun kathaot rilo gah. Yaom lac angan ieu yau halei, ye bruk nan jeng lac bruk sangka di dom pakat song bruk klah rabha di bhap bini brei ka dom boh sang dok kan kandah. Tui bruk di anak meta, yaok quận, huyện jeng hu dom jalan ngak gheih, siam lagaih, patagok hu pren khang di drei. Yau di quận 5, quận camereip di ban raya tabiak truh kathaot di thun 2015. Lac quận hu rilo urang Low, duik rai meng bruk pablei salih song abih hatai ka bruk ngak pahla, bruk XH, dom urang ngak bruk patruh kathaot di quận kham merat dong ka dom boh sang kan kandah duah hu bruk ngak siam lagaih, hu jien tame tani tanat. Ngan song dom boh sang daok sa drei, urang oh hu pren ngak bruk, quận jak ba dom hội quán di urang Low piah daong brei. 300 boh sang jiak si kan kathaot di quận, urak ni dok hu daong tui jalan yau nan. Amuk Trần Thị Anh Vũ, Phó Bí thư thường trực Quận ủy Quận 5 brei thau:

Meng kan mai hala siam pacang hala tahak, jang yau bruk ngak pahla di quận 5 hu meng rilo thun. Quận 5 jeng hu pren khang lac bhap bini, dom boh sang pablei salih, dom hội đoàn, hội quán biak sangka iek glang tal bruk XH. Nan ye, ngak habar piah ka bhap bini quận 5 oh dok boh sang jiak si kan, pataom tame dom bruk dong ba, palagaih ka dom boh sang kan, oh lac kuhria daong saoh. Meyah drei dong bo urang tabiak truh kathaot ye lac oh khang kajap.

Urak ni boh sang kan kathaot di ban raya hu jien mek tame kuhira tuii akaok menuac meng 16 triệu đồng sa urang sa thun trun song jiak si kathaot meng 16 triệu tal 21 triệu đồng sa urang sa thun. Kuhria tal puac thun 2015, ban raya dok jiak 17.400 boh sang kathaot samu 0,89% dom boh sang, song jiak 47 ribau boh sang jiak si kan , samu 2,39%  dom baoh sang. Oh padeih di labik nan, ban raya dok peih ngak danak dak patrun kathaot khang kajap, patrun kathaot rilo gah tuk vak 2016-2020.  Tapa danak dak ni, boh sang kan song jiak si kan hu sangka piah paglaong jien mek tame, saong hu mbang tui dom dịch vụ y tế, pato pakai, bruk ngak,  bảo hiểm xã hội…Amuk Triệu Lệ Khánh, Phó akaok Ủy ban Mặt trận negar Việt Nam ban  raya Hồ Chí Minh ndom lac:

Tui bruk di ban raya HCM  urak ini, dom tanut nan biak lagaih. Khol drei oh lac sangka  tal bruk thu nhập bo dom tanut, dom bruk karei jeng biak prong. Piah ngak habar dong ka boh sang kan, jiak si kan yam tapa kan kathaot khang kajap, oh lac bruk mbang huak bo daok hu iek glang gah y tế, pren yava, jalan diuk rai, pabak khau tin, patagok jang, pabak bruk di anak meta, abih di nyu nan lac di ban raya HCM.

Kayua rai duik di bhap bini dak harei dak glong,  nan ye, ban raya jeng dok hu boh sang kathaot tamuh tabiak njauk hu bruk dong.  Ong  Lê Thành Tâm, dahlau deih ngak  akaok Ủy ban bhap bini huyện Củ Chi, labik tamuh tabiak bruk patruh eik patrun kathaot di ban raya labaih 23 thun dahlau, lac

Urak ni dut song dom harei dahlau ye hu bruk glaong biar jang gauk biak prong. Rai duik mbang ngui di bhap bini yaom lac dok kan min oh kan yau dahlau deih. Kadha njauk biai nan lac, XH tuk halei jeng  patagok, bhap bini drei duah hu jien rilo jang min dut song dom negar dalam khu vực ye lac ka oh prong. Kayua yau nan ye, jalan ngak di ban raya urak ni lac dong palagaih ka bhap bini hu ginup meda jang nan lac biak njauk, biak siam. 

Jia lac, meng bruk sami samar, hadah krah, thau sahaneng, thau ngak, meng bhap bini tal karja ban raya meda peih ngak hu jak jeng danak dak patrun kathaot khang kajap. Hu yau nan, dom boh sang dok kathaot, dok kan kandah di ban raya hu iek glang, dong brei rilo janih, tani tanat rai duik song yam tagok ginup meda. Rai duik di dom boh sang di ban ni dak harei dak patrun nao bruk glaong biar gauk ka dom dịch vụ thiết yếu song bruk hưởng thụ./.