Tui kuhria mboh dahlau, thun 2015 gah du lịch tỉnh Bình Thuận gaok rilo kan kandah kayua tuai Nga mai pak ini daok takik nao. Ngak yau habar piah pachreih hu tuai damuai meng dom negar karei piah pabak tame labik tuai Nga daok takik nao, nan lac bruk daok hu gah du lịch di Bình Thuận kuhri kuhria veik dalam tukvak ini. Việt Quốc, urang vak di rayo sap ndom VN daok di ban raya Hồ Chí Minh hu kadha vak ndom tal bruk ini:

Dalam dom thun tapa, Bình Thuận lac labik hu rilo tuai damuai di dunya mai tal. Tuk tabung glaong, meng bilan 11 thun ini tal bilan 4 thun hadei, dom labik padeih padei cao cấp di Bình Thuận bak tuai, oh daok duk bilik saoh. Thun bloh, tuai damuai di dunya mai jeng hu tani tanat ngan saong 400.000 mbang urang. Min meng dahalau bilan 1/2015, bruk daok salih karei. Ong Phạm Anh Kha – Giám đốc labik padeih padei Seahorse (ban sit Phan Thiết) brei thau: Kuhria meng thun 2015 mbiah tal harei ini, tuai damuai jeng oh ka mboh hagait salih karei. Min meng puac bilan 1 ini, meda hu takik tuai jang dut saong dom thun dahlau.

 Tui Hiệp hội du lịch Bình Thuận, dalam thun 2015 gah du lịch tỉnh hu rilo cuang kandah. Meng livik mai, tuai Nga bhian hu rilo di abih dalam dom tuai damuai di dunya mai tal Bình Thuận. Min urak ini, kayua kinh tế Nga laik trun saong bruk laik yaom di jien Rúp duk saong jien Đô la Mỹ, urang Nga meng takik nao du lịch taneh ia lingiu. Kayua yau nan ye, tuai Nga mai tal Bình Thuận jeng biak takik. Ini lac bruk caik ka gah du lịch Bình Thuận kuhri kuhria piah hu jalan ngak drah samar. Ong Trần Việt Hà – Giám đốc khu nghỉ dưỡng Pô Sha Nư (ban sit Phan Thiết) lac: Urak ini piah pabak ka bruk tuai Nga dak harei dak takik nao, thun 2015 kol dahlak duah tuai Tây Âu saong Bắc Âu, tuai di dom taneh ia Châu Á jaik drei yau: Trung Quốc, Hàn Quốc, Nhật Bản saong dom taneh ia dalam khối Asean.

Jeng tui ong Trần Việt Hà, piah pachreih tuai damuai di dom taneh ia ini, oh hu jalan ngak halei karei nan lac paglaong bruk phục vụ piah meriak gauk dalam siam mekre. Kayua trun yaom dịch vụ oh ka lac bruk praong bo kadha praong di abih nan lac chất lượng dịch vụ. Tuk chất lượng dịch vụ hu patagok, ye tuai damuai meng mai veik padeih padei.

Lingiu di nan, bruk xúc tiến, yaih khan jeng lac bruk oh sit. Ong Nguyễn Văn Khoa - Chủ tịch Hiệp hội Du lịch tỉnh Bỉnh Thuận brei thau: dalam thun ini, dom doanh nghiệp dalam hiệp hội meda hu mbaok tame dom nyom darak du lịch pakat dunya hu peih tabiak di bhum Đông Âu, Tây Âu, Đông Nam Á saong Trung Quốc piah yaih khan rup binguk labik nao tal biak hấp dẫn di Mũi Né – Phan Thiết – Bình Thuận. jalan peih tabiak piah duah dom darak pasar bahrau meng dom nyom darak pakat dunya jeng oh lac sit. Ong Nguyễn Văn Khoa lac: Tapa dom nyom darak nan, kol dahlak taom gaok dom đơn vị lữ hành praong piah ginum biai haong urang, da-a urang tapa pasang iek, duah thau. Jeng tapa nan, ginum biai haong dom doanh nghiệp pak ini piah mbaoh tangin tame harak pambuak bruk ba tuai di taneh ia urang mai haong kol drei.

Anak meta, yaom lac daok gaok kan kandah, min meng bruk sami samar nao duah darak pasar, paglaong chất lượng dịch vụ, gah du lịch Bình Thuận caong lac, daok pachreih hu tuai damuai di dom taneh ia angaok dunya, pabak tame labik tuai Nga daok takik nao dalam thun ini./.