Meng jayah di Tây Nguyên, harei siam tuk lagaih di bruk mesruh di bilan Xuân thun 1975 hu mai tal. Tuk ini “kapul urang vak ba akaok” di Thông tấn xã Việt Nam hu padang tagok saong lac kapul nao dahlau tame gah Meraong di puac bilan  3-1975. Urang thaot Lâm Hồng Long haong kapul urang vak ba akaok nao dahlau hu taduan bruk “nao B”, tabiak meng labik ka 5 Lý Thường Kiệt, Hà Nội – lac jabat di Thông tấn xã Việt Nam, dom sa-ai tagok radaih “GAT 69” nao tapak tabiak mblang mesruh. Hadei di tuk nao tui dom urang lin  Binh đoàn Hương Giang tame bal sit Huế thaot bol lin drei dui hala dok jayak angaok tabung Phu Văn Lâu biar harei 25-3-1975, kapul urang vak di Lâm Hồng Long samar tagok jalan tui dom urang lin Binh đoàn Hương Giang tapa ceik Hải Vân nao tame bal Đà Nẵng, peih paha rilo tỉnh gah kreh negar blaoh gam haong bộ đội nao tame Phan Rang, Phan Thiết…

Harei 19-4-1975, harei peih paha bal sit Phan Thiết jeng lac harei urang thaot Lâm Hồng Long hu taom veik amaik anit ranam di drei, labik bo labaih 20 thun dahlau amuk palao sa-ai trun gilai tabiak Barak ngan haong panuac sanya dua thun hadei anek mai veik. Bruk taom veik amaik hadei di labaih 20 thun atah gauk di urang thaot Lâm Hồng Long meda  lac bruk ong oh var hu. Kayua oh thei karei jang ong, thau hu bruk bui sambai di harei taom mbaok, thau cambaih haniem phol di urang amaik hu taom veik urang anek anit ranam di drei mboh yau oh taom veik hu.

Harei 20-4-1975, urang thaot Lâm Hồng Long haong dom ayut dalam kapul urang vak ba akaok nao dahlau di Thông tấn xã Việt Nam tui takai Binh đoàn Hương Giang nao tame Bei Gon, hu mbaok di dinh Độc Lập jala pandiak harei 30-4-1975, thaot veik vaktu sajarah di harei jayah. Hadei di nan, ong Lâm Hồng Long haong dom urang vak di Thông tấn xã Việt Nam saong kapul urang jakar cách mạng cang raok 35 urang lin guk cang harei metai meng Côn Đảo mai veik baoh taneh, dalam dom urang lin guk cang harei metai nan, hu sa-ai Lê Văn Thức. Urang lin tình báo Lê Văn Thức njauk kaol khamang cap mek, kaoh duas tử hình saong ba nao kareik di sang guk Côn Đảo cang harei ba tabiak cuh. Tukvak urang amaik taom veik anek likei hu tuk sahneng lac nyu metai blaoh, mboh biak drut droi nan ye dua anek amaik kuan gauk haiy. Meng hatung hatian di urang nghệ sĩ, ong samar thaot veik blah thaot drut drui nan. Tukvak nan hu khik veik sa inem sajarah prong diuk miat tui thun bilan, diuk miat haong bangsa.

Blah thaot brei mboh veik sa kaha praong, sa vaktu sajarah hu sa oh hu dua di taneh aia meng dom anek manuac biak, bruk biak, bo tapa nan brei mboh ka rai diuk, saong patagok sa tal glaong bahrau, hu jeng kadha caik rai ka bruk pataom mbaok taong abih bangsa hadei di harei gah Meraong negar hu peih paha. Blah thaot hu thaot njauk vaktu mbaok meta dua anek amaik bak drut droi... Blah thaot ini urak ini daok hu parang iek di Miuyim  sajarah negar.

Thun 1991, Liên đoàn Thaot nghệ thuật Dunya FIAF hu pok brei ka ong Bằng danh dự ka blah thaot ini. Nan lac sa kadha ngak brei hadah mbaok hadah meta oh lac ka ta-eng ong Lâm Hồng Long bo daok lac ka bein nghệ thuật Thaot Việt. Ngan haong rilo rik daong ka gah nghệ thuật thaot Việt Nam, Nghệ sĩ Lâm Hồng Long hu Karja pok brei rilo huân, huy chương, abih di nyu lac thun 1996, ong hu pok brei giải thưởng Hồ Chí Minh ka văn học nghệ thuật mbang akaok mereip ka dua kadha “Wa Ho mek nhịp kadha daoh gul pataom” saong “Anek amaik harei taom mbaok”.

Thun 1997 Nghệ sĩ Lâm Hồng Long, urang anek di bhum taneh La Gi, Hàm Tân, Bình Thuận palang lahik tuk umo 72 thun.

Mesruh metak, kan kandah saong bak aia meta hu nao tapa blaoh. Taneh aia hu yasa, palei negar hu sron mbon, taong abih bangsa daok pambuak tangin prong yam nao gah anak. Harei ini, nao tal Miuyim sajarah negar, mong iek veik blah thaot “anek amaik harei taom mbaok”, yaok urang hu 1 hatai saneng karei di gauk, min jeng hu 1 hatai saneng ka baoh sang, ka bhum mi, taneh aia palei negar saong dak thau cambaih jang ka yaom glaong di sron mbon, di hòa bình, yaom laong di bruk bui sambai harei taom mbaok./.

Urang lang: Jasi -30/4/2021