Hadei di tuk thau lac Rajaei brei labaih 800.000 mbang vaccine ka TPHCM, Sở Y tế Ban raya jao bruk ka gah y tế, padang 1.032 kapol klauk jru, ieu pataom meng 547 labik sang iek ruak, bilik dut iek ruak gam gah langiu karja, pasak y tế, Pasak Pasang iek ruak kik Ban raya, dom labik klauk jru caga ruak di Công ty VNVC…Yaok sa labik klauk jru hu takik di nyu 5 urang nan lac: sa bác sĩ iek ruak dahlau, 2 urang klauk vaccine, sa bác sĩ saong sa điều dưỡng tui iek, langyah bruk rah tabiak hadei di klauk jru.

Ong Bùi Kim Khánh, Yam ndoc Dom pasak klauk jru caga ruak di VNVC brei thau ini lac gah hu rilo urang ngak bruk di abih dalam bruk klauk jru vaccine mbang ini, ngan saong 350 urang y te, dalam nan hu 100 bác sĩ, 200 điều dưỡng saong 50 urang daong bruk mai meng 10 pasak di ban raya:“Taong abih 350 y bác sĩ, điều dưỡng hu mbaok ngak bruk klauk jru hu chứng chỉ ngak bruk, chứng chỉ klauk jru salamat, hu klauk 2 mbang vaccine pacang Covid-19. Langiu di nan, daok hu pato pasram bruk klauk jru salamat saong bhian hu mbaok klauk jru vaccine Covid-19 mbang klauk camereip abih meng harei 8/3. Khol dahlak ba dom urang naih gheih abih piah duh ka bruk klauk jru samar drah di Ban raya HCM”.

Bhum 3 di Ban Thủ Đức, TP.HCM nan lac quận Thủ Đức dahlau diah, hu parabha jeng 14 kapol klauk jru, yaok sa kapol hu 1 bác sĩ saong 2 tal 3 điều dưỡng. Bác sĩ Vũ Kim Hòa, Pasak Y tế nam Thủ Đức brei thau, bhum 3 hu dom khu che xuat Linh Trung 1, Linh Trung 2, Khu công nghiệp Bình Chiểu hu biak rilo urang ngak, nan ye taduan hu bruk daong prein di dom sang iek ruak đa khoa  di Ban Thủ Đức saong di Sở Y tế.

Kayua bruk rilo yau nan ye bruk palih ruah, rami ramik dom labik njauk chuyen môn hu ngak cambaih laih, tani tanat, njauk jalan ba tabiak, ngak catang meng bruk iek ruak camereip, pasang iek prein yawa, tacei pato saong tui iek hadei di tuk klauk jru:“ Dalam 7 harei, 14 harei, meyah mboh dalam rup hu hagait oh lagaih hadei di tuk klauk jru ye tame mã QRS, khan brei gah khik iek klauk jru thau piah pataom veik taong abih dom hagait oh lagaih hadei di tuk klauk jru. Meyah mboh dalam rup hu hagait bhian mboh ye meda eiw phone piah hu tacei pato”.

Gah y tế  jeng hu dom Cty, doanh nghiệp daong bruk padang angan brei thau cambaih mã số urang hu klauk jru piah tui iek hadei di klauk jru. Gam haong nan, doanh nghiep brei ngak njauk tui Bộ tiêu chí taong yaom salamat dalam pacang caga jit Covid-19,  pacang caga njom mbak jit ruak dalam Cty, khu chế xuất, khu cong nghiep, jak ba urang ngak brei ngak njauk tui 5 paka di Mintri Y tế, pathau khan jalan sahaneng njauk ka vaccine  Covid-19. Ong Nguyễn Văn Khoa, Tong Yam ndoc Tập đoàn FPT brei thau:“Tuk khol dahlak peih bruk pathau khan jeng gaok rilo kan kandah, kayua hu dom urang jakar, urang ngak ka oh jia tame vaccine. Khol dahlak  pathau khan saong tacei pato urang ka bruk pacang caga Covid, abih di nyu brei thau vaccine lac jalan siam piah khik hu bruk hit ngak mbang, khik brei Cty hu bruk ngak gam gam.”

Hadei di bruk klauk praong mbang ka 4 di TP.HCM hu peih tabiak ngak meng harei 19/6 ngan saong urang hu klauk jru dalam sa harei labaih 200.000 urang, Mentri Y te hu parabha mbang ka 5 ngan saong 700.000 mbang vaccine pacang Covid-19 brei ka TPHCM. Meng bruk daok pamaong tal lac 2/3 bhap bini di Ban raya HCM hu klauk jru vaccine pacang Covid-19 dalam thun ini, Ban raya daok duah jru vaccine meng dom labik ngak tabiak hu angan je di dunya. Anak meta, ban raya brei pandar vaccine urak ini daok hu piah klauk ka dom urang brei klauk dahlau tui Sarak 21./.

Urang lang: Ai Nghiem  29/6/2021