Lâm Viên Ea Kao saong Lâm Viên Buôn Ma Thuột nan lac dua labik rivang ma-in di bal Buôn Ma Thuột, tỉnh Đắc Lắc pachreih hu ralo tuai damuai saong bhap bani labik ini mai rivang ma-in, giải trí dalam dom harei puac adit saong harei lễ, tết. Dua labik rivang ma-in ini biak pachreih tuai damuai kayua nyu biak gheihmekre, alam môi trường haci hacih. 

 Hồ Ea Kao prong labaih 200 héc ta, lac hồ thủy lợi prong abih di Buôn Ma Thuột, urak ini hu thau tal lac labik rivang ma-in, giải trí biak pachreih urang nao tal. Yaok biar harei, tuai damuai, anek saih, sinh viên saong bhap bani ba gauk mai ini hóng mát, mong iek mbaok aia pasang binguk ceik glai; atah atah nan lac bein cà phê, mblang hamu, mblang tangeiy hijao that; atau vaih trun dom lều vah ikan. Sa-ai Nguyễn Xuân Mạnh daok ngak bruk di sở Y tế Đắc Nông gam haong dom ayut sahabat mai tal hồ Ea Kao vah ikan thư giãn brei thau:“Khaol dahlak tame ini mbang ka 4 paje. Khaol dahlak nao vil valhồ Ea Kao blaoh cắm trại. Adei sa-ai tame ini ma-in kayua takre cảnh quan tự nhiên. Pak ini ralo meng lacsinh viên, giới trí thức, urang ngak jeng tame ini giải trí min. Meyah buh jien tame ngak du lịch sang bein, cà phê atau dịch vụ karei yau mbang menyum tuk biar harei ye meda hu ralo tuai mai ma-in jang”.

Gah diah hồ nan lac Lâm Viên Ea Kao kayua Công ty TNHH MTV Đô thị saong Môi trường Đắc Lắc khik iek. Piah mai tal labik ini, tuai damuai njauk nao tui jalan menyek tapa buôn Tơng Jú, xã Ea Kao. Ini lac glai prong meng lingik tasik,mbaok haluk huhareik dui atah talmbaok hồ, biak laghaih ka dom bruk dã ngoại, cắm trại. Sa-ai Tôn Thất Hùng Đại meng bal Đà Nẵng haong dom ayut sahabat tagok ini cắm trại, vah ikan, dul njuh piah tahanek huak dalam lingik tasik haci hacih biak chreih chrai khan lac. “Kadha akaok mereip adei takre labik ini lac gandang joa, oh hu dhul mul thak radaih atau sap ruan. Adei mboh pak ini yau daok tamo meng lingik tasik. Pak ini hu binek,hu ceik saong oh ka njauk  ô nhiễm kayua hareik hareim”.

Daok ngan haong adei Nguyễn Thị Tường Vy jeng yau ralo sinh viên sang bac Đại học Tây Nguyên ye Lâm viên Ea Kao nan lac labik rivang ma-in puac adit biak bui sambai, huceik glai,hu hồ aia biak mekre piah thaot binguk. “Lâmviên hu ralo labikmekre piah thaot binguk; nyu praong,laneng, hu hồ prong saong li-an bingu. Adei caong hu ngak pasiam jang cảnh quan min juai ngak lahik nao bruk tamo di nyu”.

Gam haong Lâm viên Ea Kao, Lâm viên Buôn Ma Thuột jeng hu peih pabah mbang piah duh ka tuai damuai saong urang mai rivang ma-in. Dom pandap tái chế hu gheih pandar piah ngak jeng bồn hoa, đoàn tàu, kadhik angin saong dom anek athur biak mek meta yau lamen, ula hổ mang, menuk tano, kra,tuk akaok mereip hu ngak jeng pren dui pachreihka Lâm viên Buôn Ma Thuột tok hu phun glai. Ong Lê Đình Trung – Phaok Akaok công ty TNHH MTV Đô thị saong Môi trường Đắc Lắc brei thau, labik parang iekpandap panda tái chế pak Lâm Viên  Buôn Ma Thuột oh lac ba mai dom thaik binguk mek meta bo daok payua tal manuac urang panuac lac“pren diuk bahrau meng phế liệu”, piah pathau khan paglaong akaok saneng ka bruk khik iek alam môi trường: “Tui jalan ba di raja-ei ka bruk pandar veikhareik klaak, công ty hu ngak tabiak dom janihmeng hareik klaak ini, nyu brei mboh pren diuk meng pandap klaak. Meng nan manuac urang meng sahneng mboh ka bruk khik iek alam môi trường. Khin patagok sa labik rivang ma-in di bal Buôn Ma Thuột ye njauk buh jien tame ngak ka nyu siam jang. Dom glai ye cakrok patagok bruk rivang ma-in min jeng njauk khik kajapsinh thái tui jalan khang kajap, oh ngak tayah không gian, cảnh quan dalam dom glai ini”.

Yaom lac oh ka njauk lac dom labik rivang ma-in du lịch hu dịch vụ siam, min Lâm viên Ea Kao saong Lâm Viên Buôn Ma Thuột, dua glai mekre di tỉnh Đắc Lắc daok khik hu môi trường hacih sa-at, lac labik mai biak chreih chrai bui sambai ka tuai damuai saong manuac urang di puk palei dalam dom harei lễ, tết saong puac adit./.