CÀ MAU CAGA CHIP GLUT JALEIH

Dalam dom adit tapa, bhum tasik Cà Mau hu hajan, ia tagok glaong, riyak paoh tame ar tasik Tây ngak ka ar glut jaleih meng rilo thun ini mai daok glut jaleih trak jang. Urak ini, angaok ar hu rilo labik glut jaleih min tok hu ramik pasiam di anak meta saong mbuan glut jaleih trak jang lac bruk oh plaih hu dalam bilan hajan ribuk thun ini. Việt Đoàn, urang pambuak bruk haong rayo sap ndom VN daok di bhum taneran kraong CL brei thau :

Abih ar gah timul saong pai tapen tasik Cà Mau atah jaik 154 km, urak ini hu 80% ar tasik glut jaleih, kuhria rah tapa nyu jaleih meng 15 tal 50m/sa thun, ngak lihik labaih 300 ha glai pacang caga. Tapa pasang iek tapak mboh lac, abih ar tasik Cà Mau urak ini hu labaih 40 km glut jaleih khang, dalam nan hu 6 labik biak nguy hiểm. Ta-eng ar gah Pai tapen tasik Cà Mau hu jaik 108 km daok dang anak bruk glut jaleih trak. Ia tagok glaong ngak lihik nao jalan glai pacang caga nan ye bruk glut jaleih rah tabiak samal. Ralo meng mboh glut jaleih di dom xã Khánh Tiến (huyện U Minh), xã Khánh Bình Tây Bắc (huyện Trần Văn Thời) saong xã Tân Hải (huyện Phú Tân), atah abih tih jaik 23km. Daok ar gah Timul, glut jaleih biak khang mboh di ar tasik xã Đất Mũi (huyện Ngọc Hiển) saong xã Tân Thuận (huyện Đầm Dơi), atah abih tih jaik 9km. Dom labik ini, glai pacang caga biak lipih, bruk patuh đê mbuan si rah tabiak. Ông Tăng Văn Ngoan, daok di huyện U Minh, lac: “Dom labik ar oh ka ngak bờ kè ye ia thủy triều tagok ngak ka pandap panda, njam patam, sang danaok, sa thun gaok khat lahik dua  klau mbang.”

Tukvak tapa, tỉnh Cà Mau hu buh tame yaok ratuh tỷ đồng piah padang rilo janih kè khang, kè lipih, di dom labik mbuan glut jaleih, khik caga ar oh caik ka nyu patuh. Min, anak bruk riyak paoh khang, glut jaleih tuk halei jeng mboh di libik barau, mboh yau daok cang ba theik taneh riya, glai pacang caga saong drap ar di bhapbini . Ông Trần Văn Xê, daok di huyện Phú Tân duh hatai lac :“Barau ini dom jalan kè hu ngak blaoh mikva biak sahanang hatai, daok veik dom labik bo oh ka ngak ye bilan hajan ribuk ini mikva biak duh hatai, oh thau ngin ribuk yau habal. 

Anak bruk  glut jaleih rah tabiak, uy mban bhapbini tỉnh Cà Mau meda pok tagok Thủ tướng rajaei saong dom mintri, nganh Trung ương pasang iek brei buh tame labaih 5.100m kè khẩn cấp caga glut jaleih ar tasik gah Tây dalam huyện U Minh; samal daong ka tỉnh 150 tỷ đồng meng jien caga peih ngak dom jalan khẩn cấp khik caga labik glut jaleih biak xung yếu. Taphia di nan, hu panuac caong Trung ương daong Cà Mau peih ngak veik dom dự án: Kè cấp bách di xã Tân Thuận; kè caga glut jaleih labik dân cư ban sit Năm Căn (huyện Năm Căn) saong kè caga glut jaleih di xã Tân Tiến (huyện Đầm Dơi).

Kayua phun jien takik, nan ye tukvak tapa, Cà Mau bahrau ngak hu dom công trình caga glut jaleih khẩn cấp di dom labik biak xung yếu, oh caik ka nyu patuh ar. Dom labik glut jaleih xung yếu daok veik yau labik  Vàm Kinh Đá Bạc tal cống Kinh Mới, meyah oh hu pabak phun jien daong meng mintri, ngành Trung ương, dom jalan caga glut jaleih di anak meta thời oh khik hu siam mekre, abih di nyu nan lac tuk gah anak ar oh daok glai pacang caga. Ông Nguyễn Long Hoai, akaok Chi cục Thủy lợi tỉnh Cà Mau brei thau :“Anak meta ye dom labik ngak brei suh sah atau glut jaleih ngak patuh ar ye tỉnh tabiak bruk daong ar khẩn cấp,pandar  dom jalan ngak di anak meta piah pacang caga. Min, suai livik meyahhu jien padai, njauk ngak kè ly tâm piah kè ar tasik khang kajap  saong siam mekre jang”

Thúy Linh