Di xã bhum tasik atah bayah - Khánh Hải, huyện Trần Văn Thời, Cà Mau, urak ini bruk kuhria caga manuac urang piah palih ruah ka HĐ bhap bani xã hu ngak salah blaoh. Nyaom biai Hiệp thương mbang ka 3 di xã hu ba tabiak  angan 47 urang piah ba tabiak palih ruah mek 28 urang.

Piah palagaih ka bhap bani nao buh phiếu palih ruah urang ka Quốc hội saong urang ka HĐ bhap bani dom pakat, Hội đồng palih ruah xã Khánh Hải hu padang 9 mban palih ruah, 11 tổ palaik phiếu. Tukvak tapa, langiu di bruk kham merat ngak salah dom bruk caga ka palih ruah, bruk palih ruah jeng hu karja palei sangka. Meng nan, bhap bani thau hu cambaih labik dang di drei dalam bruk nao palih ruah. Sa-ai Trần Thị Hải, sa urang daok pak ini khan brei thau: “Palih ruah lac quyền saong bruk ngak di taong abih manuac sia. Nao bầu cử piah palih ruah menuac drei takre, drei jia. Harei dahlau dahlak jeng hu khan brei thau ka bruk palih ruah. Urak ini nao pak halei jeng pang ndom tal palih ruah, mboh tuan băng rôn ini diah. Dom urang hu ba tabiak piah palih ruah jeng hu pasang iek biak tani tanat blaoh paje. Jeng hu mboh mai pak ini mek panuac taong yaom dom urang tabiak mbaok piah palih ruah”.

Dom urang daok dalam MBan bầu cử xã Khánh Hải hu nao tal yaok baoh sang piah pathau khan dom kadha njauk thau tal bhap bani. Tapa nan, jeng thau hu dom urang bhian nao ngak mbang atah piah khan brei thau  mai veik palei palih ruah atau khan haong labik drei daok tạm trú piah buh phiếu, brei mboh hatai caong khin di drei. Ong Phạm Thành Được, akaok UB bhap bani xã Khánh Hải brei thau, bruk kuhria caga ka mbang palih ruah hu sap gap tani tanat. Meyah tame bilan hajan, dom urang prong thun meda gaok kan kandah dalam bruk nao buh phiếu ye karja palei hu sa thùng phiếu ba nao tal sang yaok urang oh nao buh phiếu hu, ngak ka harei 23-5 anak tal njauk lac i “harei roya di taong abih bhap bani”, ong Phạm Thành Được daok brei thau lac: “Xã Khánh Hải hu jul pakhang bruk pathau khan. Hu ngak blaoh bruk tuan băng rôn, jeng hu ngak blaoh pa nô pathau khan. Hu pathau angaok rayo papar sap di xã 3 mban sa harei. Dom tổ pathau khan jak ba di dom ấp jeng hu  pathau khan yaok harei tal harei palih ruah”.

Tui Sở Thông tin – Truyền thông Cà Mau, piah ka bruk pathau khan hu siam mekre, jabat hu pataom mek ginup abih dom harak gar tacei pato ka bruk palih ruah saong samar drah ba trun tal jabat papar sap pakat huyện, xã. Sở jeng hu vak katut veik saong ngak tabiak file sap ndom ka asal kadha pathau khan di Ủy ban Palih ruah pakat negar ba trun tal xã piah papar sap, daong ka bhap bani thau hu khaw tin samar drah.

Ong Nguyễn Văn Đen, Phaok akaok Sở Thông tin – Truyền thông Cà Mau brei thau, tỉnh Cà Mau thau lac, bruk pathau khan njauk pamong tal biak biai, nao tame dalam nan ye langiu di pathau khan angaok báo đài, jabat jeng hu pandar mạng Internet, mạng xã hội ba samar drah dom kadha ndom ka bruk palih ruah tal bhap bani. Pamong tal peih ngak patak pataom, pacang cakak palai pajua, bruk pathau khan meng dom pa nô, áp phích hu pachreih  ngak mbiah, lagaih. Meng bruk khik iek gah thông tin - truyền thông, sở meda pasang iek biak catang dom kadha ndom tal bruk palih ruah, abih di nyu lac dom blah mạng xã hội: “Khaol dahlak hu tiểu ban pathau khan, bhian tui iek dom thong tin angaok mạng xã hội piah duah thau, hu dom thong tin halei suan ye khan brei thau veik ka nyu njauk, oh caik ka rahra suh sah hatai. Oh caik ka nyu ndom jak urang lambaok, ngak brei patrun angan je urang halei nan bo ba tagok mạng ye njauk pacang cakak chip, meyah hu”.

Taphia di nan, Sở Thông tin – Truyền thông Cà Mau jeng bhian brei brei dom kapul ngak bruk nao trun pasang iek piah daong ka dom puk palei lang talaih kan kandah, pasiam veik dom labaih - kurang dalam bruk pathau khan. Sở Thông tin - Truyền thông Cà Mau daok pambuak bruk haong gah Tư pháp peih bruk pakacah duah thau ka bruk palih ruah urang ka Quốc hội mbang XV saong palih ruah urang ka HĐND dom pakat tukvak 2021 – 2026.

Rayo papar sap -papar binguk haong Báo Cà Mau jeng hu peih  kadha pathau khan ka bruk palih ruah piah samar drah brei thau bruk palih ruah tal yaok baoh sang, abih di nyu lac dom baoh sang daok di bhum atah bayah. Meng rilo jalan pathau khan nan ye tal harei ini jaik abih bhap bani daok di labik puac abih di taneh aia hu thau ka makna saong bruk ngak di drei dalam mbang palih ruah, bầu cử ini./.

Urang lang: JaSi -  29/4/2021