Mentri Pato megru ieu dom tỉnh bal tui iek catang bruk jit ruak, gam gam duah thau ka urang jakar, gru pato hu mbaok tame mbang pakacah saong dom anek saih nao pakacah; tacei pato dom labik pato megru dalam tỉnh, bal peih ngak catang dom adat hukum ka pacang caga jit ruak, daong palagaih di abih piah ngak hu siam mbang pakacah ini meng di mbang pakacah camereip.

Dom tỉnh ban hu palih ruah blaoh dom anek saih pacah jeng dom nyom F0, F1, F2 piah hu dom jalan ngak ka nyu laghaih haong bruk daok rah tabiak di puk palei. Dom hội đồng pakacah jeng hu kuhria blaoh dom labik pakacah piah caga, dom duk pakacah piah caga di dom labik pakacah piah pabak hu kadha hagait karei rah tabiak.

Abih di nyu nan lac, dom tỉnh, ban hu ba tabiak dom jalan ngak samu gauk piah pacang caga jit yau pruh jru pametai anek ruak di labik pakacah, caga  siuk pabang mbaok, aia jru pametai anek ruak, japon rao tangin… di dom labik pakacah saong duk pakacah. Di yaok labik pakacah jeng hu urang jakar mong iek gah y tế.  

Ta-eng di bal HCM, mbang pakacah tamat THPT thun 2021 tui kuhria meda rah tabiak dalam 3 harei lac: 6, 7 saong 8 bilan 7 brei ka dom anek saih pakacah oh daok dalam labik njauk pacang veik saong dom anek saih pakacah oh daok dalam nyaom F0, F1, F2 tui parabha di gah y tế.

Dom anek saih pakacah di dom labik njauk pacang veik atau daok pa-atah di gauk saong dom anek saih pakacah daok dalam nyaom F0, F1, F2 tui bruk parabha di gah y tế, oh hu mbaok tame mbang pakacah di harei 6, 7 saong 8 bilan 7, meda tame pakacah tui harei ba tabiak hadei di Mentri Pato megru. Sở Pato megru bal raya brei thau lac hu padang jalan ngak piah peih mbang pakacah hu siam mekre, dalam nan brei ngak catang bruk pacang caga jit.  

Labik pakacah hu padang ngak tui jalan parabha, peih ngak siam mekre, pacang caga jit ruak ka nyu laghaih; gam haong nan peih bruk pathau khan, pato pakai paglaong akaok saneng, bruk ngak di urang jakar khik iek, urang ngak, gru pato, anek saih pakacah saong amaik ame di anek saih ka dom bruk pacang caga jit. 

Dom labik pakacah oh peih bruk pataom gauk khan brei thau ka adat hukum pakacah di mblang sang bac, salih tame nan hu khan brei ka anek saih thau dom asal kadha pambuak pagam tal bruk pakacah tapa email, blah web atau tin nhắn.

Anek saih pakacah brei cuk siuk pabang mbaok luac tukvak pakacah, rao tangin meng jru pametai anek ruak dahlau di tuk tame labik pakacah, duk pakacah, brei nao njauk jalan saong daok atah di gauk tuk dut iek thân nhiệt, nao tapak tagok duk pakacah, oh pataom gauk, oh ndom biai dahlau saong hadei di tuk pakacah. Anek saih pakacah hu dut iek thân nhiệt dahlau di tuk nao pakacah, khan brei thau y tế di sang dahlau di dom van pakacah, saong meyah mboh pandiak, patuk ye khan brei ka dom labik pakacah thau piah hu jalan langyah ka nyu laghaih.  

Taong abih labik pakacah hu pruh jru pametai anek ruak dahlau harei pakacah sa harei saong hadei di tuk pakacah, puh ramik dalam, langiu sang bac, sang jaman hadei di yaok van pakacah. Anek saih pakacah hu parabha pabah mbang raok, ba tui nyaom duk pakacah, brei rilo abih 24 anek saih tame sa duk pakacah. Duk pakacah brei laneng lanoi, oh pandar mac la-ar.

Tui bruk ba tabiak, bruk chấm kadha pakacah hu peih ngak meng harei 8 tal 26-7, brei khik kajap bruk daok atah gauk, oh pataom rilo manuac.

Mentri Pato Megru brei thau, dom anek saih gaok kan kandah meng jit ruak Covid-19 oh hu mbaok pakacah dalam mbang ka sa ye brei pakacah mbang ka 2. Tukvak pakacah mbang ka 2 hu Mentri Pato megru ba tabiak tui panuac di dom puk palei saong tui bruk rah tabiak di jit ruak. Dalam nan, khik kajap bruk samu gauk, quyền lợi ka dom anek saih di dom mbang pakacah, abih di nyu lac quyền lợi dalam bruk palih ruah tame đại học, cao đẳng. Kayua yau nan ye, dom anek saih saong dom urang ngak amaik ame juai duh hatai rilo ka bruk ini./.

Urang lang: Jasi -6/7/2021