Piah oh ngak klaoh bruk pabak pandap panda, jabat khik iek karja, dom doanh nghiệp hu pabak ginup pandap ka darak pasar

Tal harei ini, dalam tỉnh Bình Dương jit ruak Covid-19 jeng daok rah tabiak khang. Dom labik pablei salih njauk kareik pabah mbang atau brei padeih pablei piah pacang caga jit min bruk pabak pandap panda dalam tỉnh jeng daok hu khik grap tanat. Pandap hu rilo saong hu ba pablei ginup abih di dom darak pasar, siêu thị, pasak pablei salih, cửa hàng mbuan laghaih dalam tỉnh piah duh ka bhap bani. Yaom pablei pandap panda hu grap tanat, oh hu bruk khik piah pandap piah ngak ka nyu tagok yaom.

Dalam tuk nan, di bal raya Hồ Chí Minh, dom harei puac bilan 6, karja dom quận, huyện brei ngak catang bruk pablei salih di darak pasa meng kan. Brei padeih bruk pablei salih di darak pasar đầu mối kaya nong pandap mbang menyum Hóc Môn. Sở Công Thương bal raya Hồ Chí Minh hu ieu Mban khik iek dom darak pasar Bình Điền, Thủ Đức daong taduan mek, pablei pandap panda meng dom urang pablei salih ba mai ka darak Hóc Môn. Gam haong nan, Sở daok hu jalan patagok bruk pabak pandap meng dom labik parabha saong doanh nghiệp hu mbaok tame danak dak grap tanat darak pasar piah pabak pandap kayua darak Hóc Môn padeih pablei. Lambaok dom siêu thị brei thau, piah khik hu pandap panda oh klaih klaoh, siêu thị hu duah labik pabak bahrau, parilo janih pandap panda oh caik rah tabiak bruk klaih klaoh. Dalam tuk nan, Liên hiệp Hợp tác xã pablei salih bal raya Hồ Chí Minh (Saigon Co.op) hu kakei dahlau dom labik pabak, piah hu ginup pandap tui bruk ba tabiak. Amuk Vũ Nguyễn Diễm Thi, Yam ndok Marketing Liên Hiệp Hợp Tác Xã Thương Mại Bal raya Phố Hồ Chí Minh (Saigon Co.op) brei thau: “Khaol dahlak patagok rilo jang ralow pabui di dom Co.opmart, Co.opXtra, Co.op Food... tagok rilo jang dua mbang saong kakei dahlau dom labik pabak pandap tui bruk ba tabiak dahlau di nan, dom janih pandap daok ngak abih abih công suất saong meda pabak rilo mbang dalam harei ka dom siêu thị. Saigon Co.op pachreih urang blei lac siam di nyu njauk blei online, meda iew phon tapak tal dom labik pablei.”

Piah khik ka bruk pabak pandap panda – abih di nyu nan lac brah, kaya mbang duh ka bhap bani – oh njauk klaih klaoh, Sở Công Thương dom tỉnh, bal  hu pambuak bruk haong dom jabat pagam tal, ba tabiak bruk parabha pandap panda, ieu dom doanh nghiệp parabha pandap pambuak bruk haong gah pabak pandap piah ramik veik, paglaong prein pabak pandap panda tabiak darak pasar. Tui amuk Vũ Thị Hậu, akaok kapul dom jabat pablei lẻ Việt Nam, dom doanh nghiệp pablei lẻ hu caga patagok bruk khik piah pandap panda, oh caik rah tabiak bruk kurang pandap, yaom tagok glaong.“Dom doanh nghiệp pablei lẻ biak kham merat dalam bruk duh ka urang blei pandar, rik daong khik kajap bruk blei tame pablei tabiak ka nyu samu gauk. Dom labik pablei lẻ hu nao tapak tal labik ngak piah blei pandap panda kaya nong, ngak jeng labik pablei khang kajap ka dom doanh nghiệp, dom HTX.”  

Vụ Darak pasar dalam negar, Mentri Công Thương brei thau lac daok pambuak bruk khang kajap haong dom puk palei piah khik kajap bruk pabak pandap panda, langyah dom kan kandah dalam bruk pajeng ba pandap panda. Mentri Công Thương hu harak payua ka dom tỉnh bal peih bruk brei thau dữ liệu ka darak pasar, siêu thị, pasak pablei salih piah padang Bản đồ diuk rai siam mekre haong Covid-19. Ong Trần Duy Đông, Akaok Vụ Darak pasar dalam negar, Mentri Công Thương brei thau: “Hatai sahneng di bhap bani dalam bruk blei pandar oh mboh hagait srau kadau, kayua jia tame bruk pabak pandap panda di dom labik parabha. Meda ndom lac, pandap panda pabak brei angaok darak pasar tuk halei jeng grap tanat, kuhria gam labik njauk pacang veik atau peih bruk brei daok atah gauk dalam bol bhap rahra. Oh hu bruk bhap bani ba gauk nao blei pandap piah khik pataom.”

Piah khik kajap bruk pabak pandap panda duh ka bruk blei pandar di bhap bani dalam vaktu jit ruak Covid-19 daok rah tabiak khang, Mentri Công Thương hu harak tacei pato Sở Công Thương dom tỉnh bal, ba tabiak dom jalan ngak piah pabak pandap panda grap tanat darak pasar, khik kajap bruk an sinh xã hội tui dom pakat di jit ruak Covid-19 rah tabiak, dom jalan ngak daong jhul patagok bruk pablei kaya nong saong tacei pato bruk blei, pablei pandap panda, kaya nong di dom bhum hu jit ruak Covid-19./.

Urang lang: Jasi – 05/07