Gah chức năng brei ba tabiak dom jalan piah pacang cakak, pasang iek jit ruak

Maong tame bruk njom mbak di dom taneh ia meda mboh lac, taong abih dom mbang jit rah tabiak mbang hadei bhian praong jang, khang jang saong metai lahik rilo jang mbang dahlau. Di Ấn Độ dalam 24 tuk hu gac 340.000 urang njom bahrau, bruk y tế daok tapen daning glut jaleih.  Lào, Campuchia, Thái Lan jeng hu dom urang njaom glaong abih kuhria meng dahlau mai. Bruk njauk duh hatai lac mbuan hu dom biến chủng kép SARS-CoV-2 di Ấn Độ ngak brei jit tamuh khang gam haong dom triệu chứng trak tagok, atau biến chủng di Anh, Campuchia ngak brei patagok bruk mbuan njaom mbak tame taneh ia drei. Kayua yau nan ye, bruk jit mbuan njaom mbak tame bhap bini lac biak praong. Meng sruh jit sit jeng sruh jit praong.

Bruk njauk duh hatai di abih tuk ini lac hatai sahneng pacang caga jit. Dalam 1 bilan tapa, taneh ia drei oh ka hu urang njom Covid-19 dalam bhap bini nan ye ba tal iek lap, takik sangka. Rilo menuac tabiak jalan oh cuk pataih pacang mbaok, oh ngak tui 5 paka di Mintri Y tế, dalam nan 2 bruk praong meda ngak brei patrun njaom mbak Covid-19 lac cuk pataih pacang mbaok haong bhian rao tangin meng ia jru pametai anek ruak.

Daok bruk ngak di dom tỉnh, ban dalam pacang caga jit, akaok Mintri Y tế Nguyễn Thanh Long ndom lac brei ngak catang bruk “4 di labik” saong patagok labik dang, bruk ngak di urang dang akaok. Gam haong nan, bruk caga dahlau di dom jabat, dom gah saong bhap bini lac bruk praong dalam pacang cakak, pasang iek, pacang padam jit ruak: “Jhui iek lap, bo brei paglaong hatai sangka. Ini lac dom panuac bo Rajaei, Thủ tướng Rajaei hu ndom nao ndom mai rilo mbang. Tui nan, yaok jabat, yaok gah, sang mac brei peih ngak biak siam dom jalan pacang caga jit tui tacei pato di Mintri Y tế. Brei sahneng lac meda hu urang njaom bahrau pak di labik drei daok, kayua yau nan ye njauk pasang iek veik bruk mbuan njaom mbak Covid 19, caga bruk meda pambak praong dalam bhap bini atau dalam labik ngak bruk di drei.”

GS.TS Nguyễn Thanh Long, Phaok akaok mBan Thường trực mBan tacei pato pakat negar pacang caga jit Covid 19, Akaok Mintri Y tế brei thau, Mintri Y tế hu padang 5 kapul ngak bruk kayua Akaok Mintri saong 4 Thứ trưởng nao tal taong abih dom tỉnh, abih di nyu lac dom tỉnh Tây Nam mbuan hu jit njaom tame piah pasang iek. Gam haong nan, dom jalan ngak piah pacang jit ruak jeng hu caga blaoh tuk jit pambak praong. Tui nan, tuk hu urang njaom dalam bhap bini, atau hu urang njom mbak dalam bhap bini bo oh thau chip; rah tabiak njaom mbak khang dalam bhap bini. Ong Nguyễn Thanh Long brei thau: “Taong abih dom jalan ngak ini kol dahlak jeng hu pasang iek, taong yaom veik saong hu panuac kakei dom tỉnh, ban ramik ngak veik dalam tuk pasang iek. Kol dahlak tacei pato khang bruk ini piah ngak habar pacang padam, pasang iek hu tuk jit tamuh tabiak, oh ngak dalam srau kadau min oh iek lap dalam pacang caga jit. Bahrau ini, mBan tacei jalan pakat negar hu ginum biai haong dom tỉnh Tây Nam bộ, dom tỉnh hu jalan tapen negar haong Campuchia piah patagok dom jalan pacang caga jit dalam bhum. Brei ngak njauk tui 5 paka di mintri Y tế dalam pacang caga jit”

Meng bruk di dom tỉnh bhum Tây Nam, gah y tế kakei bhap bini meyah mboh menuac tame negar suan hukum brei khan chip ka karja palei thau. Tapa dom mbang jit brei mboh lac, tok hu 1 urang njaom Covid 19 bo oh mboh oh thau chip, mbuan ngak brei pambak praong tabiak bhap bini saong meng bruk salih karei gam gam di chủng bahrau SARS-CoV-2, dom kan kandah ka anek menuac saong ka raidiuk lac biak praong, kan si kuhria mboh dahlau hu./.

Urang lang: M. Phương – 02/05