Taha palei lac gheng di puk palei, lac urang hu rilo ilamu dalam raidiuk saong hu angan je dalam bhap bini, rilo taha palei daok patagok labik dang di drei dalam bruk pathau khan, jak ba bhap bini ngak mbang, patagok kinh tế baoh sang jeng ye khik ramik ka puk palei hu siam mekre. Dalam kadha “Kreih camin palei negar” harei ini, da-a mikva saong taong abih gauk pang kadha vak angaok báo Bangsa saong Patagok brei thau kreih camin hadah di taha palei Y Khêă, daok di buôn Buôn, xã Tâm Thắng, huyện Cư Jút, tỉnh Đắc Nông: 

Kol dahlak hu gaok taha palei Y Khêă, di buôn Buôr, xã Tâm Thắng, huyện Cư Jút, tỉnh Đắc Nông, thun ini 74 thun min ong daok khang kadang saong chreih bui. Meng tuk hu mikva dalam buôn pok ngak taha palei, ong Y Khêă oh hu tuk padeih padei, tuk halei jeng maong bruk di palei yau bruk di drei. Melam melam, ong nao meng sang ini tal sang deih piah pato tacei anek kamuan ngak tui bruk siam, bruk njauk, kham merat ngak mbang piah padang raidiuk hu khang kajap jang, oh brei eik lipa saong kanjah jhak njom tame dalam sang di drei.

Sa-ai H’Ranh, sa urang daok dalam palei khan lac: “Taha palei di drei siam lô, taha tuk halei jeng sangka, pachreih ba puk palei jum pataom gauk, daong gauk tuk gaok kan kandah, oh pang tui panuac di kol kanjah jhak ngak srau kadau puk palei. Taha daok hu tacei pato abih gauk brei thau khik ramik dom ilamu meng kan di bangsa, klaak nao dom adat cambat tanarakun oh siam. Hu taha palei bo abih gauk hu thau rilo bruk siam, meng nan kham merat ngak mbang jang”.

Meng hatai caong ka puk palei hu siam mekre, sang halei jeng hu haniem phul, taha palei Y Khêă ba abih pren yava tabiak jak ba, tacei pato mikva dalam palei nao tui jalan Wa Hồ pilih ruah bloh. Taha palei Y Khêă khan lac: “Meng tuk ngak taha palei jeng hu rilo bui sambai, min jeng hu rilo duh hatai. Duh hatai kayua daok hu dom urang njauk kol kanjah jhak pacuh pajarak ngak dom bruk suan adat hukum, min bui sambai kayua hadei di tuk mboh hu dom bruk ngak suan di drei, mikva thau kham merat ngak mbang, jum pataom gauk, daong ba gauk dalam raidiuk”./.

 Thúy Linh