Hu jeng bhian randap meng labaih 8 thun ini mai, jaik tal tết, tuk dom labik dalam bhum palei pala gaok ralo kan kandah ka bruk ieu pataom urang yuak padai saong peih ngak dom công trình dân sinh, xã hội brei ka dom harei tết ye dom puk palei jaik taphia bal Cần Thơ hu chreih chrai taduan raok bộ đội mai daong pren dalam tết quân dân. Thun ini, Đảng ủy, Bộ chỉ huy quân sự bal Cần Thơ pambuak haong dom pakat karja saong quân khu 9 peih bruk “tết quân dân 2015” di phường Trung Kiên, quận Thốt Nốt. Bruk uan raok tết trei sil bui sambai kayua yau nan ye bo mai avar jang di quận Thốt Nốt jaik taphia bal Cần Thơ, saong ngak brei khang kajap jang hatai jia di bhap bani brei ka Đảng, ka “bộ đội cụ Hồ”.

Yaom lac tal adit meng harei 6 tal harei 12/2, dom bruk ngak di “Tết quân dân Ất Mùi 2015” meng rah tabiak, min meng meteh bilan ini mai, pak dom labik  Qui Thạnh I, Qui Thạnh II di phường Trung Kiên, quận Thốt Nốt hu chreih chai tagok bruk taduan raok bộ đội mai palei. Pak ini pak nan, rah tapen dua gah jalan palei, vin taom dhar mblang dit blaong, atah tui takai kraong hu mboh hala daok, biểu ngữ salam uan tết quân dân hu hadah tanyak dalam pandiak page, angin biar harei. Puk palei jeng chreih chrai tagok, bui sambai jang yaok harei tuk hu labaih 200 urang jakar, urang lin di tiểu đoàn 312, Trung đoàn Bộ binh 3 dalam Sư đoàn 330 saong saong bộ đội, bhap bani puk palei mai gam mbang, gam daok, gam ngak ralo bruk hu makna, daong ka bhap bani uan raok tết sak pabe. Sa-ai Dương Hồng Điệp – Phaok akaok phường Trung Kiên brei ka khaol dahlak thau: Drei pataom abih hệ thống chính trị gam pambuak bruk haong tapon nyom bol pan phao kraong, dân quân tự vệ, gam haong bộ đội mai  palei meda ngak salah blaoh dahlau tết piah palagaih ka mikva drei mbang tết hu bui sambai jang. Tuk bộ đội mai pak ini ye mikva dalam palei thei jeng bui sambai, pachreih tui, mikva biak njauk hatai. Dalam tuk bộ đội ngak bruk ye hu bhap bani, mikva ba brei pandap mbang, aia menyum, brei labik padeih padei tuk kreh pandiak atau padeih tapa melam. Mikva biak pachreih tui.

Hu pren ranaih “bộ đội cụ Hồ”, jalan bê tông atah jaik 2.300m daok mbaih mboh di phường Trung Kiên samar hu pasiam veik, ngak bahrau jeng jalan palei pala mek hu chuẩn, cagar 4 m khang kajap saong laneng lanoi. 2 mbaik tatua sit dalam palei hu ngak veik ka siam saong sa mbaik tatua hu ngak bharau di angaok jalan nan. 2 baoh ribaong tapa palei jeng hu kuac kuah haluk, ngak vệ sinh, ngak hacih hareik hareim saong pala pabak phun hijao ngak jeng cảnh quan hadah, hijao, hacih, sa-at. Abih di nyu nan lac 16 baoh sang brei ka urang kathaot, urang hu rai diuk kan kandah saong bộ đội xuất ngũ di puk palei jeng daok hu ngak jaik salah dalam bui sambai oh ndom hu di bhap bani. Trung tá Võ Văn Gấu – Phó Trung đoàn 3 di Sư đoàn 330 khan lac: tết quân dân jeng lac bruk ngak prong dalam bruk pato pathram hatai saneng di urang lin bahrau: Adei sa-ai urang jakar lin jeng thau,  ini jeng lac bruk ngak prong di urang lin piah padang talei rohim siam mekre haong karja palei saong mikva labik ini. Đơn vị pambuak haong puk palei dak harei dak cak rok patagok siam jang. Dalam tuk khaol dahlak hu mbaok ngak bruk di labik đóng quân, taong abih mikva, karja pak ini thei jeng daong palagaih. Mikva anit ranam raong ba saong palagaih ka khaol dahlak ngak siam bruk ngak di drei.      

Adei sa-ai urang jakar, bộ đội mai Trung Kiên rilo meng lac urang lin bahrau, mbang camereip hu mbang tết haong bhap bani dalam khan ao “bộ đội cụ Hồ”. Tapa nan, bruk uan, hadhar sang jeng hu urang lin daok ranaih salih jeng ý thức trách nhiệm nan ye daok pak halei, khaol dahlak jeng mboh dom urang nan ngak bruk abih drei. Urang lin angan Trần Thành Tín – palei daok pak huyện huỵên Tam Bình, tỉnh Vĩnh Long daok ngak sang ka bhap bani khan lac: Adei mboh bui sambai lô tuk ngak bruk hu makna yau ini, ngak yau nan mboh takik uan sang. Tết thun ini adei hu ralo kadha piah khan  ka ayut sahabat saong adei sa-ai dalam sang pang. Tết adei ieu phone khan ka amaik ame thau bruk hu daong ka bhap bani padang ngak sang. Meng tuk tame ngak lin, adei mboh rai diuk di drei hu makna jang, dak harei dak prong jang.   

Urang taha dalam palei yaok harei tabiak mong iek jalan hu ngak samar drah tapa yaok baoh sang saong ba gauk ramik sang danaok ka nyu siam mekre jang piah mbang tết. Dam dara saong uranaih thei jeng chreih chai kayua hu jalan bahrau, tết ini nao ma-in, nao ngak mbang, pablei salih jeng mbuan laghaih. Dom urang hu sang bahrau ye haok aia meta kayua tết ini, ong amuk, adei sa-ai metai lahik blaoh meda hu raok mai baoh sang bahrau piah mong anek taco mbang tết trei sil meng hu bruk sangka di Đảng, di raja-ei saong bộ đội cụ Hồ. Amuk Lê Thị Móm umo jaik 70 thun, diuk meng bruk ngak yin piah raong taco nội daok sit saneng lac drei daok ndih lapei kayua amuk oh sahneng lac drei hu sang daning kiak mbang tết. Amuk pal tangin chỉ huy tiểu đoàn 312 saong anai phaok Chủ tịch Phường bo druh drui oh ndom jeng panuac ndua dhal phol: Mboh dom sa-ai, dom cei bộ đội glaih glar kayua abih hatai ranam bo ngak ka dahlak yau nan, dahlak thau dhal phol lô. Dahlak urak ini oh hu anek piah ranam,  nan ye dahlak anit dom bộ đội yau anek di drei. Bruk ngak di dom anai, dom cei dahlak thau dar phor dalam hatai. Dahlak jeng likau ka po brei ka dahlak hu ralo pren yava khang kadang piah ka dahlak ngak mbang duah jien raong taco ka nyu jeng manuac jeng urang. Dahlak bak 100 thun taha ye nyu jeng hu sang bahrau piah daok.    

Hu jeng bruk bhian randap, tết quân dân pak bal Cần Thơ gam ngak medeih veik bruk quân dân uan mbang tết avar jang piah nao taong khamang, daong taneh aia dalam mesruh metak, gam ngak brei thun bahrau hu mai tal yaok puk palei, yaok baoh sang kathaot. Gam haong Cần Thơ, thun ini, taong abih quân khu 9 hu ralo puk palei peih ngak tết quân dân yau: mbang tết haong urang kathaot pak Hậu Giang, tết quân dân di bhum tapen negar Tri Tôn (An Giang)…. Pak halei, “tết quân dân” jeng sarak dalam rup binguk “bộ đội cụ Hồ”, bruk sangka iek glang di Đảng, di karja dalam hatai manuac urang ranam taneh aia oh lac bansga halei atau agama halei. Tui nan, bhap bani mboh anit bộ đội jang, ranam Đảng jang saong gul pataom gauk, dak padang puk paga, palei negar dak harei dak siam mekre jang, hadah hadai jang./.