Sang trọ Thành Đạt daok di phường Hưng Thạnh, quận Cái Răng daok daong brei ka labaih 40 urang ruak nduac thận mai meng dom tỉnh ban

Oh kan piah thau hu bruk bui sambai di sa-ai Tạ Thị Huệ, urang ngak, pah labik daok di phường Trà Nóc, quận Bình Thủy haong ong Trần Văn Quới, pah bilik daok di sang trọ ka 29/8D, labik Yên Thượng, phường Lê Bình, quận Cái Răng. Oh bui sambai habar hu, tuk 2 urang nan hu po sang trọ trun meneing jien pah bilik daok kayua kan kandah meng jit Covid-19: “Dahlak duh hatai oh hu jien bayar jien pah bilik, daok kuhria nduac nao palei. Min urak ini po sang trọ lac brei 2 bilan jien pah sang nan ye uan tabuan lo.”, “Po sang trọ biak siam hatai, trun brei 300 rabau sa bilan, diuk pasang dahlak biak thau dhar phor.”

Jeng thau hu dom kan kandah bo urang ngak daok rah tapa, amuk Ðặng Thị Tuyết, urang dang akaok kalup kapul ngak pahla Pambuak Gavang Tangin Praong, po sang hẻm 42/6a, jalan Trần Hoàng Na, quận Ninh Kiều oh mek jien điện, jien ia saong trun brei 10% jien pah labik daok. Lingiu di nan, amuk Tuyết daok bhian brei njam patam, baoh kraoh, pandap mbang piah daong urang pah labik daok sahanag hatai dalam dom harei ban Cần Thơ pa-atah di gauk. Amuk Đặng Thị Tuyết khan lac: “Brah, mì, njam patam… lac dom janih bo menuac pah labik daok di dahlak oh cang blei. Hadei di tuk dahlak ngak yau nan, vil val jeng hu rilo sang trọ hu patagok bruk daong yau nan. Hu menuac blei baoh menuk, ada, hu menuac blei brah brei.”

Jeng lac sa dalam dom sang trọ anit ranam di Cần Thơ labaih 1 bilan ini mai, sang trọ Thành Đạt daok di phường Hưng Thạnh, quận Cái Răng daok daong brei ka labaih 40 urang ruak nduac thận mai meng dom tỉnh ban dalam bhum taneran kraong CL. Jit ruak tamuh tabiak, urang ruak nduac thận gaok rilo kan kandah, abih di nyu lac oh nao palei hu kayua sa adit brei halăng thận 3 mbang. Nan ye urang njauk daok veik sang trọ yaom lac urang halei jeng biak kan kandah, hu menuac praong thun, oh ngak hagait hu piah duah jien. Mboh yau nan, amuk Nguyễn Thị Thanh Nga, po sang trọ Thành Đạt brei trun meteh yaom jien pah bilik daok saong ieu rilo urang ngak pahla daong brei pandap mbang: “Hu menuac raong amaik, menuac raong pasang, menuac raong diuk, mboh yau nan, dalam tuk jit ruak, bilik trọ oh taduan tuai langiu, nan ye daong palagaih ka mikva pah labik daok.”

Sa labik daok trọ oh mek jien jeng hu rilo menuac thau tal dalam dom harei jaik di ini, lac labik sang Hải Sơn - Hải My, di hẻm 172, jalan Lê Hồng Phong, phường Trà Nóc, quận Bình Thủy, kayua diuk pasang sa-ai Trần Hải Sơn ngak po. Menuac pah labik ini rilo meng lac menuac ngak kan kathaot, ngak bruk di labik ngak kong Trà Nóc. Mboh rilo menuac gaok kan kandah dalam tuk pa-atah di gauk, diuk pasang sa-ai Sơn brei trun meteh jien pah sang trọ bilan 7/2021, tal bilan 8, bilan 9 ye brei daok saoh.Tui kuhria, yaok bilan, yaom jien sa-ai Sơn oh mek di mikva lac jaik 20 triệu đồng. Dalam dom harei pa-atah di gauk, sa-ai Sơn daok bhian ba pandap mbang alin brei ka urang pah labik daok. Sa-ai Tạ Văn Cần, palei daok di huyện Phong Điền, pah bilik daok pak ini khan lac: “Jit ruak nan ye padeih suai lavik, rambah lo, oh thau harei halei nao ngak veik. Po sang trọ daong jien pah labik daok bilan 7, 8, 9 saong daok brei brah, brei mì, dahlak uan tabuan lo.”

Sa-ai Trần Hải Sơn, po labik sang trọ Hải Sơn - Hải My brei thau, daong ka menuac sia lac mai meng hatung hatian, jit ruak nan ye thei jeng kan kandah, tok thau trun jien pah labik daok piah urang pah trun meneing duh hatai: “Ngak hu bruk hagait siam ye ngak, oh sahneng hagait, tok lac daong gauk dalam tuk jit ruak. Tapa nan jeng caong dom menuac hu jien padai ye daong gauk jang, menuac haong menuac mboh anit ranam gauk jang, mboh siam mekre jang.”

Hatung hatai siam mekre di dom po sang trọ dalam jit praong hu pambak tabiak oh thau hadom bruk siam mekre. Dom urang nan daok truac hadah tagok dalah pui daong ka urang kan kandah, daong prein dalam bruk mesruh pacang caga jit Covid-19./.

Urang lang: M. Phuong – 28/08