Tapa mbang pasang iek chất lượng anek saih tal bac 12 hệ THPT, Giáo dục thường xuyên thun bac 2020-2021, dom sang bac di ban sit Cần Thơ hu jalan padang bruk ôn thi ka anek saih. Gru Nguyễn Hữu Định, Hiệu trưởng sang bac THPT Thới Lai brei thau: thun bac ini, sang bac hu 637 adei anek saih tal 12 saong jeng lac labik hu rilo anek saih tame pakacah THPT praong abih di ban sit. Tapa pasang iek bruk bac da-a tal 12, hu 27 adei daok dalam kapul pakacah mbuan laik. Sang bac samar brei padang jalan ngak, tacei pato bộ môn haong kapul dam dara sang bac tame daong pato dom adei rilo jang. Dalam tukvak bac veik tui jalan online, 26 dalam 27 adei anek saih yếu, kém, oh hu hagait piah pambuak pagam internet, hu sang bac parabha jeng kapul sit, rami ramik brei bac veik di dom bilik chuyên môn. Gru Nguyễn Hữu Định brei thau: “Urak ini rilo meng pataom tame tacei pato bruk ngak bài. Piah daong ka 26 adei daok bac di sang bac dalam vaktu ini, sang bac hu ngak lisei huac var jala, dom gru tame sang bac daong ka dom adei, ngak siam bruk bac kanal veik”.

Gru Nguyễn Hồng Bảo, Hiệu trưởng sang bac THPT Giai Xuân, huyện Phong Điền jeng khan lac, kayua bruk bac da-a di dom anek saih tuk camereip nyu biar, nan ye meng tuk tame thun bac, sang bac hu kuhria tal bruk pato lingiu tukvak bac piah daong ka anek saih yếu kém. Meng hadei di tuk Mintri Pato Megru tabiak đề minh họa, sang bac hu peih pakacah iek rilo mbang brei ka anek saih pasram. Dalam tukvak jaik tal harei pakacah ini, dom gru bộ môn daok pataom prein piah pato veik tui jalan online brei ka dom adei bac yếu, langyah dom tangi sua tapa kapul “chat” angaok mạng xã hội: “Lingiu dom bài bac veik haong gauk, dom adei ini daok hu dom bài tập. Dom gru hu pasang iek, daong ka dom adei, iek dom adei ngak bài yau habar? Dom bài tập ngak nan mboh naih joi tagok halei oh? Blaoh drei pachreih ba saong daong ka dom adei”.

Thau lac mbang pakacah THPT hu makna biak praong nan ye Sang bac THPT Trần Đại Nghĩa, quận Cái Răng jeng hu jalan ôn thi cambaih laih meng akaok thun bac. Thun ini, sang bac hu jaik 400 anek saih tut angan pakacah. Hadei di mbang pakacah pasang iek prein bac tal 12, sang bac hu taom gaok, ndom biai nao mai haong amaik ame di 22 anek saih mbuan laik mbang pakacah piah pambuak bruk, daong brei saong ba mbuan lagaih ka dom adei ôn thi. Sang bac THPT Trung An, huyện Cờ Đỏ jeng parabha hu 34 anek saih mbuan laik mbang pakacah, hadei di nan ieu pataom, jak ba dom amaik ame di dom anek saih nan brei ka dom adei nao bac oh mek jien di tuk melam, langiu mon bac online di tuk harei. Dom gru brei dom bài sit piah ka dom adei ngak hu chip, tui jalan ngak yau nan bo dom thun tapa, dom anek saih di sang bac pakacah tamat hu labaih 99%.

Ong Nguyễn Hữu Nghĩa, Phakaok akaok jabat pato pakai Trung học, Sở pato Megru ban sit Cần Thơ brei thau: Sở hu ieu dom sang bac yaok pataom, parabha prein bac tui yaok nyaom anek saih piah hu jalan pato veik ka nyu lagaih, oh ngak brei trak damak ka dom adei: “Bruk tui iek di gru pato biak tani tanat, brei bài blaoh pasang iek tapak… piah pabak hu ilamu ka dom adei bac yếu kém. Abih di nyu nan lac, sang bac jeng caik hatai sangka tal dom anek saih naih, joi ye brei paglaong ilamu jang. Drei sangka rilo tal anek saih mbuan laik saong anek saih naih joi piah dui điểm trung bình di ban sit tagok”.

Mbang pakacah tamat THPT thun 2021, ban sit Cần Thơ hu labaih 12.000 anek saih tut angan tame pakacah. Bruk bac veik piah kanal hu tamat di puac bilan 6, piah caik tukvak ka dom adei eng drei bac brei kanal veik. Meng rilo jalan ngak gheih, jia lac dom anek saih meda mek hu rilo siam mekre dalam mbang pakacah praong jaik tal./.

Urang lang: M.Phuong -3/7/2021