Rilo labik peih bruk iek glang ka uranaih dalam harei dunya 1/6

Pan dom pok pandap sit hu salih meng dom sa-ai dalam đoàn phường Cái Khế dalam bruk “Salih nerak mek pandap” bahrau rah tabiak di kreh bilan 5, dom adei anek saih di quận Ninh Kiều, Cần Thơ biak chreih chrai. Ini lac thun ka 2 Đoàn phường Cái Khế peih ngak bruk hu makna ini.

Kayua jit ruak Covid-19, bruk “Salih nerak mek pandap” thun ini rah tabiak dalam labik sit, yaok kapul anek saih mai salih pandap tui mon hu khan brei thau dahlau saong oh hu pataom gauk me-in. Yaom lac yau nan, min dom adei jeng mboh chreih chrai kayua hu alin hadiah dom pandap bac da-a ka thun bac bahrau.

Hadei di 1 mon, mBan peih bruk hu salih 800 pok pandap, mek mai veik hu labaih 1 tấn nerak. Meda lac, bruk ini lac sa dalam dom bruk sangak kuhria ka uraniah hu Hội đồng Đội pakat puk palei ngak hu jak jeng. Kayua lac, lingiu di bruk paglaong hatai sahneng khik caga alam môi trường ka dom adei, 30 adei kan kandah, sang kan kathaot atau jaik si kan kathaot jeng taduan hu 1 pok pandap yaom 200 rabau đồng. Adei Vũ Trọng Toàn, anek saih tal bac 4, sang bac Tiểu học Cái Khế 1, quận Ninh Kiều, drut drui tuk hu alin brei pok pandap “anit ranam”:

"Adei mboh biak bui sambai kayua lac drei hu sangka, tapa nan amaik ame adei jeng hu daong prein, oh nduac jien blei pandap ka adei. Meng pok pandap ini, adei kham merat bac da-a, thun ini adei lac anek saih khá, thun hadei, adei kham merat mek hu angan anek saih naih joi, piah pabak hatai caong di amaik ame, di gru pato".

Piah daong ka dom adei rilo jang, Hội đồng Đội ban sit Cần Thơ hu pambuak bruk jak ba dom gah hu mbaok tame daong ka uraniah sang kan kandah. Di tuk pahadar 80 thun harei padang Đội Thiếu niên Tiền phong Hồ Chí Minh, Hội đồng đội ban Can Thơ hu jao 20 pok jien bac saong pandap ka dom adei sang kan kandah daok di huyện Phong Điền, yaom 400.000 đồng sa pok. Pahadar Harei menek Wa Hồ, Hội đồng Đội TP Cần Thơ jeng hu jao jien bac anit ranam brei dom uraniah sang kan kandah, abih tih lac labaih 146 triệu đồng; peih bruk padang 2 baoh sang khăn quàng đỏ brei ka đội viên sang kan kandah saong jao 1 baoh sang  “khăn quàng đỏ” dalam quận Ô Môn, yaom jaik 200 triệu đồng.

Abih di nyu nan lac, Hội đồng Đội ban Cần Thơ jeng hu peih ngak veik “Sruh radaih caong khin” – 1 bruk bhian randap haong dom adei sit di bhum atah bayah dalam luac 1 thun tapa. Tui sa-ai Phương Tấn Đạt, Phaok Yam ndok Pasak daong anek saih, SV ban Cần Thơ, piah lagaih haong bruk bahrau dalam pacang caga jit ruak Covid-19, “Sruh radaih caong khin” meda salih jalan ngak:

"Danak dak “Sruh radaih caong khin”nao tal labik, brei tal tangin saong nao tal piah klah rabha haong dom adei tapa dom Kapul sinh viên, dom dhar kapul. Tapa nan rik daong pato pakai dom adei thau khik caga rup drei eng, ngak siam saong ngak catang tui  5 paka di Mintri Y tế".

Hội đồng Đội ban Cần Thơ daok hu rilo bruk gheih tacei pato, daong ka uraniah bac pasram veik, bac eng di sang saong peih dom bruk ngak   hu makna brei ka uraniah angaok mạng xã hội. Yau ye Harei pataom dom kapul pathau khan rabung meda, ngan saong kadha “Hukum di kol adei” thun 2021 tui jalan pakacah online. Tui sa-ai Lâm Văn Tân, Phaok chủ tịch Hội đồng Đội ban Cần Thơ, ini lac sa dalam dom bruk piah pathau khan Hukum uraniah thun 2016, daong ka dom adei thau hu quyền hu iek glang, quyền hu ngak bui, me-in sambai:

"Piah ka dom adei thau tal Hukum rilo jang, saong dom adei meda lac dom menuac mai duah thau Hukum, gam haong kapul dom Liên đội, dom Chi đội ngak video clip payua mai saong peih bruk brei thau online angaok mạng. Kol dahlak tacei pato dom Hội đồng Đội quận, huyện pato pasram, paglaong ilamu pacang caga rapeik rapai ka uraniah".

Meda mboh lac, dom bruk sangka kuhria ka uraniah hu peih ngak gam gam, oh lac di tuk 1/6 meda daong prein saong pachreih đội viên, thiếu nhi sang biak kan kandah kham merat yam tapa, yam tagok dalam bac da-a, kham merat jeng urang đoàn saong rahra kein laba ka taneh ia, palei negar. Gam haong nan, rik daong paglaong hatai sahneng mboh di baoh sang, di sang bac saong di abih bol bhap rahra dalam bruk khik caga , iek glang saong pato pakai uraniah./.

Urang lang : Hanipha -1/6