Bruk pato uranaih bhain lac bruk caik  ka urang kamei, yau nan bo rilo thun ni mai jeng dok hu yaok pluh cei gru dok di huyện Mường Tè, tỉnh Lai Châu kandang kandaih, tari tarieng, abih hatai song bruk ngak ni. Labik daok song bruk ngak di dom cei gru nan lac dom bhum atah bayah kan kandah abih janih. Min oh ka urang halei klak bac, klak anek saih atau hu panuac mbuah kan. Hadei di dom harei padeih tết, hu taom gaok boh sang, gauk gar, dom cei gru gilac mai sang bac piah piah peih akaok thun bahrau meng bruk bhain randap di drei. Khắc Kiên, urang vak di rayo sap ndom VN dok di bhum Tây Bắc hu kadha vak “Gru pato mầm non di angaok tabung ceik ia kakua”.

Harei akaok thun bahrau, bruk bhian randap di cei gru Lường Văn Mạnh, gru pato di sang bac Đầu Nậm Xả, xã Bum Tở, huyện Mường Tè, tỉnh Lai Châu nan lac nao tal yaok sang piah ba uranaih tal sang bac. Hadei di tuk vak padeih lavik harei, sahneng lac bruk ba uranaih nao tal tal bac meda gaok kan kandah, min harei ni patuah jang, gru Mạnh abih jiak sa tuk piah pataom hu tong abih uranaih hu mbaok di sang bac. Piah hu ginup uranaih nao bac dalam harei camereip di thun bahrau, gru Mạnh hu mbaok di sang bac dahlau di nan 2 harei piah puh ramik tal bac song nao tal yaok boh sang piah jak ba amaik ame “khik takai uranaih”, oh caik ka dom adei tui amaik ame nao hamu, nao glai.

Labik sang bac di gru Mạnh dok di angaok tabung ceik glong, lac sa dalam dom labik sang bac kan kandah di abih dalam xã Bum Tở, kayua kurang ia pandar. Piah hu ginup ia pandar ka labaih 24 adei anek saih di drei, yaok harei, hadei di tuk pato, gru Mạnh trun chraoh atah di nan dom rituh mét naong yaok thung ia. Langiu di nan, gru dok mek ia ginup ka 4 anai gru di labik sang bac piah pandar, kayua gru lac urang likei di labik ni. Bruk ngak glaeih glar, kan kandah yau nan, min oh ka mbang halei gru mboh klaak bruk. Gru Lường Văn Mạnh khan lac:

Kan kandah jeng hu hasit, kayua oh ka thau cambaih sap ndom nyai di dom kamuan. Doh tamia song hacih saat rup thaik ka dom kamuan ye adei jeng gaok kan kandah hasit  kayua adei lac anek likei, oh hu siam yau dom anai gru. Adei jeng kham merat ngak ka nyu siam jang, ngak ha-mbang hasit piah lagaih haong bruk di drei, piah ka dom adei hu yau dom tal bac di dom anai gru.

Hu mboh bruk palua abih hatai tuk uranaih haiy, tuk tamia tuk pato doh, tuk iek glang ka dom adei huak lisei ia, meng mboh bruk ngak “oh lah urang halei” di dom cei gru raong pato uranaih di labik ini. Gam song gru Mạnh, di sang bac mầm non 1 Bum Tở dok hu sa gru pato karei pato di labik sang bac Pa Thoóng. Ni lac 2 labik kan kandah di abih dalam xã, min yau dom labik sang bac karei, meng hatai anit ka bruk ngak, ranam ka uranaih di drei, dom thun tapa tal bac kayua dom cei gru raong pato chất lượng oh lah hagait tal bac di dom anai gru. Anai gru Vũ Thị Hường, Akaok sang bac mầm non ka sa Bum Tở brei thau:

Sang bac urak ni hu 22 gru pato, dalam nan hu 2 cei gru. Dua cei gru pato di palei atah bayah, bruk nao mai biak kan kandah. Ngan song cei gru dalam tuk pato dok gaok rilo kan kandah, pagap yau bruk pato tamia njauk tuk dom cei gru dok melau. Sang bac hu pachreih dom cei gru bac sap bangsa piah paglong chất lượng pato song bac ka sang bac.

Dom labik sang bac oh hu điện, oh hu ia, jalan mbak nao mai kan kandah, cơ sở vật chất kurang sap janih oh lac takik ngan song huyện bhum ceik Mường Tè. Piah khik chất lượng pato pakai dalam tuk daok kan kandah, abih di nyu nan lac di dom labik pato bhum atah bayah, rilo thun ni mai, gah pato megru huyện bhian pachreih dom gru pato hu pren yava, khang hatai song bruk ngak, halan hatain dok di puk palei. Cei Gru pato tiểu học di labik ni biak takik, yau nan ye cei gru pato mầm non dak kan duah jang. Urak ni, di huyện Mường Tè hu 25 cei gru pato mầm non dok di dom xã kan kandah bhum atah bayah yau  Tà Tổng, Pa Ủ, Nậm Trà, Ka Lăng, Tá Pạ. Di dom labik nan oh lac kurang điện, kurang ia bo sang bac, bàn, khage jeng biak kurang, biak takik. Rilo labik, tal bac hu ngak meng kreim, la-a, tabung tauk hala saong pandap bac yaok harei di dom adei kayua dom cei gru ngak tabiak .

Tong yaom ka chất lượng dom tal bac mầm non kayua dom cei gru dang pato, muk  Lý Mỹ Ly, Trưởng phòng pato megru huyện Mường Tè brei thau:

Kan kandah di gru pato mầm non nan lac dom cei gam ba dom adei bloh iek glang rao mbaok meta tangin takai. Abih di nyu nan lac bruk pato mầm non brei hu sap ndom panuac puac li-ar bingi, min urang likei ye nyu khang jang. Anak meta, dom cei gru hu năng khiếu, abih hatai jai ye ngak hu tong abih dom bruk bo anai gru bhian ngak, chất lượng jeng hu siam mekre. Sahneng tal harei hadei umo dom cei gru tuk taha ye gleih glar tuk dok pato uranaih.

Yam tapa hu dom kan kandah di dom cei gru pato mầm non, dom harei akaok thun ni, dom cei gru jeng dok kham kak kajap haong sang bac, tal bac pala dom asar hijao di angaok dom tabung ceik Tây Bắc. Likau haong pô brei ka dom cei gru hu khang kajap pren yava, tuk halei jeng abih hatai takre ka bruk ngak, kayua harei hadei hadah hadai di anek kamuan bhap bini dom bangsa daok di labik ni./.