Anak bruk Trung Quốc padang giàn khoan Hải Dương 981  suan adat hukum dalam bhum tasik Việt Nam,  oh tuk halei yau tuk ini, bruk tự hào bangsa, hatai ranam taneh aia daok pamedeih tagok dalam taong abih bhap bani. Oh padeih di sap ndom phản đối, hatai ranam taneh aia daok brei mboh meng dom bruk ngak mboh di anak meta, biak hu makna, taong abih piah khik caga quyền ngak pô di taneh aia. Lễ chào cờ biak karei di akaok adit page harei Som meng blaoh, harei 12.5 pak sa baoh sang bac di Đồng Nai nan lac bruk ngak biak hu makna nan. Nyaom urang vak di Rayo papar sap papar binguk tỉnh Đồng Nai brei thau: 

Oh yau dom mbang dahlau, van chào cờ akaok adit ini di acei gru anai gru saong labaih 800 anek saih sang bac pakat sa, pakat dua pakat klau Lê Quý Đôn tỉnh Đồng Nai biak karei jang. Blah bản đồ thaik akhar S gam haong dua baoh pulao Trường Sa, Hoàng Sa hu dak meng dom anek saih. Kadha daoh Quốc ca daoh tagok sa mbang tra, brei mboh quyền ngak pô pulao kaoh di Việt Nam ngan haong dua baoh pulao Trường Sa saong Hoàng Sa. Adei Cao Trần Thành Trung – anek saih sang bac tiểu học –Trung học cơ sở – Trung học Phổ thông Lê Quý Đôn – bal Biên Hòa, tỉnh Đồng Nai ndom lac: “Lac sa anek saih, adei kham merat rik daong pren sit sot di drei brei ka taneh aia palei negar saong kham merat khik ramik bhum taneh bo ong amuk ong kei drei dak padang blaoh”.

         Anak bruk ngang ngược di Trung Quốc ba giàn khoan Hải Dương 981 tame bhum tasik di Việt Nam dalam dom harei ini ye bruk ngak hu yaom ini piah pato pakai anek saih ka chủ quyền pulao tasik, ka hatai tự hào bangsa saong hatai ranam taneh aia, oh taduan lah kol khamang halei. Sa-ai Đoàn Công Hiếu - Phaok Bí thư Đoàn sang bac tiểu học, Trung học cơ sở, Trung học Phổ thông Lê Quý Đôn – bal Biên Hòa tỉnh Đồng Nai brei thau: “Dalam dom harei ini gam haong grauk labik dalam negar pamong tal bhum tasik, harei ini gru saih sang bac Lê Quý Đôn hu peih van chào cờ akaok adit saong van chào cờ ini karei jang dom van karei. Nan lac sa mbang tra brei mboh pulao kaoh Hoàng Sa saong Trường Sa nan di Việt Nam. Tapa nan caong khin pato pakai dom anek saih hatai tự hào bangsa, hatai ranam taneh aia piah hadei ini dom adei gam haong dom rairah bhap bani dang tagok khik ramik bhum taneh di taneh aia Việt Nam.”

      Pamong tal pulao tasik, dalam van chào cờ, taong abih urang jakar saong anek saih sang bac Lê Quý Đôn hu rik daong 50 triệu đồng ka danak dak “ba tangin tame khik caga quyền ngak po di bhum tasik” kayua Harak báo Tuổi Trẻ bal raya Hồ Chí Minh peih tabiak. Bruk ngak nan di gru saih sang bac hu daong tame sap ndom phản đối bruk  cagar daluan di Trung Quốc, taphia di nan payua panuac ndom tal urang jakar, urang lin labik pulao kaoh lac, bhap bani pak ini tuk halei jeng nao gam haong dom sa-ai, abih hatai khik caga quyền ngak pô pulao tasik di Việt Nam./.