Gah kamei duah pasang brei ka anek, pasang likei mai daok gah sang diuk saong anek kamei meng hu mbang varis, nan lac kadha brei mboh bruk tui darah gah amaik di bangsa Chăm bhum kreih negar. Tal urak ini, jeng daok khik adat cambat meng kan yau nan di bhum kreih negar, bruk tui darah gah amaik jeng daok khik dalam rai diuk di bhap bini bangsa Chăm. Min asal di nyu hu ralo salih barau. Amuk Nguyễn Thị Trang, palei Phước Nhơn 3, xã Xuân Hải, huyện Ninh Hải, tỉnh Ninh Thuận lac:

 “Dahlau daih, khin quyết định bruk hagait dalam baoh sang, urang likei brei sua urang kamei dahlau. Urak ini hu salih barau ye, yaok bruk dua diuk pasang jeng ginum bloh quyết định”.

Adat cambat tanarakun di bangsa Chăm bhum kreih negar tui darah gah amaik quy định lac: dalam sang, varis hu ka urang kamei. Sang gah kamei ngak lakhah pasang brei ka anek saong pasang likei mai daok gah sang diuk. Darah di anek bhik jeng hu kuhria tui darah gah amaik. Bruk ngoại hôn brei kuhria tui darah gah amaik, meyah vi phạm bruk ini njauk tội loạn luân. Bruk ngak saong labik dang di urang kamei dalam xã hội tuk halei jeng hu iek praong saong hu tính quyết định duk saong urang likei. Meyah diuk metai bo gah diuk oh hu menuac piah pambuak bruk ngak diuk ye urang pasang nan brei mai veik but pajaih di drei saong dua plak tangin saoh, oh hu anek bhik, oh hu drap ar. Adat ini urak ini jeng daok khik.

Ong Imâm Dương Điệp di sang megik Islam Chăm Bani palei Phước Nhơn, tỉnh Ninh Thuận brei thau:

“Gam saong bruk nao tagok di rai diuk kinh tế xã hội di bhap bini Chăm saong bruk giao thoa ilamu saong dom bangsa karei, jeng hu bruk salih barau min chế độ mẫu hệ jeng daok hu khik veik”.

Dahlau daih jeng yau urak ini, ngan saong bhap bini bangsa Chăm tui darah gah amaik, labik dang di urang kamei oh lac brei mboh dalam baoh sang bo daok mboh di lingiu xã hội. Kayua yau nan ye, khik ramik ilamu ini nyu rik daong ka bruk khik ramik ilamu meng kan hadah krah, brei mboh bruk iek praong urang kamei di bangsa Chăm bhum kreih negar./.