Dalam bruk bac da-a, Wa hu pato kakei anek saih, sinh viên gam lac dam dara Việt Nam, Wa lac: “Ngak bruk hagait jeng brei bac” saong bac piah “paglaong pren ngak ka kinh tế patagok, mesruh metak jayah, raidiuk bhap bini dak harei dak trei sir, bui sambai”. Kadha nan hu makna lac, ngan saong dam dara oh hu bac đại học, cao đẳng, ye bruk bac tuk halei jeng lac bruk biak praong. Bac meng dom tal pato bruk ngak, bac meng ilamu diukrai, meng urang nao dahlau, bac eng… piah paglaong jalan diukrai siam mekre, pabak ilamu ngak bruk, pandar hu ilamu tame bruk pala drak saong ngak mbang kinh tế piah ngak kaya meda ka rup drei jeng yau ka  xã hội.

 Chủ tịch Hồ Chí Minh jeng hu pato kakei anek saih, sinh viên lac, piah ka bruk bac da-a hu siam mekre saong jeng urang kein laba, ye bac brei nao gam haong ngak, lý thuyết brei nao gam haong thực tiễn. Wa lac: “Tok thau lý luận (lý thuyết) bo oh thau thực hành ye lac trí thức hu meteh. Kayua yau nan ye dom kamuan dalam tuk bac gah lý luận brei pambuak haong thực hành”, “lý luận brei pambuak pagam haong bruk biak”. Taphia nan, Wa hu kakei dom sang bac “jhui pato tabiak dom menuac urang tok kanal tabuk”….Wa daok ndom lac “Brei ngak bruk, ngak bruk meng glo akaok saong ngak bruk meng takai tangin. Saong brei ngak bruk meng glo akaok gam ngak bruk meng tangin takai, makna lac ngak bruk meng takai tangin jeng brei hu ilamu, menuac ngak bruk glo akaok jeng brei thau ngak bruk meng takai tangin. Meyah ngak bruk glo akaok oh ngak hu bruk takai tangin saong ngak bruk takai tangin oh hu akaok sahneng ye urang ngak yau metai meteh rup…”. Kadha nan hu makna lac anek saih, sinh viên oh lac bac ilamu tapa harak tapuk saoh, bo brei thau paglaong pren ngak, thau pandar 2 plak tangin piah ngak hu dom ilamu hu bac megru bloh. Piah ngak hu kadha ini, sang bac saong dom pakat khik ramik pato megru njauk palagaih ka anek saih, sinh viên hu thực hành, hu ngak iek rilo jang, bhian brei ka dom adei nao rivang iek, ngak iek dalam dom sang mac, xí nghiệp sản xuất; pambuak bruk khang kajap di sang bac haong doanh nghiệp piah pato tabiak hu urang ngak hu ilamu lagaih haong bruk sản xuất. Meng dom langyah yau nan, kol drei meda mboh lac, jalan sahneng saong panuac kakei di Wa jeng daok tamo yaom glaong, nan lac yaom glaong ka jalan pato saong bac njauk haong bruk biak, bac brei nao gam haong ngak, kiến thức brei nao gam haong kỹ năng.

Lingiu bruk bac megru, paglaong ilamu, Chủ tịch Hồ Chí Minh daok hu kakei dam dara urang daok ranaih brei bhian pasram,, tu dưỡng phẩm chất, đạo đức, jalan diukrai. Wa lac: “Hu tài bo oh hu đức lac menuac oh pandar hu”. “Đức”, di labik ini yau Wa lac đạo đức, jalan ngak menuac bo ngan saong saman kol drei, Wa pandar pasram piah hu đạo đức cách mạng. Wa langyah lac, đạo đức cách mạng biak mbuan, biak cambaih laih: “Đạo đức cách mạng oh lac meng angaok langik laik trun. Nyu mai meng đấu tranh, pasram megru yaok harei bo patagok saong khang kajap. Nyu yau intan dak sah dak jangaih”. Wa iek “đạo đức lac gha di urang cách mạng” saong Wa ba tabiak jalan kham merat, pasram jalan đạo đức cách mạng: “Brei njom tame dalam rup đạo đức cách mạng, nan lac bac megru, ngak bruk, ndom puac daok dang tui njauk đạo đức di thanh niên xã hội chủ nghĩa, cộng sản chủ nghĩa”, “Piah ngak siam bruk di drei, dam dara brei paglaong bruk ngak po tập thể, tah klaak chủ nghĩa cá nhân, jhui phô trương hình thức, jhui kiêu ngạo tự mãn”.

Piah tah klaak chủ nghĩa các nhân, Wa tacei lac: “Khin pasiam chủ nghĩa cá nhân, ye tuk ngak sa bruk hagait, jhui sahneng tal drei dahlau, bo njauk sahneng tal bhap bini, tal bol bhap rah rahra dahlau. Drei hu kadha lac: “kan kandah glaih glar ye drei njauk nao dahlau, tuk hưởng thụ ye drei njauk nao hadei”; ngak bruk hagait jeng brei sahneng tal bhap bini dahlau saong sahneng tal rup drei hadei.

Hadar panuac pato di Wa praong uranam, yaok rai anek saih, sinh viên Việt Nam “brei thau tự lực, tự cường, tự lập; brei hu hatai khin ngak bruk, oh khin praong mbaok meta, ngak bruk hagait brei ngak ka nyu tal labik, tal dhua, ngak ka pahu; brei hu hatai kham merat, khin bac megru, bac megru miat. Bac akhar haroh, bac ilamu, bac chính trị, bac bruk ngak..”; dom urang khik iek pato megru, dom cei gru, nai gru, lac dom urang hu labik dang biak praong dalam bruk pala menuac, njauk hadar kanal dalam hatai dom panuac Wa kakei, maong nan yau jalan piah pato pakai, piah ba bruk pato megru di taneh ia patagok siam saong khang kajap, rik pren tame bruk công nghiệp hóa – hiện đại hóa taneh ia, dak padang sa taneh ia Việt Nam khang kajap, kaya meda, dân chủ, công bằng saong văn minh./.