Ong Đoàn Xuân Thu, palei 4, xã Bình Hòa, huyện K rông Ana, tỉnh Đắc Lắc tuk hadar veik rai diuk di baoh sang drei dom thun dahlau, yau daok mboh di anak meta dom kan kandah, glaih glar. Tuk nan,  sang ong diuk rai meng bruk ngak mbang pah. Kayua oh hu bruk ngak tani tanat, kurang anak kurang likuk, sang ong bhian puac mesao gauk. Thun 2010, pasak pato bruk ngak huyện Krong Ana jak ba ong tame bac bruk pala bimao pon tui đề án pato bruk ngak palei pala. Hadei di tuk bac salah bloh khóa bac, ong nao mesraiy jien di ayut piah pala bimao di sang. Tuk camereip sang ong tok pabam jaik 100 bầu bimao sa bilan, tal urak ini, trại bimao di ong pala tal 3 ribau bầu sa bilan, jien laba jaik 100 triệu đồng yaok thun. Ong Đoàn Xuân Thu chreih chrai khan lac:

 “Dahlau daih tuk oh ka bac bruk ngak diuk pasang dahlak ngak mbang pah oh ginup jien ka anek mbang bac. Meng harei dahlak hu pasak pato pala bimao, meng hatai takre saong mboh hu kein laba nan ye meng harei nan tal urak ini jien mek tame di dahlak tani tanat, anek bhik hu nao bac tal labik tal thua. Urak ini padang hu sa baoh sang, blei hu radaih, yaok bilan jien mek tame takik di aabih jeng hu 7 - 8 triệu đồng”

Sang ong Thu lac sa dalam yaok ribau baoh sang yam tagok truh kan kathaot hadei di tuk hu mbaok tame đề án 1956 di rajaei ka pato bruk ngak ka urang ngak palei pala. Hadei di 5 thun peih ngak đề án, tỉnh Đắc Lắc hu daong pato bruk ngak ka labaih 13.700 urang ngak ngan saong yaom jien labaih 37 tỷ đồng. Tal urak ini, hu jaik 10.000 urang ngak tapa pato bruk ngak hu bruk ngak barau, atau daok ngak bruk klak min năng suất, jien mek tame glaong jang, rik daong patrun baoh sang kan kathaaot daok 9,6%

Tỉnh Đắc Lắc ba tabiak jalan ngak lac: oh pato bruk ngak chung chung bo iek tui bruk caong hu di puk palei bo dom pasak pato bruk ngak  peih tal bac dom bruk yau: pala bimao, padang ngak, jhik công nghiệp di huyện K rong Ana; pala ameraih kalu, cơ khí di huyện Cư Mgar, raong limo di huyện MĐrăk… dom pasak pato bruk ngak daok hu tacei bruk ngak, ba bruk ngak ka jurang bac hadei  di tuk bac bloh. Hu tuk, rilo pasak pato bruk ngak hu jeng labik pambuak bruk pablei pandap di urang nông saong doanh nghiệp. yau pasak pato bruk ngak huyện K rông Ana dom thun ini mai hu peih danak dak mboh tangin sanya blei bimao linh chi saong bimao pon di urang nông. Yaok thun pasak hu daong ka bhap bini pablei 300 tấn bimao dom janih. Amuk Đinh Thị Danh, giám đốc pasak pato bruk ngak huyện K rông Ana brei thau:

 “Pato bruk ngak oh lac pato brei thau bruk bo pato gam jalan ndom puac dalam bruk ngak, atau lac dom talei pambuak bruk di urang nông dalam patagok bruk ngak di drei. Abih di nyu nan lac ngan saong dam dara. Tapa pato bruk ngak barau,  hu daong paglaong akaok sahneng ka urang nông kayua urang nông meng lavik mai takik hu pato bruk ngak. Ka dua nan lac ngak brei medeih tagok hatai caong yam tagok ngak kaya meda, pandar dom nguyên liệu hu mbiah atau  dom điều kiện di puk aplei drei piah patagok dom bruk ngak hu kein laba jang”.

 “Peih ngak hu kein laba dom đề án pato bruk ngak ka urang ngak palei pala nan lac jalan nao njauk piah rik daong paglaong chất lượng urang ngak. Đắc Lắc kham merat tal thun 2020, 70% urang ngak palei pala hu pato bruk ngak saong urang duah hu bruk ngak nan lac 85%. Piah ngak hu yau nan, tỉnh Đác Lắc daok jhul pakhang bruk peih ngak đề án 1956, dalam nan ưu tiên pato bruk ngak ka urang sang kathaot, sang jaik si kan kathaot, urang joh jo, urang bangsa takik, urang ngak lac urang kamei, urang dalam saraak karja pambuak saong caong hu urang ngak di puk palei. Amuk Phạm Thị Loan, akaok duk pato bruk ngak, sở lao động – thương binh saong xã hội tỉnh Đắc Lắc brei thau:

 “Jalan ngak anak tal gah lao động– thương binh saong xã hội hu pabak sarak brei mesraiy jien duah bruk ngak hadei di bac bruk ngak saong abih di nyu nan lac gah lao động hu harak tacei pato dom huyện ka bruk pato bruk ngak ưu tiên ka 19 xã kan kathaot di dom huyện dalam tỉnh piah dom urang kan kathaot hu tame bac bruk ngak piah ba bruk ngak saong patruh kan kathaot”.

Peih bruk padang ngaak palei pala barau, kadha praong nan lac patagok năng suất urang ngak bhum palei pala. Tok hu jalan bac bruk ngak, eng drei pabak dom ilamu, kỹ năng công nghệ barau ye urang nông saong dam dara palei pala meng patagok hu labik dang di drei dalam tuk padang ngak palei pala barau./.