Thun ini umo 13 thun, min kamuan Y Kiên Ê Ban, daok di palei 7, xã Chư Ê Bua, ban sit Buôn Ma Thuột tok trak 10 kg, rup lavang lavaih, tangin takai ndaong talang, ndih di labik, oh megei nao mai hu. Saai H Duyl Ê’Ban, amaik kamuan Y Kiên brei thau, kamuan njauk yau ini meng tuk barau ndih tapui, rup thaik lamin lamuac, taong abih bruk sinh hoạt di Y Kiên kayua saai abih. Meng sit tal urak ini, bilan halei saai jeng ba anek tame sang ndih iek ruak. Anek ka 2 di saai jeng bhian ruak kik. Jien ndo dalam sang tuh abih tame jru tavao, tame sang iek ruak. Kinh tế biak kan kandah, pasang saai nao ngak rilo bruk piah nduac brah yaok harei. Saai H Duyl lac:

“Kamuan thun halei jeng nao tal sang iek ruak, nao sang iek ruak sa tal 2 bilan, jabar ini ruak ye adei nyu jeng ruak tui. Adei nyu daok di sang langvang lavaih lo. Taneh oh hu, ta-eng pasang nao ngak raong 3 amaik anek daok di sang. Pasang duah hu harei lei  mbang abih harei nan”.

Saai H Tlưch Ayun, daok di palei Táh A, xã Ea Drơng, huyện Chư Mgar, metui amaik ame meng sit. Tuk praong tagok, saai tok pasang saong ndih tapui hu sa urang anek likei. Min urang pasang klak nao, caik veik saai saong Y Pin – anek likei thun ini umo jaik 3 thun bo oh ka thau ndom, oh ka thau kabak, nyu ndih di labik. Anit ka anek min saai njauk payua anek ka adei saai dalam palei piah nao ngak pah duah jien mbang ka dua anek amaik. Saai H Tlưch lac:

“Dalam sang daok dua anek amiak. Anek drei umo jaik 3 thun bo oh ka thau ndom, oh ka thau kabak. Hu harei drei ba anek nao tui min dom harei ini payua ka dom adei saai dalam palei iek brei piah nao ngak. Jeng khin hu tani tanat piah yam tagok bo oh thau ngak yau habar, nao ngak hu harei halei thau harei nan:.

Y Kiên saong Y Pin nan lac 2 dalam biak ralo uranaih joh jo gaok biak kan kandah di tỉnh Đắc Lắc. yaom lac hu daong meng dom đơn vị bảo trợ, karja palei min baoh sang dom kamuan daok biak kan kandah”. 

Tukvak tapa, dom jabat khik caga, iek glang uranaih dalam tỉnh yau: kadung jien daong uranaih, kapul daong urang joh jo saong uranaih metui medhua, kapul chữ thập đỏ dom pakat… hu pambuak bruk peih ralo bruk ngak piah khik caga, iek glang, daong ka uranaih gaok biak kan kandah, uranaih metui medhua, joh jo. Yau dalam thun 2014, kadung jien daong uranaih tỉnh Đắc Lắc hu jak ba daong meng pandap saong jien jaik 10 tỉ đồng, daong blac daraih brei saoh ka jaik 100 kamuan njauk ruak baoh hataai, mbaik cambuai, hở hàm ếch; daong labaih 600 paok jien bac yam tapa kan kandah. Meng thun 2010 tal urak ini, kapul daong urang joh jo saong uranaih metui medhua tỉnh Đắc Lắc hu dang tabiak, jak ba daong hu jaik 15 tấn brah, alin hadiah 15 drei limo, yaok rituh gu pabui pajaih ka dom baoh sang kan kathaot raong uranaih metui medhua, uranaih joh jo, duah thau saong daong labaih 600 paok jien bac, labaih 300 sruh radaih juak brei ka dom kamuan metui medhua, joh jo gaok biak kan kandah yam tagok dalam bac daa.

 Dom bruk daong di dom kapul nyaom xã hội hu daong ka ralo uranaih yam tapa kan kandah, ruak kik, ba drei tame bhap bini. Min, dom uranaih hu daong, hu mbang tui dom danak dak, dom dự án oh ka hu ralo saong bruk daong ini jeng daok takik duk saong bruk di anak meta. Amuk Nguyễn Thị Vân, akaok kapul daong urang joh jo saong uranaih metui medhua tỉnh Đắc Lắc brei thau: 

 “Dahlak mboh Đảng, karja saong dom kapul nyaom xã hội biak sangka daong min biak di nyu duk saong bruk di anak meta ye oh ka ginup. Dom jabat, kapul nyaom, dom urang ngak pahala hu daong biak ralo, min bruk daong urak ini di kol drei lac bahrau daong dom bruk yau mbang menyu min. Daok daong piah ka urang raong hu dom urang nan jeng hu min oh ka ralo. Urak ini XH drei hu ralo kapul nyaom jak ba oh lac ta-eng sa kapul nyaom halei. Kayua yau nan ye, sa urang ngak pahala bo 5,7 kapul jak ba ye lac bruk daong meda gaok kan kandah”.

Tỉnh Đắc Lắc urak ini hu jaik 9.700 uranaih metui medhua saong jaik 11 ribau uranaih joh jo, uranaih njauk njom jru mek klik kruoc Dioxin. Dalam nan bahrau hu jaik 1.000 uranaih hu tame dom cơ sở raong ba saong dom pasak iek glang, bảo trợ XH. Daok veik, dom kamuan jeng daok dalam baoh sang di palei pala, bhum atah bayah saong hu rai diuk biak kan kandah. Kayua yau nan ye, biak caong hu bruk ba tangin tame di bhap bini piah daong ka dom adei hu rai diuk siam mekre jang./.