Đắc Lắc njauk duah bruk ngak barau ka palei cuh dang di Ea Bar – Buôn Đôn

 bruk cuh ngak dang di xã Ea Bar, huyện Buôn Đôn, tỉnh Đắc Lắc hu meng jaik 30 thun ini mai, bhapbini daok dang anak bruk mbuan njom nerak alam môi truong khang kayua thak saong dhur dang. Dom thun tapa, karja saong gah chuc nang hu peih bruk salih bruk ngak min oh ka hu siam lagaih. Samar hu daong salih bruk ngak, lac caong khin di bhapbini Ea Bar. Kadha vak di urang vak di rayo sap ndom VN daok di bhum Tây Nguyên hu ndom ka bruk ini, daa mikva saong grauk yut tui pang :

Bruk cuh ngak dang di xã Ea Bar, huyện Buôn Đôn, tỉnh Đắc Lắc pataom rilo di palei 6 saong palei 7. Tui kuhria barau abih di Ea Bar urak ini hu jaik  70 lò cuh daok ngak bruk. Tame bilan hajan, dom lò ini ngak takik jang bilan thu min barau nao tal akaok palei ye mùi khiak, hang di kayau cuh par tame dhung, athak par bak puk palei. Di mblang taneh praong jaik 200m vuông, sang saai Nguyệt daok cuh 3 lò dang, pasang saai daok pagaik njuh piah dak tame lò daok veik. Yaom lac athak saong mùi khiak dalam khong khi, saai Nguyet saong dom urang anek jeng daok dak njuh tame lò bo oh hu khẩu trang atau pandap bảo hộ lao động halei. Saai Nguyet brei thau, mblang taneh ini sang saai pah piah cuh dang, yaok lò njauk bayan 140 rabau dong jien pah taneh, blaoh jien blei njuh meng labik karei pajeng mai, kong ngak bruk ye diuk pasang saong anek bhik ngak eng. Anak bruk mehit lac karja palei pakauk oh brei ka bhapbini cuh ngak dang dalam labik bhapbini daok, saai Nguuyet biak duh hatai kayua abih urang dalam sang oh thau diuk meng bruk hagait : Pakauk di ini njauk daong bruk karei ka bhapbini, oh hu hagait ngak, mek hagait bo diuk. Anaek dahlak sit bo dahlak jeng mek ngak, 10 thun hadom, urak ini pah menuac ngak  oh hu jien laba piah mbang”

Sang saai Hòa jeng ngak 2 lò dang. Gam saong bruk duh hatai di dom sang ngak buk ini, sang saai jeng oh ka thau ngak hagait piah duah mbang tuk karja palei oh brei  cuh ngak dang pak ini. Saai Hòa ndom lac : Bhapbini urak ini njuh jeng nao blei oh lac nao mek mai, urang taha lac ruak taha, uranaih ye ruak ranaih, phun kayau oh praong hu. Caong khin hu hamu, apuh, brei ka sa sang hadom nan urang meng oh ngak bruk ini, daok urak ini jien mek tame oh hu njauk ngak habal”

Saai Lê Quang Định jeng diuk meng bruk cuh ngak dang meng jaik pluh thun ini mai, min tok lac nao ngak pah. Saai brei thau, harei ngak di saai hu bayan 150 rabau, harei harei njauk gaok dhur dang saong thak độc hại biak jhak ka pren yava min jeng njauk ngak piah raong sang :Dahlak oh hu puh hamu hagiat, mbang blaoh nao ngak pah min, thei ieu ye ngak. Pak ini urak ini ndom biak nao mikva rambah, diuk rai meng bruk cuh dang ini meng kan mai paje. Dom thun ini mai pakat angaok mai yah rilo mbang bo oh hu. Menuac sia rilo, taneh riya oh hu, meng di nan mikva diuk rai meng bruk ngak ini.

Bruk njauk ndom nan lac dom sang cuh ngak dang di xã Ea Bar oh pataom tame sa labik bo daok grauk labik dalam palei, urang ngak praong ye pah taneh, urang ngak takik ye cuh lò dalam bein sang di drei. Yau nan ye dalam palei tuk halei jeng bak athak, dhur, pren yava bhapbini dalam palei saong dom bhum jaik taphia gaok kan kandah praong, abih di nyu nan lac urang taha saong uranaih. Saai Nguyễn Tấn Sang ndom lac : Biak  kan suak yava, pacang  bạt ka nyu takik veik bo urang jeng oh pacang. Kan daok lo, thak ginup abih. Sa thun oh thau hu hadom jien bạt bo oh ciuk noi. Pak ini urak ini hu dua lò, min tuk 6 lò gam cuh ye uranaih patuk luac harei, hit gaok thak ini ye njauk viêm xoang. Palei ini bo pakauk bruk ini jeng gaok srau kadau, abih 90% ngak bruk ini, njauk pataom  ngak di sa labik praong atau hu jalan langyah ka nyu tani tanat.

Ea Bar hu ruah lac xã điểm padang ngak palei pala barau di tỉnh Đắc Lắc, tal tukvak ini, xã ngak hu 14 dalam abih tih 19 tiêu chí. Dalam 5 tiêu chí oh ka ngak hu, hu tieu chi alam moi truong, yau nan ye karja xã khang hatai oh brei ka bhapbini cuh ngak dang di labik bhapbini daok dalam tukvak tal. Ông Trần Văn Toàn, akaok uy mban bhapbini xã Ea Bar, huyện Buôn Đôn, tỉnh Đắc Lắc brei thau  :Bruk kan abih lac tuk jak ba dom sang ini njauk hu sarak piah ka urang salih tapa bruk pala drak, raong glang atau lac dom bruk karei piah ka dom urang nan  klak bruk cuh ngak dang ini.

Dalam tuk oh hu taneh pala drak, caong khin urak ini di bhapbini lac samar hu daong piah salih tapa bruk ngak hu jien mek tame tani tanat. Dahlau diah pasak pachreih công tỉnh Đắc Lắc jeng hu danakdak daong bruk ngak tapei racam di ini, min ngak sit saong urak ini daok gaok kan kandah dalam bruk pablei tabiak. Karja palei njauk hu bruk pasang iek, taong yaom piah duah jalan nao lagaih ka raidiuk di bhapbini daok ngak bruk cuh ngak dang di xã Ea Bar, huyện Buôn Đôn, tỉnh Đắc Lắc./