Pato patoa taong chieng ka dom  uraniah bangsa takik di Dak Lak hu dom gah chức năng caik hatai sangka dalam rilo thun tapa, piah khik ramik saong cak rok patagok ilamu meng kan di uarng bangsa takik di Tay Nguyen. Min bruk nan oh ka hu peih ngak samu gauk di dom puk pale. Lingiu di bruk takik caik hatai sangka di bhap bini, karja jeng oh ka hu jalan ngak siam dalam bruk khik ramik ilamu kong chieng. Kadha vak di urang vak di Rayo sao ndem Viet Namdaok pak bhum Tay Nguyen brei thau ka bruk nan di xã Yang Mao, huyện Krông Bông, tỉnh Dak Lak.

Y Mul Êban umo labaih 20 thun, lac mbi thư chi đoan palei mbon Tul min oh ka mbang halei hu mbaok tame kapul chieng di palei kayua Y Mul oh hu bac taong chieng. Kapul dam dara hu jaik 30 urang ndoan, tuk hu dom bruk ngak di chi ndoan ye langiu taong mbanh, caoh mbanh, dom ayut taom gauk daoh dom kadha daoh bahrau urak ini. Main taong chieng oh ka mboh hu dalam sinh hoạt di chi ndoan; kayua oh njauk lac Y Mul  saoh bo taong abih dom urang ndoan dam dara di palei oh thei thau taong chieng njauk yau dom urang nghệ nhân. Y Mul khan lac:

"Dahlak oh ka bac taong chieng. Thun 2009, huyen ndoan lac peih tal pato bac taong chieng min oh mboh pato. Palei hu peih tal bac sa bilan brei ka dom anek saih."

Palei Tul jeng hu peih tal pato bac taong kong chieng ka dom adei uranaih kayua dom urang nghe nhan dalam palei pato min oh hu lavik. Tal bac padeih tuk oh ka bac tamat blaoh nan ye oh hu adei halei bac tal labik tal dhua; palei Tuk kayua yau nan ye mbiah tal urak ini jeng oh ka hu kapul dam dara thau taong chieng. Nghe nhan Y Glong Niê lac:

“Dahlau diah, dahlak hu pato bac 3, 4 melam min dahlak oh pachreih. Dam dara takre ye mai bac, khin nao sang ye nao. Ngak yau nan oh sumu gauk, dam dara urak ini oh daok caik hatai tal bruk taong chieng. Anek dahlak urak ini  oh takre bac, nyu hu bruk ngak di nyu.”

Baoh sang ong Y Glong Niê hu sa sruh chieng min  lingiu ong ye dalam sang oh hu thei thau ma-in chieng. Yau nan ye, tal tuk ngak yang mebang di sang, ong njauk nao duah dom nghe nhan taha omu dalam palei. Akok palei Tul, Y Thiếp Dhieng brei thau: dalam palei urak ini daok hu labaih 10 sruh chieng  hu dom baoh sang khik piah, min, hu sang khik chieng yau khik drap ar, oh thau taong main chieng. Ong biak duh hatai tuk palei oh ka hu kapul urang daok ranaih umo taong chieng meda me-in hu haong dom urang taha praong thun:

“ Taong main chieng mbiah tal ini biak takik dam dara thau taong chieng. Hu pato min dom dam dara oh takre hadom, daok veik bac min oh mbak cariak. Hu peih tal pato 2, 3 mbang ye min oh mboh patagok. Yau nan ye tal urak ini oh hu kapul taong chieng daok ranaih umo. Jeng sahaneng rilo tal bruk ilamu meng kan min mbiah tal ini oh ka hu jalan khik ramik halei.”

Ong Trần Thế Hưởng, urang ngak gah ilamu, xa hoi xã Yang Mao brei thau: meng thun 2008, xã Yang Mao daok 31 sruh chieng, dalam nan, hu dom sruh daok kurang. Mbiah tal ini, xã oh ka kuhrua iek veik. Tukvak tapa, gah ilamu jeng hu brei ka xã 3 sruh chieng, hu pandar dalam harei rija, roya di bhap bini min takik pandar. Tok hu mboh tuk ngak yang tapen ia yaok thun kayua hu daong jien peih ngak. Dalam dom bruk ngak yang ini jeng  hu dom nghe nhan umo taha taong kong chieng. Langyah ka bruk lahik patoa veik  di xã Yang Mao, ông Trần Thế Hưởng brei thau:

 “ Dom thun tapa, huyen hu peih ngak danak dak nan min mikva labik ini oh hu tukvak piah bac, tuk peih tal pato ye hu manuac mai bac min hadei di nan oh hu thei mai pasram veik kayua nao ngak mbang. Kadua tra oh thau cambaic laic  quy chế daong yau halei. Kinh tế di mikva labik ini daok rilo kan kandah, urang haduh hatai ka bruk ngak mbang ka radiuk oh hu tuk vak piah bac ilamu.”

Ilamu kong chieng dak harei dak lahik nao dalam raidiuk ilamu di mikva palei Tul jeng yau xã Yang Mao, huyen Krong Bong, tinh Dak lak. Bruk nan meyah oh samar pasiam, oh suia lavik tra, kong chieng tok hu dalAm akok sahaneng di mikva./.