Daong ka bhap bini bhum taphia negar paglaong jalan sahaneng, urang jakar, urang lin Đồn biên phòng Ia Rvê, tỉnh Đắc Lắc hu peih rilo tal bac pato akhar ka urang oh ka thau akhar daok di xã Ia Rvê, huyện Ea Súp. Bruk ngak nan di bộ đội Biên phòng Đắc Lắc hu pabak jang hatai anit ranam di bhap bini, rik prein tame khik kajap bhum taphia negar di taneh ia. Minh Huệ, urang vak di Rayo ndem Viet Nam daok di bhum Tây Nguyên hu kadha vak brei thau ka bruk nan, da-a mikva saong grauk ayut tui pang:

8 tuk melam, bilik bac mam non palei 11, xã Ia Rvê, huyện Ea Súp, gilac sap bac ê-a di urang praong. Dom bilan ini ye, melam halei di bhum taphia negar atah bayah ini jeng mboh chreih chrai tagok saong tal bac akhar kayua dom gru cuk quân hàm hijao pato. Ini lac tal bac ka 3 hu Đồn biên phòng Ia Rvê peih di xã, caong khin daong ka mikva bhum taphia negar thau bac, thau vak akhar huroh, paglaong jalan sahaneng piah bac megru jalan ngak mbang saong thau ka quy chế bhum taphia negar, adat hukum di Karja piah ngak njauk tui.

Tal bac akhar ka urang oh ka thau akhar mbang ini hu 22 urang, mai meng palei 11 saong palei 4 di xã Ia Rvê, huyện Ea Sup. Urang sit di abih umo 15 thun, praong di abih umo 40 thun, lac urang daok di bhum kinh te birau mai meng dom tỉnh gah Barak saong meng tỉnh Bến Tre. Urang bac umo praong di abih nan lac ong Lê Văn Dũng, brei thau, hu tal bac di bộ đội biên phòng, sa-ai mboh hu mbuan lagaih jang dalam bruk ngak mbang: Dahlak bac hu hasit hasrak ye. Yau ye bruk  ngak apuh ye drei blei jru mai buh ka phun pala, drei bac thau jalan pandar, dahlak biak uan tabuan.

Tame tal bac nan, sa-ai Lê Thi Hà umo 23 thun birau thau pan but kalam pasram vak akhar, vak số. Sa-ai khan lac, tangin pran kayua ngak hamu ngak apuh, camereip pan mbut oh randap, vak akhar daok kan jang caoh taneh pala phun. Harei nao ngak, melam mai samar rami ramik bruk sang piah mai tal bac akhar, biak glaih glar min sa-ai oh klak bac. Sa-ai Lê Thị Hà lac: Bruk ngak mbang daok rilo kan kandah, min drei njauk  kham merat ramik tukvak piah nao bac akhar, piah yam tagok dalam raidiuk.

Gru pato tal bac lac Trung úy Nguyễn Văn Thọ, Kapul jak ba bhap bini, Đồn biên phòng Ia Rvê, brei thau: tal urak ini mikva thau bac, thau vak, njauk tui hatai caong di tal bac. Min, caong khik hu tal bac suai lavik piah palahik bruk oh thau akhar huroh ka rilo urang, ye karja palei saong gah pato megru njauk daong klah rabha dom kan kandah saong urang bac, kayua dom urang mai bac jeng lac urang ngak mbang piah raong baoh sang di drei.  Trung úy Nguyễn Văn Thọ lac: Kadha praong di abih nan lac hadei di tuk bac blaoh urang thau bac thau vak saong thau ngak toán. Iek tui ilamu bo urang bac hu,  khol dahlak  pathau khan piah pataom iek veik tal bac; daok tukvak bac meng 1tal 2 thun, piah urang bac thau hu abih kadha piah ngak  salah danak dak palahik bruk oh thau akhar, sumu saong tal 3 di danak dak tiểu học. Jeng hu panuac tagok pakat angaok daong ka dom urang bac, langiu tapuk brei daong hasit jien padai piah urang patrun patakik kan kandah.

Di bhum taphia negar atah pasak tỉnh Đắc Lắc labaih 80km, xã Ia Rvê,  huyện Ea Súp, hu jaik meteh dom baoh sang kan kathaot, saong ralo bhap bini lac urang labik karei panduan mai daok. Taneh riya praong, jalan nao mai kan kandah, menuac sia takik, ilamu daok biar, nan  lac dom paga pacang bruk cak rok patagok kinh tế xã hội, an ninh trật tự di bhum palei. Đại úy Trương Văn Hoành, Chính trị viên phó Đồn biên phòng Ia Rvê, brei thau, ngak bruk di labik ini, đơn vị thau lac, bruk paglaong jalan sahaneng ka bhap bini nan lac sa dalam dom bruk praong rik daong pagrap tanat raidiuk kinh tế xa hoi, khik caga khang kajap bhum taphia negar: Khol dahlak pambuak bruk khang kajap saong karja palei, kapul nyaom duah thau saong padang dom bruk ngak daong ka bhap bini cak rok patagok xa hoi, yau peih dom tal bac akhar ka urang oh ka thau akhar, peih dom bruk raong limo, tacei pato dom ilamu raong glang pala drak ka bhap bini dom janih phun lagaih saong taneh riya labik ini, gam ngak siam bruk rivang iek, pachreih ba dom baoh sang dalam sarak karja, sang kan kathaot tuk tết tal mai.  

Palahik bruk oh thau akhar, daong mikva dom bruk ngak yaok harei, bộ đội biên phòng Đắc Lắc hu bhap bini jia tame saong anit ranam. Hu yau nan, dom dom tapa bhum taphia negar Ia Rvê oh daok bruk tame tabiak negar suan hukum. Bhap bini jeng thau paglaong hatai sangka tuk brei thau rilo bruk rilo kadha praong hu yaom glaong, rik daong ka gah chức năng khik kajap salamat bhum taphia negar./.