Dom harei puac thun, diuk pasang ong Y Tôn Niê bhian iew lac aê Ka Rit  daok di palei  Ea Knôp, xã Cư Ni, huyện Ea Kar, tỉnh Đắk Lắk thuvi thuvar rami ramik sang danaok birau ngak salah blaoh. Dom anek nao ngak mbang atah, tal tết meng mai sang yau nan ye sang tok hu dua diuk pasang taha tame tabiak, gam iek taco, gam ramik tame sang birau. Ong khan, ini lac sang hu karja palei daong ngak tui Danak dak 167 di Rajaei. Gam saong phun jien karja daong 9 trieu meteh, sang ong daok hu mesre 25 trieu đồng jien laba biar dalam 15 thun. Ong jak ba dom urang anek nyim mesre dalam adei sa-ai gauk gar saong jien patak pataom hu meng dom thun tapa, padang ngak  hu sa baoh sang praong 70met vuong, abih 280 trieu đồng. Ong Y Tôn bui sambai lac: “Karja palei ba mbuan lagaih daong ngak hu baoh sang praong laneng lanoi yau ini nan ye sang dahlak biak uan tabuan. Yaom lac daok tavak sre jaik 80 trieu đồng min khol dahlak biak sambai kayua thun birau, diuk pasang anek taco hu raok tết dalam sang birau praong, kajap, laneing lanoi.

Jeng dreih yau sang ông Y Tôn Niê, sang sa-ai H Mlam Byă, (amí Sơ Ri) di puk ÊGa, xã Ea Kmut, huyện Ea Kar biak sambai tuk tết thun ini hu pataom gauk dalam baoh sang birau. Dahlau diah, yaok mbang langik hajan ribuk, abih 5 urang dalam sang dalam nan hu amaik taha, 2 anek sit saong diuk pasang njauk nao tapa sang mikva dalam palei likau daok kayua huac sang jaleih kateik. Kreh thun blaoh, hu karja daong, sang sa-ai nao nyim mesre, patak pataom piah padang hu baoh sang yaom 140 trieu đồng. Sa-ai H Mlam lac: “Tết thun ini meda lac tết sambai abih meng dahlau mai mbiah tal ini di sang sa-ai. Hu karja daong brei mesre phun jien ngak hu sang, dalam sang thei jeng sahanang hatai, kham merat ngak mbang yam tagok dalam raidiuk.”

Peih ngak Sarak 33 harei 10/8/2015 di Thủ tướng Rajaei ka sarak daong sang daok ka sang kathaot daok iew lac Danak dak 167 tukvak ka 2, tal abih thun 2020, tỉnh Đak Lak  hu daong sang daok ka labaih 7.800 baoh sang ngan saong yaom jien abih tih labaih 312 tỷ đồng. Dom baoh sang hu padang ngak ginup 3 khang, lac nền khang, khung khang, tabung khang tui bruk ba tabiak, yaom yaok baoh sang meng 40 tal 50 trieu đồng. Rilo sang  hu bruk daong di but pajaih, bhap bini ngak hu baoh sang praong laneing lanoi.

Dalam tuk peih ngak, dom palei hu ngak tsiam dom sarak saong jalan ngak ba mai siam gheih. Yau di huyện Ea Kar, dalam thun 2020 padang ngak hu 133 baoh sang ka urang kathaot. Ông Trần Duy Trường, Phó akaok jabat Kinh tế - Hạ tầng, Phó akaok mBan tacei ba peih ngak Sarak 33 huyện Ea Kar brei thau, abih hệ thống chính trị saong yaok urang dalam mban tacei ba kham merat ngak bruk piah daong ka dom sang kathaot samar hu baoh sang siam jang, daong brei hu labik daok tani tanat, sahanang hatai ngak mbang. Mban tacei ba jalan huyện saong mban tacei ba jalan dom xã tal taong abih dom palei, mbuon peih dom mbang pathau khan ka jalan tacei ba, dom danak dak hu pambuak tal padang ngak sang 167 ka dom baoh sang.  Tui nan sumu langyah dom kan kandah tavak tavaiy dalam tuk ngak piah ka bruk padang ngak sang hu rah tabiak dalam mbuan, lagaih.

Piah daong gauk ngak brei siam dom sang taik tahak di dom sang kathaot, langiu danak dak 167, kapol nyaom dom pakat di Đắk Lắk jeng kham merat jak ba  padang ngak sang daok tapa rilo danak dak brei ka bhap bini, yau ngak sang Jum pataom, Chữ thập đỏ, Baoh sang anit ranam…Tapa nan hu daong ka rilo sang kan kandah tani tanat labik daok, sahanang hatai ngak mbang yam tapa truh kathaot. Xuân ini, rilo baoh sang kathaot di Đăk Lăk hu mbang tết bui sambai dalam dom baoh sang birau praong laneing lanoi./.

Urang lang: A.Nghiêm  8/2/2021