Công an xã Ia Lốp jao lac drap ar njauk co klaik ka doanh nghiep

Puk 8 xã Thuận Hà, huyện Đăk Song daok di kreh mbon ceik, tuk mehit sap kẽng meng sang ong Đoàn Văn Lộc, menuac sia meng urang taha tal urang daok ranaih samar ba gauk tabiak jalan praong. Ong brei thau, labik bhum tapen negar, sang danaok daok atah di gauk, sap kẽng lac sap ieu pataom menuac sia ba gauk khik caga siam makre puk palei. Meng harei hu sap kẻng an ninh, bruk co klaik asau di labik ni oh daok, saong jeng oh daok hu urang halei oh hu thei thau krien bhian mai tal pak ni. Abih di nyu nan lac meng tuk hu công an mai ngak bruk di xã, an ninh trật tự hu khik kajap, daong ka bhap bini saneng hatai piah cak rok patagok bruk ngak mbang, pala drak: “Dahlau dieh ye bruk co klaik asau, me-in mbia di labik ni biak rilo, urang dam manyum alak blaoh taong gauk biak rilo. Min meng di tuk hu công an chính quy mai tal xã ngak bruk ye rahra kol dahlak biak sanang hatai, dom bruk nan tal urak ni oh daok rahtabiak viek”

Tui Thượng úy Lê Ngọc Anh, Phó akaok Công an xã Thuận Hà, ngak pasiam, pakhang saong paglaong siam lagaih dom bruk pacang caga tội phạm yau ye sap kẻng an ninh, kapul an ninh tự quản… lac dom bruk camriep dom saai ngak tuk mai ngak bruk di xã dalam bilan 3/2020. Công an xã Thuận Hà samar brei panuac ba jalan ka pakat ủy karja pak ni dalam bruk khik ramik an ninh trật tự, pacang caga dom janih tội phạm meng labik bhap bini daok: “Yaok puk palei yau nan hu 2 baoh kẻng, 1 kapul an ninh hu 8 urang, kayua urang ngak công an pan akaok saong bhap bini hu mbaok tame. Meng nan bruk an ninh trật tự hu tani tanat, tapa nan mek hu hatai jia di bhap bini, saong bhap bini jeng hu khan brei công an xã thau rilo jang”.

Hu công an xã chính quy, bhap bini jia tame, sanang hatai, nan lac bruk di bhap bini daok di bhum tapen negar 2 xã Thuận Hà -Thuận Hạnh di huyện Đăk Song, tỉnh Đăk Nông. Lingiu di bruk trun khang dom janih tội phạm, langyah samar drah dom harak gar hành chính, kapul công an chính quy mai ngak di xã daok hu dom bruk ngak pambuak kajap haong bhap bini. Ong Đỗ Xuân An, umo 74 thun, daok di puk Thuận Trung, xã Thuận Hạnh, ndem lac: “Công an chính quy mai ngak bruk ye dom saai nan jeng hu mai taom gaok bhap bini, nao tal dom puk palei piah duah thau, oh lac bruk ngak, bo daok sangka tal raidiuk di bhap bini. Mikva mboh yau nan jeng biak jia tame saong biak uan tabuan.”

Urang taha ye bhian nao rivang, daok urang ranaih ye pambuak meng mạng xã hội zalo, nan lac jalan bo gah công an xã Thuận Hạnh daok jaik haong bhap bini jang. Thượng úy Nguyễn Đình Hưng, Phó trưởng Công an xã Thuận Hạnh brei thau, meng hu bhap bini bo dom saai hu ngak siam bruk pacang caga tội phạm, khik tanat an ninh trật tự puk palei, saong dalam thun ni hu pambuak gauk taong yah 5 bruk gah ma túy, duah mboh saong pacang cakak bruk pala phun cần sa di bhum tapen negar: “Njauk ndom tal di abih lac bruk mek zalo an ninh piah pambuak gauk saong khan brei gauk thau bruk an ninh trật tự, ka dua lac padang danak dak puk palei oh hu ma túy. Anak tal khol hulin meda peih ngak di taong abih dom puk palei, pataom tame jhul khang bruk pacang caga tội phạm ma túy, kayua nan lac jalan ba rilo janih tội phạm.”

Xã Thuận Hạnh lac xã praong, hu labaih 12.000 urang, hu 2 jalan roya 14 saong jalan roya 14C nao tapa ngan saong labaih 17 km jalan tapen negar. Kapul công an xã hu ngak bruk siam lagaih, khik kajap an ninh trật tự bhum tapen negar, nan lac panuac khan di ong Nguyễn Văn Tuân, Phó akaok UBND xã Thuận Hạnh.

Thượng tá Nguyễn Đức Thùy, Trưởng Công an huyện Đăk Song, tỉnh Đăk Nông, brei thau, peih ngak danak dak ba công an chính quy mai ngak bruk di xã, dalam jaik sa thun tapa hu abih tih 9 xã di huyện hu brei 54 urang jaka công an chính quy mai ngak bruk, tagok 8% dut saong bruk ba tabiak. Bruk ngak hu praong njauk ndem tal lac bruk pacang caga kol tội phạm di puk palei hu siam lagaih jang, rik tame bruk jhul kadun likuk tệ nạn ma túy dalam bhum bangsa takik: “Meng di tuk hu công an xã chính quy ye bruk co klaik trun daok takik, blaoh bruk cap mek kol co klaik jeng biak samar. Abih di nyu nan lac di 2 xã tapen negar ye công an jeng duah mboh rilo bruk, dalam nan hu bruk pasang iek duah mboh tapon urang pala phun hu janih ma túy lac phun cần sa.”

Khik sron mbon puk palei, tani tanat xã hội, hu rik daong ka bhap bini bhum tapen negar Đăk Song sanang hatai cak rok patagok kinh tế, padang ngak palei pala bahrau. Thun blaoh, Thuận Hạnh hu brei angan lac xã palei pala bahrau di tỉnh Đăk Nông. Thun ni, xã Thuận Hà jeng daok kham marat ngak ka nyu salah tamat danak dak ni. Ni jeng lac dom jak jeng biak njauk pok mayaom di karja saong bhap bini bhum tapen negar Thuận Hà, Thuận Hạnh, huyện Đăk Song, tỉnh Đăk Nông./.

Urang lang: Thu Thảo – 26/11