Bruk pato veik ka urang palei dalam hu saai biak bui hatai 

Yaom lac gaok rilo kan kandah kayua jit ruak Covid-19 rahtabiak sarau kadhau min dalam thun ini, saai Đàm Đình Hiếu, umo 29 thun, bangsa Tày, daok di palei Bình Hòa, xã Ea Mnang jeng pablei hu dom lô pandap phôi sáo trúc tapa darak pasa Nhật Bản saong Ấn Độ.

Ngan haong Đàm Đình Hiếu, padang mbang ngui haong sáo trúc lac jalan nao oh sahneng dahlau. Tuk camriep kayua hatai takre saong caong khin eng drei ngak tabiak sa mbaik talak siam, saai Hiếu eng drei duah jalan bac ngak sáo trúc mangaok mạng internet. Hadei di rilo mbang ngak oh jeng, ngak khut yaok rituh mbaik phôi, saai ngak hu mbaik talak yau hatai caong saong ba bruk ngak hu di drei tagok kapul, nyaom pambuak tal talak di mangaok mạng xã hội. Taduan hu panuac meyaom meng dom urang caik hatai tal, mboh hu prein khang meng bruk pablei salih sáo trúc,  nan ye meng thun 2015 saai buh jien blei mac jamraik piah ngak sáo trúc blaoh ba tagok piah pablei.

Urak ini, langiu di tuai pablei rilo meng 1.000 – 2.000 nding phôi yaok bilan, saai daok pandar mạng xã hội piah pablei lẻ sáo trúc hu ngak salah  haong yaom jien meng dom rituh tal dom triệu đồng yaok mbaik. Saai Đàm Đình Hiếu lac:

Tal urak ini drei jeng ngak hu 5 -6 thun paje, ka 1 lac pabak ka dom shop praong saong hu Zalo, Facebook, Fanpage piah pablei pandap ye bilan halei jeng pandap hu pablei tani tanat. Anak tal, adei meda peih sa quan pablei alat ragam bangsa saong pablei talak, pambuak haong sahabat di drei paik capi, daok adei pato yuk talak.   

Jeng tabiak meng hatai takre di drei, saai Hoàng Văn Nam, umo 33 thun, bangsa Nùng daok di palei 6 xã Ea M'nang pilih jalan raong manuk glai piah duah jien mek tame. Hoàng Văn Nam khan lac, tuk camriep bahrau raong manuk cảnh piah maong iek, blaoh parabha haong ayut sahabat, ba tagok dom blah mạng xã hội piah taom gaok, ndom biai nao mai tui kapul takre. Hadei di nan, hu rilo urang mai duah blei  manuk pajaih saong ieu tacei ilamu iek glang. Meng akaok thun blaoh, saai tame dalam duah thau saong pambak praong tapon, tagok dom manuk amaik ame tal labaih 100 drei. Tui saai Nam, pajaih manuk daok raong hu thuần hóa saong lai tạo meng manuk glai nan je daok khik hu rilo bruk di manuk glai, saong daok hu raong tui jalan meneing glai meneing palei nan ye hu tuai biak takre, yaok gu manuk pajaih hadei di 8 bilan raong hu yaom pablei meng 800 ribau đồng tal 1,2 triệu đồng. Yaom lac raong manuk lac sa bruk ngak mbang phụ, pandar mblang taneh bein hu blaoh labaih 1ha saong pandap mbang lac pandap labaih meng pala drak, min mboh lac raong manuk glai jeng hu kein laba jang dut saong dom janih athur raong karei. Kayua yau nan ye, saai daok pamaong tal bruk peih praong raong glang janih manuk ini.

Raong manuk ini drei mboh prein pacang ruak di nyu biak siam, langiu di nan nyu jeng mbang biak takik, pandap mbang rilo meng lac tangei saong padai. Manuk anek ye drei pabak dom janih vitamin ka nyu hu prein pacang caga ruak, piah yam tapa tukvak nyu daok sit saongprein pacang  ruak bier. Anak tal, drei brei tagok tapon manuk rilo jang, padang ngak labik raong  praong piah pabak anek pajaih atau menuk ralaow pabak ka darak pasa.

Tui saai Nguyễn Văn Mẫn, bí thư kapul dam dara xã Ea Mnang, huyện Cư Mgar, dom thun jaik di ini di xã hu rilo bruk dam dara cak rok patagok kinh tế, padang mbang ngui. Dalam nan rilo bruk ngak di dam dara bangsa takik mboh biak bahrau bahrang. 

Anak tal kapul dam dara xã meda daong pakat angaok ngak harak gar piah likau masraiy jien daong meng kadung jien padang mbang ngui ngan haong  Huyện Đoàn saong peih bruk brei ka urang đoàn dam dara dalam xã rivang iek dom bruk ngak ini piah bac veik dom bruk ngak lagaih haong yaok bruk ngak di urang đoàn dam dara.

Gam haong dom bruk yam takai nao gam, ba mbuan lagaih gah hành chính, kapul dam dara xã daok hu daong tacein jalan saong pambuak gauk piah ka dam dara hu mesraiy dom paok jien phun, rivang iek bac magru dom bruk ngak, piah meng nan hu pabak jalan padang mbang ngui ka rup drei./.

Urang lang: Jasi -19/11