Đảng ủy xã Phan Hòa urak ini hu 8 chi bộ saong 97 urang đảng. Tukvak tapa,  Đảng ủy xã oh padeih jhul pakhang bruk pathau khan bac megru saong ngak tui jalan hadah krah siam mekre di Hồ Chí Minh, maong iek bruk ini lac bruk ngak gam gam, piah pachreih ba saong lac jalan piah ngak brei jayah bruk chính trị, kinh tế - xã hội di xã. Yaok urang đảng tal dom chi bộ dalam xã jeng hu tut angan brei thau asal pakacah ngak tui Wa Hồ  dalam raidiuk saong dalam bruk ngak yaok harei biak cambaih laih. Ong Bá Minh Khánh – Phó Bí thư Đảng ủy xã Phan Hòa, huyện Bắc Bình, tỉnh Bình Thuận brei thau: 

Đảng bộ di labik ini ngak biak siam bruk bac megru saong ngak tui jalan hadah krah siam mekre di  Hồ Chí Minh”, hu ba bruk ini tame mbang nyom yaok bilan di chi, Đảng bộ piah ka yaok urang đảng, yaok urang jakar thau hu bruk Wa ngak piah ngak tui, ngak siam bruk di drei...

 Di bộ phận " một cửa"  di Ủy ban bhap bini xã, yaok urang jakar, viên chức ngak bruk biak siam, oh caik ka bhap bini cang urang jakar dalam bruk ngak harak gar ka bhap bini. Yaom lac oh pabak tame tapak, min bruk salih bahrau thủ tục hành chính, nao ngak njauk tukvak, tacei pato, abih hatai daong ka bhap bini hu rik daong praong ka bruk cakrok patagok kinh tế - xã hội di puk palei, ngak patagok hatai jia di bol bhap rahra brei ka pakat ủy Đảng, karja palei. Sa-ai Lư Tôn Bảo Quốc, sa urang mai ngak harak khai sinh brei thau, urang jakar xã di drei salih bahrau jang dahlau biak rilo, njauk harei, njauk sanya. Oh daok sanya nao mai yau dahlau deih.

Di khối Quân sự xã,  bruk iek praong kỷ luật dalam trực ban, trực chiến, halan hatian caga chiến đấu hu paglaong.  Urang jakar, urang lin mBan  Chỉ huy Quân sự xã khang hatai oh menyum alak tapai dalam harei ngak bruk, ngak bruk njauk sanya”. Yaok urang dalam mBan jeng ngak njauk nội qui, điều lệnh,  jeng bruk bhian randap yaok harei. Ini jeng lac tanut piah ka dom đơn vị taong yaom, pilih ruah angan pakacah, pok meyaom yaok thun ka dom kapul nyom, menuac urang. Sa-ai Bá Lâm Anh Tuấn – urang pan akaok mBan Chỉ huy Quân sự xã Phan Hòa, huyện Bắc Bình, tỉnh Bình Thuận brei thau:

Kol dahlak nao ngak bruk njauk tukvak, abih bruk meng mai sang. Tuk padeih padei jala pandiak oh menyum alak tapai piah khik pren yava saong piah ngak bruk ka nyu siam.

Bruk jak ba hu jeng kadha praong dalam bruk kak pagam urang jakar, urang đảng haong bhap bini, ngak jeng talei jum pataom khang kajap jhul patagok bruk kinh tế xã hội di palei. Dom thun jaik ini, xã jeng ngak hu saong ngak rilo jang tanut ba tabiak. Yau ye thun bloh, taong abih sản lượng lương thực hu labaih 124% bruk ba tabiak, jien mek tame kadung jien karja hu 187% saong bruk brei harak chứng nhận quyền pandar taneh hu labaih 123% bruk ba tabiak. Sa-ai Thổ Minh Đức – Chủ tịch Ủy ban bhap bini xã Phan Hòa, huyện Bắc Bình, tỉnh Bình Thuận brei thau:

Mikva Cam pak ini biak thau jum pataom gauk, daong ba gauk dalam bruk ngak mbang, nan ye mbaok meta puk palei urak ini hu salih bahrau. Tapa nan, raidiuk di mikva dak harei dak patagok, sang danaok hu siam mekre jang. Meng nan bo mikva biak pachreih tui, biak thau dar phor Đảng saong Karja hu daong palagaih bruk ngak mbang

Anak meta mboh lac, dom bruk ngak hu siam lagaih dalam bruk bac megru saong ngak tui Wa Hồ di dom urang jakar, urang đảng di xã Phan Hòa hu pren pambak khang, ba brei njauk gauk, pambuak pagam urang jakar, urang đảng haong bol bhap rahra. Meng bruk njauk gauk nan, nyu ngak jeng pren khang piah ka xã Phan Hòa mek hu rilo jak jeng dalam dom bruk ngak, peih tabiak jalan khang kajap ka bruk pakacah gauk anit ranam taneh ia dalam palei, dak padang raidiuk trei sir, haniem phul dalam bhum urang Cam huyện Bắc Bình, tỉnh Bình Thuận./.