Tui yaok pataom di Sở Pato Megru ban raya HCM, dalam ban raya hu labaih 1.500 anek saih matui kayua jit Covid-19. Dalam nan, pakat tiểu học hu 600 anek saih - samu 40%, pakat THCS hu 700 anek saih saong labaih 200 anek saih di dom pakat bac karei. Bruk nan nyu caik ka gah pato megru sa cuang kandah praong dalam bruk gam daong klah rabha haong anek saih gam peih bruk pato pakai dom adei.

Tui PGS-TS Đinh Đức Hợi, urang roh duah gah tâm lý, bruk yam takai nao gam di dom gru pato brei ngak tui 4 paka lac: khik kandauk, iek praong, suai lavik saong hu bruk pambuak gauk haong dom kapul nyaom chính trị, xã hội piah hu jalan daong ka nyu lagaih. Dalam nan, di paka khik kandauk, gru pato brei khik kandauk oh brei thau ka thar vak di anek saih, oh brei thau sang danaok di dom adei saong dom bruk taom gaok (meyah hu) di gru pato haong anek saih.

Bhian hu bruk anek saih oh pambuak bruk haong gru pato tuk thar vak di dom adei hu ba tagok brei ka urang thau piah ieu daong. Tui jalan ngak suai lavik, gru pato brei thau lac bruk daong gah hatai sahneng ka anek saih lac bruk ngak suai lavik, brei kham merat cang tal tuk anek saih mboh salamat saong halan hatian khan brei thau. Mboh hu rilo mbang, bruk daong   njauk ba tapa rilo pakat bac tuk dom adei bac meng tiểu học tagok THCS saong THPT.

TS Phạm Đăng Khoa, Akaok Jabat Pato Megru quận 3 khan lac, dom ilamu nan dom gru pato brei hu piah daong ka anek saih dalam bilan jit, bo daok brei hu dalam bruk daong ka anek saih gaok dom bruk duh hatai dalam raidiuk yaok harei. Gru chủ nhiệm brei ngak yau urang ame, urang amaik ka 2 di anek saih saong brei hu ginup sahneng kuhria, ilamu piah samar yam takai nao gam saong daong ka anek saih dalam bruk bac da-a gam bruk cakrok suai lavik.

Phaok Yam ndok Sở Pato Megru ban raya HCM Dương Trí Dũng ndom lac, piah daong siam di abih ka anek saih, sang bac brei pambuak bruk khang kajap haong amaik ame di anek saih dalam bruk yam takai nao gam haong dom adei, abih di nyu lac dalam tuk bac da-a gaok kan kandah di jit ruak.

  Bahrau ini, di mbang pato pasram ka iek glang prein yava, hatai sahneng di anek saih dalam bilan jit kayua Jabat Pato Megru quận 3 pambuak haong Sang bac Đại học Sư phạm TPHCM peih tabiak, dom gru pato hu khan brei thau dom ilamu ka dom panuac  “njauk ndom” saong “oh njauk ndom” haong anek saih hu gauk gar metai kayua njauk Covid-19. Tui ThS Nguyễn Thị Diễm My, urang pato pakai Khoa Tâm lý học, Sang bac Đại học Sư phạm TPHCM, uraniah hu gauk gar metai kayua njauk Covid-19 bhian duh hatai, thất vọng, glaih glar…Nan ye, cei gru, nai gru njauk ndom dom panuac anit ranam, bingi pang, thau ka bruk pandik harao di dom adei, thau hu hatai sahneng di dom adei piah hu jalan daong ka nyu lagaih./.

Urang lang: M.Phuong -6/11/2021