Langyah bruk samar drah, siam lagaih nan lac panuac taong yaom di mikva dom puk palei tuk ndom tal dom urang jakar cong an chinh quy mai ngak bruk di xã taphia negar Quảng Trực. Sa-ai Thị Bơi, daok di mbon Bu Prăng 1, xã Quảng Trực, huyện Tuy Đức, brei mboh hatai jia kapul cong an xã hadei di bruk hu menuac mebuk alak tame ngak srau kadau sang drei:

“Hu urang jakar cong an chinh quy mai ye an ninh trật tự biak tani tanat, meyah hu bruk hagait rah tabiak ye dom urang jakar nan hu mbaok chip”

Sa-ai Vũ Thị Mỹ Duyên, daok di palei Đăk Huýt, xã Quảng Trực brei thau, mikva biak sahanang hatai tuk hu dom urang jakar công an xã chính quy:  

“Meda lac, bruk an ninh trật tự hu khik tani tanat rilo jang. Dom urang jakar nan jeng abih hatai saong mikva, tuk halei khol dahlak hu bruk bo iew ye dom urang nan hu mbaok chip saong langyah bruk biak samar”.

Ong Điểu Drây, akok bon Bu Prăng 1 brei thau, mikva bangsa takik di bhum taphia negar atah bayah ini bhian oh hu harak khai sinh saong kurang rilo harak karei. Urang jakar cong an xã hu tame tapak tal yaok baoh sang, tacei pato mikva vak ka njauk, ginup khaw tin piah ngak thẻ căn cước công dân:

“ Tuk mikva ngak bo gaok kan kandah ye tangi sua dom adei sa-ai cong an xã, ye adei sa-ai tacei tapak, pathau khan, pato padar, iek mikva daok kurang harak gar hagait, njauk ngak harak gal halei. Dom urang jakar cong an xã mai palei ngak bruk dahlak mboh biak siam.”

Tui Đại úy Trần Văn Dũng, Akok Công an xã Quảng Trực, 6 urang jakar cong an chính quy yaok urang hu bac sa janih bruk karei di gauk, min tuk mai xã ngak bruk dom sa-ai hu bac megru, pabak ilamu ka gauk, piah ka yaok urang jeng ngak hu abih bruk dom bruk di palei. Gam haong bruk daong ka pakat ủy karja xã khik kajap an ninh trật tự bhum taphia negar, cong an xã Quảng Trực hu padang ngak, pakhang pasiam rilo bruk khik caga an ninh trật tự meng dom puk palei.

Bruk ngak hu siam lagaih di kapul cong an chính quy mai xã hu rik daong dak padang bruk khik an ninh bhap bini khang kajap di bhum taphia negar Quảng Trực, labik hu tal 17 bangsa daok di bhum taneh praong labaih 60 ribau hecta. Ong Điểu Plơu, Phaok akaok UB bhap bini xã Quảng Trực brei thau:        

“Quảng Trực lac xã taphia negar biak kan kandah, abih di nyu lac jalan mbak nao mai biak kan dalam bilan hajan, mikva daok atah di gauk, taneh praong, bruk khik iek jeng kan. Ndem ka dom urang cong an chinh quy mai xã lac biak siam dalam bruk ngak jeng yau daong ka pakat ủy karja palei. Tukvak jaik ini, dahlak mboh lac dut saong dahlau diah ye an ninh chính trị di xã Quảng Trực hu tani tanat, xã dak harei dak patagok.   

Thượng tá Nguyễn Sử, Akok Công an huyện Tuy Đức brei thau, peih ngak danak dak di Mentri Công an, labaih 1 thun tapa, taong abih 6 xã dalam huyện hu brei 41 công an chính quy mai ngak bruk. Bruk ngak hu siam njauk ndom tal nan lac dom bruk ngak suan hukum hình sự 11 bilan thun ini trun tal 27% dut saong tukvak ini thun dahlau. Gam haong nan, kapul công an hu jak ba bhap bini jao brei 130 mbaik phao saong jak 700 asar siu dom janih. Thượng tá Nguyễn Sử brei thau ka bruk khik hu siam an ninh trật tự labik bhum taphia negar:

“Labik ini khol dahlak hu pathau khan ka bhap bini thau dom bruk pachot pagat di kol toi pham jeng yau ieu pataom bhap bini padang ngak dom kapol an ninh trật tự, piah pambuak saong gah cong an haong đồn bien phong khik sron mbon salamat an ninh trật tự”.

Bruk ba cong an chính quy mai ngak bruk di dom xã di huyen taphia negar Tuy Đức, tỉnh Đăk Nông, brei mboh siam lagaih dalam bruk khik kajap an ninh chính trị, trật tự salamat xa hoi. Kapul cong an chinh quy ngak bruk chuyen nghiep meng puk palei hu bhap bini jia tame, rik daong dak padang khang kajap bruk taong abih bhap bini khik caga labik bhum taphia negar./.

Urang lang: Ai Nghiem -9/12/2021