Rilo urang đoàn dong pren jang yau pandap panda ka urang kan kathaot abih hatai 

Tui yaok pataom di Dhar gilang pariak sarak karja tỉnh, dalam 6 bilan akaok thun 2021, hu labaih 550 tỷ đồng hu peih brei ka urang mesre. Duk haong tukvak ini thun 2020, yaom jien brei mesre tagok jaik 26%. Dalam nan, brei mesre tui danak dak aia hacih saong sa-at alam môi trường palei pala hu rilo urang mesraiy di abih. Dang ka dua lac brei mesre tui danak dak daong bruk ngak ngan haong yaom jien jaik 281 tỷ đồng , tagok 54,5% dut haong tukvak ini thun 2020.

Ta-eng danak dak brei mesre ka baoh sang kan kathaot, baoh sang jaik kan kathaot saong baoh sang bahrau tabiak truh kathaot, hu labaih 550 baoh sang mesre labaih 26 tỷ đồng. Daok danak dak brei ka anek saih, sinh viên sang kan kandah mesre, ye hu labaih 1,2 ribau anek saih, sinh viên mesre jaik 19 tỷ đồng. Dom menuac mesre di danak dak ini rilo jang jaik dua mbang dut haong tukvak ini thun 2020.

Hu yau ini njauk ndom tal dom kham merat biak prong di dom urang ngak bruk brei mesre sarak karja dalam tỉnh. Tui ong Võ Văn Song, Akaok Gilang pariak sarak karja huyện Cẩm Mỹ, meng akaok thun, jit ruak Covid-19 ngak kan kandah biak prong tal bruk taduan mek harak gar, peih jien brei mesre, kayua bruk brei mesraiy salih karei tui jalan pacang caga jit ruak. Anak bruk caong khin mesre di bhap bani piah hu phun jien padang bruk ngak, salih bruk ngak, mesre brei ka anek bhik nao bac..., yaok urang ngak dalam Duk Giao dịch gilang pariak sarak karja huyện Cẩm Mỹ jeng kham merat piah jao brei phun jien samar drah ka bhap bani.

Meng hu yau nan, huyện Cẩm Mỹ hu labaih 2,1 ribau mbang urang taduan mek hu phun jien labaih 53 tỷ đồng. Daok di huyện Xuân Lộc, hu labaih 4,1 ribau baoh sang hu mesre labaih 46 tỷ đồng. Ta-eng huyện Trảng Bom, hu labaih 2 ribau mbang urang hu mesre labaih 59 tỷ đồng... Bruk brei mesre di dom huyện jeng tagok meng 20% dut haong tukvak ini thun 2020.

Phun jien ini hu samar drah nao tal tangin bhap bani dalam tukvak gaok kan kandah hu daong prein biak rilo ka mikva. Ong Giáp Văn Long (xã Bảo Hòa, H.Xuân Lộc) brei thau, tuk sang gaok kan kandah, ong kuhria tal bruk brei dom urang anek padeih bac piah nao ngak mbang pah. Tapa bruk daong di karja palei, ong ngak harak gar saong hu Gilang pariak Sarak karja brei mesre tui danak dak baoh sang kathaot saong danak dak brei mesre ka anek saih, sinh viên sang kan kandah. Tapa nan, oh hu jien ngak mbang, gam hu jien brei ka anek bhik mbang bac; meng nan dom anek di ong oh njauk klaak bac meteh dhi.                           

Dom bilan daok veik di thun 2021, bruk caong khin mesre jien phun sarak karja di bhap bani dalam tỉnh tui kuhria daok tagok glaong. Kayua yau nan ye, dom Gilang pariak Sarak karja dalam tỉnh daok pataom phun jien piah brei ka bhap bani mesraiy, abih di nyu lac dom danak dak brei mesre piah padang bruk ngak,brei mesre danak dak anek saih, sinh viên piah daong ka urang nao bac oh njauk padeih bac meteh dhi kayua sang kan kandah meng jit ruak. Gam haong nan, dom Gilang pariak sarak karja dalam tỉnh meda peih ngak sarak dui atah tukvak ba-yar sre,rami ramik veik sre ka tuai damuai kan kandah ka jien padai kayua jit ruak Covid-19.Dom pakat ủy, karja,dom Gilang pariak sarak karja dalam tỉnh patagok pasang iek bruk pandar phun jien di urang mesre, piah ngak ka phun jien patagok hu kein laba./.

Urang lang: Jasi -9/7