Dhal pajeng ba jalan pasei Bei Gon hu brei bruk pajeng pandap panda, tuai damuai meng jalan pasei. Piah pabak bruk pajeng ba saong nao mai di bhap bani, tukvak tapa, dhal hu ralo salih bahrau dalam bruk ngak meng ralo janih pajeng ba dalam taneh aia saong angaok dunya; khik iek khai thác hu kein laba Ga Sài Gòn saong dom dịch vụ karei yau đại lý pajeng ba; du lịch, khách sạn..v.v. 

 Tuai nao radaih pui tal Ga Sài Gòn urak ini oh daok huac bruk menuk ralo jhul kateik gauk yau dahlau diah bo daok mboh njauk hatai haong bruk phục vụ abih hatai jai di urang ngak gah jalan pasei. Sang ga praong labaih 2.500m² hu labaih 200 kik daok dalam sa duk, hu máy điều hoà, tivi prong, quầy bưu điện, tapuk báo, aia menyum, sang vệ sinh... pabak hatai caong di urang daok cang blei vé saong cang ndik radaih pui. Sa-ai Trịnh Thị Phượng, urang pablei vé Ga Sài Gòn- Dhal pajeng ba jalan pasei Sài Gòn brei thau: Dahlak tuk halei jeng caong khin ngak bui hatai tuai damuai, meng bruk pablei vé tal bruk raok ba tagok radaih. Meng akaok thun tal ini, gah jalan pasei brei salih bahrau tui 4 likau, 4 gam. 4 likau nan lac likau salam, likau adat, likau ndua dhal phol saong likau ma-ah ampul; daok 4 gam nan lac gam khim klao, gam njuan njaih, gam tui pang saong gam daong ba tuai damuai. “

      Bruk pablei vé thun ini njuan njaih jang dahlau ngan haong urang mai blei kayua lac gah jalan pasei pandar danak dak pablei vé điện tử mbang ka 2 meng harei 1-9, tui nan urang meda blei vé angaok mạng di yaok tuk yaok labik, oh daok njauk nao tagok ga mek số thứ tự yau dahlau diah, patak pataom hu ralo tukvak. Langiu di nan, ga Sài Gòn jeng daok khik dom jalan pablei vé karei piah palaghaih ka urang nao radaih. Sa-ai  Nguyễn Thị Mai, sa urang nao radaih pui brei thau: “Dahlak blei vé nao Tháp Chàm, dahlak daok cang, jeng jaik si tal  drei paje. Yaok thun dahlak jeng bhian nao mai, urak ini dahlak mboh vé tàu blei biak mbuan lagaih, meng tuk gah jalan pasei salih tapa dịch vụ pablei vé điện tử ye dahlak mboh samar drah, mbuan blei, nhân viên ngak samar drah, ndom puac bingi pang, bruk phục vụ saong dom dịch vụ angaok radaih pui jeng hu siam jang.”

       Gam haong bruk salih bahrau cơ sở hạ tầng Ga Sài Gòn, Dhal pajeng ba jalan pasei Sài Gòn hu ba tabiak bruk ngak, jalan ngak piah duh siam ka dom mbang tabung glaong yau Tết, hè, dom harei lễ; brei pambuak toa piah pabak ka bruk nao mai... Peih ralo bruk ngak piah pachreih tuai damuai, po pandap, taom gaok dom công ty du lịch, dom doanh nghiệp hu ralo urang ngak nao radaih apui, ba tabiak rilo jalan pajeng ba pandap panda piah pachreih dui pandap panda mai haong jalan pasei dalam tukvak njauk meriak guak kayua hu ralo janih pajeng ba karei. Thau lac chất lượng phục vụ nao gam haong an toàn nan lac bruk praong piah dang hu di sa jabat ngak mbang gah pajeng ba, nan ye dalam dom thun tapa, dhal hu ralo kham merat piah khik caga siam mekre salamat, nao mai njauk tuk, oh hu bala dalam tuk ngak bruk,  oh caik rah tabiak bruk chậm tàu kayua chủ quan. Dalam thun ini, manuac urang nao radaih pui hu jaik 1 triệu 550 ribau urang, pandap panda pajeng hu 19 ribau 400 tấn, abih tih jien mek tame hu 720 tỷ, tagok jang meng 6 %, bloh 5%, saong 3% dut haong thun dahlau. Ong Đỗ Quang Văn, Akaok Dhal pajeng ba jalan pasei  Sài Gòn brei thau: Dalam thun 2016 khaol dahlak meda peih tal pasram megru paglaong ilamu ndom puac daok dang,  peih rilo jang dịch vụ piah duh ka tuai damuai saong po pandap ngan haong chất lượng glaong jang yau: peih tổng đài pablei vé iek glang tuai damuai, peih bruk phục vụ tuai payua pandap trọn gói meng sang tal sang, taphia di nan daok nâng cấp toa radaih, đoàn tàu piah pabak siam jang bruk nao radaih pui di tuai damuai”

      Anak meta, Dhal daok  peih ngak tui jalan ba tabiak di Tổng Công ty jalan pasei Việt Nam lac “Salamat – mbuan laghaih – siam mekre – njauk tuk- kein laba”; saong daok brei khik bruk pakacah “4 likau” - “4 gam”, oh padeih paglaong bruk duh ka tuai damuai, jeng sa labik njauk tin cậy di tuai damuai, urang nao radaih pui dalam negar./.