Meng hatai anit ranam brei ka 2 urang anek njauk ruak tự kỷ, Bác sỹ Huỳnh Tấn Mẫm, urang pan akaok bruk dang tagok di SV Bai Gon dahlau deih hu padang sa baoh sang bac akaok meti di ban raya HCM brei ka uranaih tự kỷ. Labaih 3 thun tapa, meng sa sang bac chuyên biệt hu angan ieu lac Khai Trí, rilo uranaih tự kỷ hu mbeik drei tame song dom ayuh sahabat umo samu gauk. Daa mik va song tong abih gauk mai tal sang bac ni tapa kadha vak di Hiếu Hiền, urang vak di rayo sap ndom VN dok di ban raya HCM.

Dok dalam sa hẻm sit di jalan Điện Biên Phủ, phường 17, quận Bình Thạnh, ban raya HCM, meng 3 thun tapa, sang bac chuyên biệt Khai Trí lac labik  hu rilo amaik ame oh patuah hu anek ruak tự kỷ duah tal. Hadei di 2 thun payua anek di labik ni. Saai Lê Thị Hồng dok di quận 7 brei thau:

  “Hadei di tuk anek bac di labik ni mboh nyu naih gheih jang,  eng nyu cuk khan ao hu, eng nyu mbuan huak hu, mai sang ngak hu dom bruk cá nhân sit sot, meda ndom nyai song thau hu rilo jang.

Dok saai  Nguyễn Kim Anh meng Bạc Liêu tagok ban raya HCM pah labik daok piah payua anek tame ni bac, ndom lac

 “Urak ni anek nyu thau bac thau menyai bo daok thau ngak toán tra. Dahlau deih bac di Bạc Liêu 2 thun oh ka thau yaok 1,2,3. Tuk oh ka tame bac ndom hagait jeng oh hu,  nyu puac, nyu taong urang dalam sang, urak ni sua hagait ye nyu javap nyu jalei ye, jak lô

Meng hatai anit ranam biak rilo brei ka uranaih tự kỷ nan nyu pachreih bác sỹ Huỳnh Tấn Mẫm kham merat yam tapa dom kan kandah gah jien padai piah padang hu baoh sang bac Khai Trí. Meng dom pluh anek saih di  thun camereip ye urak in sang bac hu 160 anek saih song 60 gru pato, tui nan hu 1 gru pato brei ka 3 anek saih. Abih hatai iek glang, oh tong paoh atau preo puac nan lac jalan pato pakai uranaih tự kỷ di labik ni. Anai gru Phạm  Thị Thảo khan lac 

 “ Sahaneng ngak yau habar ka dom adei menyai hu, dok ala tame bàn bac hu, thau salam ame, salam amaik. Hu harei oh mehit sap hagait di dom adei, tok  pok sa sap ieu anai Thảo ye mboh bui sambai ye.

Hadei di labaih 3 thun padang tagok, sang bac hu jiak 50 anek saih hu ginup pren yava akaok sahneng piah tame bac song dom ayut sahabat umo samu gauk di dom sang bac công lập.  Bruk jak jeng di boh sang ni hu ba tal bruk tabiak rai di dom sang bac brei ka uranaih tự kỷ di ban raya HCM. Ni lac kadha bui sambai brei ka dom amaik ame hu uranaih tự kỷ kayua hu rilo labik taduan song iek ruak ka anek bhik di drei. Min urang padang tabiak boh sang bac biak karei ini jeng hu panuac lac, bruk iek ruak ka uranaih tự kỷ brei hu talei pambuak bruk di amaik ame. Rilo tuk bruk duh hatai di amaik ame nyu ngak patrun dom siam lagaih di bruk iek ruak. Bác sĩ Huỳnh Tấn Mẫm, po sang bac chuyên biệt Khai Trí lac:

 “Meyah amaik ame caik hatai sangka pambuak bruk song sang bac ye biak siam. Meyah amaik ame caik ka sang bac, sang bac pato yau habar ye pato, ye uranaih suai hu siam mekre, gaok tuk mai nyu jhak nao. Pagap yau, sang bac oh tong uranaih bo amaik ame mai sang tong nyu atau patui uranaih lo, dalam tuk  sang bac pato anek saih kham merat ngak eng, yau dom uraniah siam mekre karei karei.

Meng bruk khang hatai di dom urang buh jien tabiak padang ngak sang bac ka uranaih tự kỷ, cong khin lac hu daong ka rilo uranaih tự kỷ hu bac megru song iek ruak piah ba drei tame dalam raidiuk. Taphia di nan, ban raya HCM njauk padang ngak sa sang bac công lập piah brei ka uranaih tự kỷ tuk urak ni bruk caong hu sang bac nan biak praong song yaom jien bac di dom sang bac tư thục dok glong dut song jien duah hu di rilo urang kan kathaot./.