Rilo Cty ngak tabiak mbaik ATM brah daong ka bhap bini dalam labik njauk kan kandah jit ruak 

  Jit praong Covid-19 ngak ka rilo doanh nghiệp pablei tabiak negar langiu di TPHCM oh daok pablei salih hu tani tanat di darak pasa châu Âu saong Mỹ yau dahlau deih. Oh taduan lah kan kandah, rilo doanh nghiệp duah rilo jalan piah diuk hu yaom lac oh njauk bruk ngak. Pagap yau Cty CP Quốc tế Xlife lac Cty pablei kaya nong tabiak negar lingiu. Ong Nguyễn Hải Đăng, Yam ndok Cty CP Quốc tế Xlife brei thau, dalam tuk pablei tabiak negar langiu dom pandap di công ty daok padeih ye gah Hàn Quốc khan lac daok duah labik ngak pataih pacang pabah di Việt Nam, ong samar nao masraiy phun jien piah pablei salih pandap ni. Urak ni bruk pablei salih haong gah pambuak bruk di negar langiu tapa jalan online hu daong ka Cty patakik veik menuac ngak, ba jabat Cty mai ngak di labik sit jang lagaih haong bruk ngak di doanh nghiệp, patak pataom hu rilo jien padai. Anak tal, Cty meda pamaong tapa darak pasa Đông Nam Á, labik pandar rilo pandap panda kaya nong salih ka darak pasa Châu Âu saong Mỹ daok padeih: “Khol dahlak jeng daok darak pasa di Đông Nam Á, bo drei rilo meng klaak tapa. Yau ye Myanmar, lac negar hu pandap panda biak siam lagaih yau ye ia dar ko, atau kaya tasik yaom biak lap saong biak siam. Min gah công nghiệp chế biến di negar nan jeng daok biak sit sot.”

Lac Cty pablei salih khóa điện tử blei meng negar langiu, meng lavik mai Cty CP Vũ Trụ Xanh yaih khan tui jalan peih dom bruk dui atah 1 tal 2 bilan di pak ni. Min, urak ni kayua jit ruak, Cty brei dui katut tukvak saong salih jalan yaih khan tapa bruk ngak xã hội saong ba mai kein laba glaong kayua jien buh tame takik, njom pambak praong dalam rahra. Ong Hoàng Tuấn Anh, Yam ndok Cty ni brei thau, meng bruk ngak tabiak mbaik ATM brah, ATM pataik pacang pabah, Cty hu daong ka bhap bini dalam labik njauk kan kandah jit ruak bo daok hu daong yaih khan thaot binguk di Cty: “Mayah di sa labik daok paatah di gauk, urang di gah langiu oh tame hu min urang daok gah dalam meda ngak bruk hu, nan jeng lac sa jalan parabha jeng labik sit piah ngak bruk. Tukvak kan kandah abih di taneh ia ye dahlak ba jien marketing tapa ngak bruk pahla ye jeng hu kein lageih ka bruk ngak di doanh nghiệp.”

Tui ong Phạm Phú Trường- akaok kapul Doanh nhân ranaih umo di ban raya HCM ye jit praong Covid-19 lac jalan piah ngak iek di dom doanh nghiệp. Piah yam tapa kan kandah dalam tukvak ini ye langiu di bruk duah jalan piah pakhang prein di drei, dom doanh nghiệp njauk pataom veik piah gam hu prein khang, kein lagaih di gauk. Ong Phạm Phú Trường daok brei thau lac: “TPHCM daok ginum gauk peih tabiak dom nyaom biai, di pak nan urang pambuak haong gauk piah duah tabiak dom jalan ngak, yam tapa dom kan kandah piah diuk hu dalam tukvak ini, lac bruk biak praong. Hadei di nan patagok bruk jum pataom gauk di dom doanh nghiệp dalam gah haong gauk, saong dom doanh nghiệp langiu gah, doanh nghiệp haong urang ngak, abih di nyu nan lac, doanh nghiệp haong rajaei, piah ngak jeng siam mekre ka gah kinh tế.”

Duah jalan nao piah diuk hu dalam tuk kan kandah yau urak ni hu daong ka doanh nghiệp dang khang kajap bo daok palagaih, duah hu rilo rilo jalan jang dalam tuk kan kandah. Tapa nan hu daong ngak jeng angan je di dom doanh nghiệp Việt./.

Urang lang: Thu Thảo – 16/03