Njauk caik ka doanh nghiệp eng drei ngak dalam bruk pacang caga jit COVID-19 tuk ban raya brei diuk rai haong jit ruak ini

Rilo doanh nghiệp di TP.HCM daok ngak tui jalan “3 di labik” jeng gaok biak rilo kan kandah kayua brei mbang huak, ndih daok pak di labik, dom harei dut iek sa mbang nan ye phun jien tagok rilo jang. Hu oh takik doanh nghiệp njauk padeih ngak hadei di sa tukvak ngak tui jalan “3 di labik”

Pagap yau di Cty Cổ phần Kềm Nghĩa, labik hu labaih 1.200 urang ngak. Ong Nguyễn Văn Út, Trợ lý akaok HĐQT, Cty Cổ phần Kềm Nghĩa brei thau, doanh nghiệp njauk padeih ngak hadei di 10 harei peih ngak tui jalan “3 di labik”“Doanh nghiệp hadei di sa tukvak atah kareik pabah mbang, ngan haong biak rilo jien ndo buh tabiak piah ngak yau: jien daong ka urang ngak brei padeih cang bruk, jien jhung di gilang pariak, jien pah labik piah ngak. Bruk suai jang tukvak sanya jao pandap ka gah blei di negar langiu jeng mbuan njauk taong phat lac bruk mboh di anak meta. Meda ndom lac karja kuhria salamat dalam pacang caga jit ruak ka doanh nghiệp 10 mbang ye doanh nghiệp kuhria 100  mbang, gaok mai 1000 mbang.”

Kadha bo rilo doanh nghiệp daok sangka jang di abih lac meyah karja jao ka doanh nghiệp eng drei caga dalam bruk pacang caga ga jit COVID-19 ye njauk hu sarak ka nyu cambaih laih saong mbuan peih ngak. Ngak bruk dalam tuk hu jit ye bruk salamat dalam doanh nghiệp lac kadha prong, ba tal bruk ngak oh njauk klaih klaoh. Kayua yau nan ye, dom doanh nghiệp jeng pataom tame padang ngak gilac bruk ngak, parabha gilac veik sang xưởng saong patagok y tế di labik piah khik salamat di tanut glaong abih.

  Ong Cao Hoàng Nam, Yam ndok Truyền thông saong Đối ngoại PepsiCo Việt Nam brei thau, samar drah abih dalam tuk ini lac doanh nghiệp brei hu jao quyền eng drei ngak rilo jang dalam pacang caga jit di labik ngak: “Yaok sang mac atau sa nyaom sang mac padang dom balai y tế, brei adat ka sang mac hadei di tuk ngak blaoh dom bruk yau neh rabha F0 tabiak, neh rabha F1 tabiak saong pruh jru pametai anek ruak taong abih labik mbuan njaom mbak ye meda peih ngak gilac bruk ngak tabiak. Hu dut iek, eng drei dut iek ka urang ngak, urang jakar, bruk dut iek nan njauk hu karja taduan mek. Nan lac sa jalan ngak brei adat ka doanh nghiệp eng drei ngak dalam bruk pacang caga jit COVID-19.”

Tui dom urang ilamu gah kinh tế, njauk caik ka doanh nghiệp eng drei ngak dalam bruk pacang caga jit COVID-19 tuk ban raya brei diuk rai haong jit ruak ini. Karja palei meda brei adat ka doanh nghiệp ngak bruk min brei khik hu bruk pacang caga jit. Meyah mboh hu urang ruak ye taong abih jien ndo taong ruak doanh nghiệp bayar abih. Bruk ba tabiak rilo paka jeng oh hu ginup menuac piah pasang iek, mbuan ba tal oh ngak hu.

Ong Lý Trường Chiến, urang ilamu gah chiến lược doanh nghiệp brei thau, kadha daok ba tabiak nan lac jhul patagok bruk pambuak gauk di gah y tế palei saong y tế, manuac urang di doanh nghiệp: “Ndom ka chuyên môn y tế ye dom doanh nghiệp tantu oh thau atau oh meda tapa dom mbang pathram bo meda ngak siam hu bruk taong iek ruak atau xử lý. Jalan ngak pak ini lac pambuak bruk haong gauk ka nyu siam lagaih, samar drah di abih dalam tukvak bahrau. Bruk ngak di Karja dalam parabha, abih di nyu parabha manuac urang hu ilamu gah y tế  ka jalan ngak, bruk langyah samar drah.”

Ngan haong nyaom dom doanh nghiệp ngak pandap, dịch vụ, ong Bùi Tá Vũ Hoàng, Yam ndok Sở Công thương TP.HCM brei thau, bruk ban raya sangka nan lac jalan ngak tuk hu urang lac F0 dalam doanh nghiệp. Meyah ngak tui jalan yau dahlau diah lac neh tabiak, pacang cakak, kareik pabah mbang doanh nghiệp veik ye tantu doanh nghiệp oh peih pabah mbang piah patrun khat lahik. Kayua yau nan ye, ban raya daok pamaong tal bruk yasa dom jalan pasang iek ka nyu siam jang, dalam nan paglaong bruk eng drei ngak di doanh nghiệp.

  Doanh nghiệp caong khin TPHCM caik hatai jia saong jao quyền eng drei ngak ka doanh nghiệp dalam pacang caga jit ruak Covid-19. Hu yau nan, doanh nghiệp meda hu jalan ngak siam di abih, njauk haong labik ngak di drei piah ngak bruk hu siam mekre, salamat, kein laba, khik caga prein yava ka urang ngak./.

Urang lang: Jasi – 05/10