Meng kham merat di karja tỉnh Đồng Tháp, hu 9 dalam 12 huyện, ban dalam tỉnh hu dom D.N, labik ngak pandap panda, pablei salih peih ngak veik, sumu labaih 95%. Khik kajap bruk gam pacang caga jit, gam peih ngak dua bruk haong gauk lac patagok kinh te, xa hoi tui jalan “ Diukrai lagaih, salamat, sami samar, pasang iek hu jit Covid-19”.

Tui ong Tống Văn Phong, Yam ndoc Hợp tác xã Kaya nong hacih sa-at Vĩnh Thới, huyện Lai Vung, tukvak tapa jit ruak ngak kan kandah biak praong tal bruk pablei salih kaya nong di HTX. Min  hu karja palei daong lang talaih dom kan kandah, tavak tavaiy piah HTX ngak bruk, duah pambuak dom gah piah pablei kaya nong di bhap bini. Dom harak pambuak bruk blei tame sieu thi praong hu daong ka HTX pablei kaya tabiak hu tani tanat, dak harei dak yam tapa kan kandah:

  “ Tuk ini, bhap bini hu thau tal HTX rilo jang, mboh bruk tame HTX hu kein laba yau habar. Khol dahlak pambuak saong urang birau tame, mboh lac ini jalan lagaih ka mikva, mikva pablei kaya nong ye hu laba hagait saong taong abih bruk ba tabiak di HTX, meyah mikva halei ngak tui ye HTX meda ba mbuan lagaih  jang ka mikva saong khik bruk pablei kaya nong di mikva.

Piah tui sumu bruk pasiam veik kinh tế, Đồng Tháp hu pandang 2 jalan ngak pasiam veik thun 2021, dalam nan jalan ka sa patagok kinh tế  meng 2,5% - 3,5% ,saong jalan ka 2 lac patagok kinh tế  meng 3,5% - 4,5%. Piah ngak hu bruk ba tabiak nan,  Đồng Tháp pataom tame lang talaih dom kan kandah, jhul pakhang bruk peih brei phun jien di karja, pachreih bruk buh jien tame ngak saong daong bruk ngak mbang pablei salih ka D.N piah langyah dom kan kandah, tavak tavaiy ka doanh nghiep piah  doanh nghiep dak  tuk dak hu siam gilac.

Tui ong Phạm Thiện Nghĩa, Akok UB bhap bini tỉnh Đồng Tháp,  pasiam veik bruk ngak mbang nan lac bruk praong dalam tukvak anak tal. Yau nan min, bruk pasiam veik brei khik kajap salamat ka pacang caga jit; hu salamat meng brei ngak bruk kayua brei iek prein yawa bhap bini lac dahlau di abih. Nan ye, dom bhum palei  daok brei gam pacang caga jit, gam patagok kinh tế, xa hoi, tỉnh daok ba mbuan lagaih piah ka dom D.N, urang po buh jien tame ngak mbang samar pasiam veik bruk ngak mbang pablei salih: 

“Jalan sahaneng lac iek prein yawa bhap bini dang kaok glong abih, nan ye dak harei dak brei pasiam meneing meneing di taong abih dom gah, pasiam saong patagok bruk ngak mbang nan lac  sa dalam dom bruk praong dalam tukvak anak tal. Lac urang dang akaok tỉnh, dahlak jeng likau klah rabha saong dom kan kandah di dom doanh nghiep, di mikva. Tukvak anak tal, tỉnh kham merat peih ngak dom jalan langyah piah samar ba tỉnh mai veik tukvak siam mekre birau”.

Sa dalam dom bruk bui sambai ngan saong Đồng Tháp urak ini lac 46 danak dak hu taduan bruk daong buh jien tame ngak, brei harak adat tut angan buh jien tame ngak dalam tỉnh haong yaom phun jien buh tame abih tih labaih 5.000 tỷ đồng. Mbiah tal urak ini, hu 6 danak dak ngak salah harak gal saong tame ngak bruk haong phun jien abih tih lac 254 tỷ đồng./.

Urang lang: Ai Nghiem – 25/11/2021