Dom công ty daok pilih ruah urang ngak bruk piah patagok prein ngak bruk di tuk puac thun

Cty Cổ phần  Sài Gòn  Food ngak dom janih pandap mbang menyum, pandap pandar yaok harei pabak ka darak pasa dalam taneh ia saong pablei tabiak negar langiu hu labaih 2 ribau urang ngak bruk. Pandap di công ty lac pandap mbang menyum, pandap pandar yaok harei nan ye dalam tukvak jit ruak Covid-19 kan kandah, jien mek tame jeng hu tani tanat. Urak ni công ty daok pilih ruah urang ngak bruk piah patagok prein ngak bruk di tuk puac thun. 

Muk Lê Thị Thanh Lâm, Phó Tổng yam ndoc Sài Gòn Food brei thau: Urak ni, dom pandap yau ye lẩu tame pa-op, bu, mì Ý… hu rilo siêu thị, labik pablei lẻ yau ye: Aeon, Co.opmart, Bách hóa xanh… kakei blei meng urak ni tal tết, sản lượng tagok labaih 20% dut saong tukva ni thun dahlau. Kayua yau nan ye, Sài Gòn Food daok caong hu labaih 100 urang ngak bruk ka dom gah sản xuất saong tui kuhria tapa thun 2021 meda pilih ruah labaih 300 urang ngak bruk: “Khol dahlak kuhria mboh dahlau lac darak pasa meda tagok, nan ye bruk sản xuất jeng tagok. Yaom lac hu jit ruak Covid -19, min meyah nyu oh trak damak jang, kol dahlak jeng pilih ruah viek urang ngak kayua bruk ngak tagok jang. Kayua tết thun ni, bruk blei pandap mbang jeng daok tagok kayua jit ruak oh ngak kan kandah tal pandap ni"

Oh njauk lac di ta-eng Sài Gòn Food bo rilo doanh nghiệp di ban raya jeng tagok bruk pilih ruah urang ngak bruk puac thun. Yau ye Công ty Pou Yuen Việt Nam daok pilih ruah viek 2 ribau urang ngak bruk, Công ty TNHH Tân Quang Minh (Bidrico) daok pilih ruah viek labaih 100 urang ngak bruk kayua dom negar Châu Á hu siam veik kinh tế hadei jit ruak Covid-19 nan ye doanh nghiệp hu viek đơn hàng. Daok darak pasa dalam negar ye bilan tết anak tal, caong pandar dom janih ia iak baoh kayau tagok glaong. Ong Trần Việt Anh, Phó akaok kapul doanh nghiệp ban raya HCM brei thau, ni lac sa bruk biak siam ka dom doanh nghiệp saong urang ngak bruk di ban raya:“Meng bilan 10 tal urak ni mboh siam lagaih ka darak pasa dalam taneh ia, prien blei tagok jang, caga ka Giáng sinh, Tết Dương lịch saong Tết Nguyên đán. Dom doanh nghiệp daok caga ka bruk ngak, pablei salih, bruk blei pandap tamo piah ngak saong  urang ngak bruk jeng caong hu rilo jang, urang ngak gah kỹ thuật ngak bruk tani tanat saong urang ngak bruk tui bilan jeng tagok glaong "

Hadei di jit ruak Covid -19, bruk pilih ruah urang ngak daok hu peih viek hadei di tukvak kandang joa, abih di nyu lac tukvak puac thun, dom bruk ngak mbang pablei salih tagok glaong.

Tiến sĩ Đỗ Thanh Vân, Phó yam ndoc pasak kuhria mboh dahlau bruk caong urang ngak saong brei thau ka darak pasa urang ngak bruk di ban raya HCM brei thau: Doanh nghiệp pilih ruah urang ngak bruk rilo abih di dom gah ngak pandap, pablei salih pandap pandar yaok harei saong dom dịch vụ iek glang parein yava, jao pandap… Dalam nan rilo meng lac urang ngak bruk meng tangin takai saong hu tangin gheih ngak ngan haong yaom jien bilan meng 5-10 triệu đồng/sa urang sa bilan. Kapul urang ngak bruk hu ilamo, jien bilan meng 10 triệu tal labaih 15 triệu đồng/sa urang sa bilan. Tui ong Vân, urang ngak bruk padieh bruk sa tukvak nan ye njauk pasram veik piah ngak bruk hu samar, siam lagaih jang: “Dom urang nan njauk pasram viek tuk tame ngak bruk yau nan meng oh ngak ka năng suất nyu trun. Urang ngak bruk njauk hu ilamo dalam bruk ngak, thau ngak bruk tui kapul, bruk ni jeng pasram viek piah ba mai kein laba jang, ilamo ndem mayai saong ngoại ngữ njauk pasram pabak ka bruk ngak”

Kayua njauk kan kandah di jit ruak Covid-19, bruk caga ngak pandap tết di doanh nghiệp daok di ban raya HCM nyu suai jang meng 2 tal 3 bilan. Min, urak ni, dom doanh nghiệp daok samar drak pilih ruah urang ngak bruk saong jhul khang bruk ngak tabiak pandap panda, lac sa bruk siam ka doanh nghiệp saong dom urang ngak bruk dalam sa thun gaok biak rilo kan kandah ini./.

Urang lang: Thu Thảo – 30/11