Dom tăng ni, phật tử tut angan lac menuac halan hatian nao di labik pacang jit

UBMT negar VN ban raya HCM hu 2 mbang peih bruk brei ka dom tăng ni, phật tử haong dom chức sắc, tu sĩ di Công giáo haong Tin Lành tut angan lac menuac halan hatian nao di labik pacang jit. Tui nan, di sang iek ruak Hồi sức chuyên sâu COVID-19 hu 214 urang, Sang iek ruak Dã chiến thu dung, taong ruak COVID-19 ka 10 hu 45 urang, sang iek ruak Dã chiến thu dung, taong ruak COVID-19 ka 12 hu 40 urang saong Sang iek ruak Nhân dân Gia Định....

Gam haong nan, dom Tòa Giám mục jeng sangka, ieu dom linh mục, tu sĩ haong dom urang tui agama patagok bruk klah rabha saong ba gauk tame dom bruk ngak pahla dalam pacang caga jit COVID-19, dalam nan hu jaik 300 linh mục, tu sĩ hu mbaok tame daong bruk iek glang, taong ruak ka urang ruak COVID-19.

Jeng dalam mbang jit ka 4 ini, Giáo hội Phật giáo Việt Nam, Giáo hội Công giáo haong dom agama hu rik daong tame bruk pacang caga jit COVID-19 yaok ratuh tỉ đồng. Gam haong nan, Giáo hội Phật giáo Việt Nam daok hu daong pandap y tế, lac khẩu trang KN95, 25 jamriak suak yava, 400 jamriak ngak oxy, 10 radaih pajeng menuac ruak saong pandap panda kaya mbang ka ban raya HCM, Long An, Bình Dương. Oh lac rik daong jien padai pacang jit, dom urang pan bruk agama, dom urang tui agama, urang Phật giáo halan hatian hu mbaok tame bruk pacang caga jit, daong ka rahra di dom labik pacang veik, labik brei daok karei.

Langiu di nan, Giáo hội Phật giáo Việt Nam hu brei nyim 13 labik di Quảng Ninh, Bắc Giang, Nghệ An, Bình Dương piah ngak jeng labik iek glang urang njauk ruak COVID-19, labik brei daok karei. Gam haong nan, dom tòa giám mục jeng sangka, tabiak panuac ieu dom linh mục, tu sĩ haong dom urang tui agama patagok bruk klah rabha saong ba gauk tame dom bruk halan hatian daong pacang caga jit COVID-19.

Tal urak ini, hu labaih 350 linh mục, tu sĩ halan hatian tagok jalan tame dom sang iek ruak dã chiến piah daong prein haong gah y tế labik pacang jit saong iek glang dom urang ruak. Taong abih dom urang halan hatain nan jeng hu tapa tal pasram bruk y tế dalam labik hu urang njauk ruak COVID-19, hu klauk vắc xin saong duk iek PCR mboh lac âm tính dahlau di tuk tagok jalan.

Kuhria tal kreh bilan 8, dom agama karei yau Hội thánh Tin Lành Việt Nam rik pataom daong kadung jien vắc xin pacang caga COVID-19 saong daong jien ka bruk pacang caga jit labaih 2 tỉ đồng, Phật giáo Hòa Hảo daong labaih 34 tỉ 400 triệu đồng.

Dom Hội thánh Cao Đài Việt Nam rik pataom daong Kadung jien pacang caga COVID-19 haong Kadung jien vắc xin taneh ia lac 1 tỉ 200 triệu đồng, Tịnh độ Cư sĩ Phật hội Việt Nam rik pataom daong brei labaih 1,2 tỉ đồng.

Đạo Bửu Sơn Kỳ Hương, Phật hội Tứ Ân Hiếu Nghĩa, dom mban lambaok urang Islam,  Giáo hội Cơ đốc Phục lâm Việt Nam... hu daong Kadung jien pacang caga COVID-19 saong Kadung jien vắc xin taneh ia yaok ratuh triệu đồng.

Urang lang: M. Phuong – 19/09