Rilo bac sy cakak mbuk piah tagok jalan tame gah merong 

Piah hu mbuk mekre, lagaih haong mbaok, rilo menuac brei raong mbuk atau mbeik mbuk dalam tukvak biak suai lavik. Min piah caga siam di abih ka mbang nao atah mesruh haong jit ruak Covid 19, bác sĩ Nguyễn Thành Quân haong 81 y bác sĩ sang iek ruak Tai Mũi Họng TW halan hatian cakak klaak mbuk di drei, dahlau di tuk tagok jalan nao daong pacang jit di dom tỉnh gah meraong.

Mbuk panak nyu lagaih dalam bruk pasang iek, njaom mbak, menei, raco akaok jeng mbuan saong samar jang, drei hu rilo tukvak jang ka bruk pacang jit.         

Điều dưỡng Đỗ Thị Hoa hu mbuk atah biak mekre min sa-ai oh sahneng kuhria hagait tuk brei cakak mbuk:

Mbuk drei raong hu jaik 2 thun, drei cakak piah drei nao, oh damen hagait, piah ka bruk ngak di drei hu mbuan lagaih jang.

Jaik 2 thun taneh ia khang hatai pacang jit Covid 19, hu biak rilo y bác sĩ daok hu mbaok labik ini tuk halei jeng caga, hu bruk, hu panuac ieu ye nao chip. Tuk halei taneh ia caong, palei negar ieu, dom urang lin ao mbong patih ba gauk tagok jalan:   

Drei angan Lê Hồng Quân, daok ngak di Khoa Cấp cứu, sang iek ruak Tai Mũi Họng TW. Urak ini taneh ia drei daok hu jit ruak srau kadau, dalam Meraong daok biak caong hu nan ye kol dahlak daok caga tagok jalan.

Urang ngak mẫu mbuk Andy Minh, akaok kalup kapul mbuk mekre Việt Nam haong rilo urang dalam kalup kapul mai cakak mbuk brei ka dom y bác sĩ piah daong ka dom sa-ai tagok jalan ngak bruk hu mbuan lagaih jang:

Kol dahlak hu cacak mbuk blaoh di sang iek ruak Việt Đức, Răng Hàm Mặt TW. Tai Mũi Họng TW, anak tal lac viện Meta, viện Thận, haong viện K. Tuk cakak mbuk ka dom bác sĩ, kol dahlak mboh hadah mbaok meta kayua hu cakak brei ka dom urang jaik nao tame dom labik pandiak di abih. Dahlak likau tadhau ayuh dom bác sĩ hu khang kajap prein yava, khang tangin kajap takai piah ngak hu siam dom bruk di drei.

Urang thiết kế Nguyễn Thị Vân daok di Hà Nội khan lac: 

Bruk cakak mbuk lac biak sit min kol dahlak likau lambaok bhap bini payua abih hatung hatai tame dom bác sĩ, caong dom bác sĩ ngak biak gheih bruk di drei, tuk halei jeng hu prein yava, oh tuk halei kadun likuk.

Tabiak truh baoh sang di drei, yaok rabau y bác sĩ, urang jakar y tế meng grauk labik dalam taneh ia daok pamaong mai gah Meraong anit ranam. Gam haong hatai khang lac tuk halei abih jit meng mai sang veik, dom urang lin ao mbong patih daok hu ba tui hatai jia saong hatai anit ranam payua tame di bol bhap rahra grauk labik dalam taneh ia. Bei Gon daok glaih, min Bei Gon hu khang kajap prein yava veik min!

Urang lang : Mousaphuong -15/8