Dalam raidiuk duh yang mebang adat cambat di urang bangsa Cam, Adat Palao Pasah daok ieu lac Adat ngak yang akaok thun, ieu lac Rija Palao Salih lac sa adat brei patiaok dom bruk oh lagaih saong likau brei ka sa raidiuk sron mbon salamat. Bruk hu makna lac adat palao dua baoh gaiy sit brei patheik tui ia tabiak pabah tasik. Di yaok baoh gilai hu caik 12 thaik thaot rup nesak hu njak mbeik meng tapung brah lambaok vakil ka 12 drei nethak. Dom thaik thaot ini hu maong yau kaya paling tagok, ba tui ruak hakik, dom bruk mbuan gaok laba saong dom bruk oh lagaih di thun klak.

 Tuk dom sruh gaiy theik tabiak tasik, urang Cam jie lac, dom bruk jhak kanjah jeng tui di nan tabiak truh palei, peih tabiak sa thun bahrau siam mekre jang. Urak ini, adat jeng daok hu rilo palei Cam di tinh khanh Hoa, Lam Dong khik tani tanat. Tukvak peih harei raya bhian tame akaok bilan Sa tui saka urang bangsa Cam, laik tame labaih akaok bilan Klau saka ia bulan atau di kreh bilan Pak saka ia harei yaok thun.

Tui adat cambat tanarakun bhap bini meng kal mai, adat cambat dui atah dua harei, meng biar harei harei Jip saong blaoh tamat di page harei Suk, pambak tame kadha lakei kumei am duong pambuak gauk dalam adat duh yang mebang di urang bangsa Cam. Min, di dom palei daok di huyen Bac Binh klak, adat hu peih ngak dalam harei Angar saong harei But kayua hu pambuak di bruk duh yang tasik bahrau.

Dalam harei ngak yang, dom adat ngak yang hu ong maduan gam haong ong ka-ing ba akaok saong ragam ragu hu Ginang, Saranai saong caing. Tuk sap Baraneng sameng tagok, ong maduan peih sap adaoh da-a dom yang taneh, yang ceik, yang kraong, yang tasik mai taduan raok maong iek. Dalam bruk ginreih, ong Ka-ing ngui cuk khan ao bhong meraih brei mboh ka apui ginreih blaoh tamia dom ragam tamia adat.

Tangin pan tadik, tangin pan khik akaok khan bai, ong nao saong plaong chat njuel njac tui sap Ginang saong Saranai. Dom yam takai plaong chat gheih ghang, gam haong panuac kamaon di rahra palei pala, ngak jeng sa labik pok praong pok glaong yang mabang.

Sa di dalam dom adat cambat mboh chreih takre di abih, hu lac ragam tamia kaik apui saong juak apui. Hadei di tuk yang tame plaong tui ragam ginang, ong Ka-ing pan klau mbaik kaling bhong meraih ngak adat kaik apui tal tuk apui padam. Blaoh di nan, ong pan ndao dhaong tamia vil mbuk apui daok khuah blaoh plaong tame juak padam apui dalam sap preu daong prein chreih chrai di mikva bhap bini dang iek.

Tui akaok sahaneng di urang bangsa Cam, adat ini hu makna patiaok pandiak bhang di bilan thu, likau hajan siam angin lagaih, ngak hagait hu yau nan. Ragam tamia juak apui jeng brei mboh ka hatai kham merat saong hatai oh huac hagait di anek menuac anak dom kan kandah di dalam raidiuk.

Luac harei raya adat Ngak yang, urang bangsa Cam daok pahadar Po Ine Negar, po amaik hu duh paling dalam adat cambat urang bangsa Cam, hu maong yau lac urang pato rahra pala kapah, menyim khan bai pataih saong thraong daong ka raidiuk di bhap bini meng kal dahlau mai.

Harei ini, di dom palei Cam Awal di tinh Lam Dong (Binh Thuan klak), Adat Juak apui akaok thun hu takik jang tuk rilo baoh sang salih tapa ngak Adat Ngak yang di sang. Yau nan min, rilo palei Cam Ahier jeng khik tani tanat adat di bhap bini yau sa raidiuk daok dang ilamo – adat cambat tanarakun hu makna di bangsa Cam./.