Harei 22/3 meng blaoh, yaok ribau rahra di bhum palei saong tuai damuai hu tuh mai Danao kavei K Poch, di puk Sóc Lớn, xa Lọc Hưng, tinh Dong Nai piah hu mbaok tame Raya Dua Tpeng, sa dalam dom drap ar oh mboh di meta pakat Negar gheih karei di urang Khmer di Dong Nai.

Harei Raya Dua Tpeng di urang Khmer xa Lộc Hưng ieu lac janih ilamo bhap bini taong abih hu ilamo suai lavik. Raya pesta brei mboh tanarakun daok dang di rahra urang ngak nong pala padai ia saong apuk pakak. Tapa adat di raya pesta, urang Khmer likau sron mbon, khang kadang, phun kayau siam that, taong abih hu cakrok caih menek, ngak hagait hu nan.

Dalam hatai glo akaok di dom urang praong thun umo di ini, raya pesta tuk halei jeng hu makna oh salih hu. Raya Dua Tpeng di urang Khmer brei mboh ka hatai daok dang lagaih haong langik tasik kraong ribaong tapa bruk taong mek kaya ikan dalam ia tui jalan bhap bini. Ini lac harei piah bhap bini gam taong mek kaya ikan di meng dom danao kavei ia, gam bui sambai me-in haong gauk saong kak kajap hatai gul pataom hadei di dom harei ngak bruk glaih glar.

Dahlau diah raya pesta rah tabiak meng bruk ta-eng saong peih ngak sit. Thun 2019, Mentri Ilamo, Pahat padhih saong Jirah rivang mbaoh tangin ka Raya Dua Tpeng lac drap ar oh mboh di meta pakat Negar. Meng nan tal ini, jeng sa danak dak hu caong raok di urang dalam bhum di yaok bilan 3. Ong taha palei Lâm Đin brei thau lac:  “Khol dahlak hulin lac urang taha palei tuk halei jeng jak ba mikva bangsa Khmer daok di ini, tuk halei jeng brei pok praong pok glaong patagok bruk ini. Raya pesta biak siam gheih nan mikva biak uan, kham merat khik tani tanat piah khik veik ka anek taco harei hadei patagok khang jang. Abih di nyu nan lac, harei raya daok hu bruk ba drei tame di bangsa Stieng saong bangsa Yuen, gam haong gauk ngak ka harei raya bui sambai jang, gul pataom jang”.

Ong Nguyễn Hữu Thương, Phaok Akaok UB Bhap bini xa Lộc Hưng, Akaok Mban padang ngak raya ndom lac, bruk rahra paglaong ilamo khik ramik dom adat tamo lac asal kadha hu angan makna daong drap ar daok rai miat miat. Gam haong nan, karja palei jeng hu rilo jalan langyah piah drap ar oh kurang lahik atau salih karei. Xa Lộc Hưng pamaong bruk ini hu khik tani tanat pagam haong jirah rivang piah paglaong raidiuk ka rahra, rilo meng lac urang bangsa takik:  “UB Bhap bini xa brei jhul khang jalan mbak gom truac, pandar kong nghe khau tin piah yaih khan thaik thaot bhum palei, raya adat harei Dua Tpeng, meng nan padang dom kapul bhap bini piah pacang khik drap ar, gam haong nan peih praong dom bruk naih gheih piah patagok kinh te, daong mikva paglaong raidiuk siam jang”.

Xa Lộc Hưng hu dom xa Lộc Điền, Lộc Khánh, Lộc Hưng di huyen Lộc Ninh, tinh Binh Phuoc klak. Hadei pagam xa hu 26.600 urang, dalam nan hu abih ralo di nyu hu lac urang bangsa Khmer, Stieng. Raya Dua Tpeng dahlau diah hu xa Lộc Khánh khik tani tanat, peih ngak yaok thun./.