Di kreh jiwa di rai diuk bahrau, tapain aia Ea Sah jeng daok gandi gandang nduac, urang jeng daok khik adat cambat tanarakun meng kal. Bhum taneh damneiy nan oh tok lac mbak carak janih ilamo meng kan di bangsa Randaiy, bo jalan halaw ilamo Randaiy jeng daok nduac miet.

Taha akaok palei Y Lêm Niê, palei Sah B brei thau: Tapain aia nan lac suan yava di puk palei. Meng kan mai, tuk dak padang mbuan palei, bruk akaok mereip urang Randaiy ngak nan lac palih ruah labik hu halaw aia hacih jangaih nduac tapa luac thun oh tuk halei thu. 

Oh thei dar kanar palei Sah hu meng habiar mai saong thei lac po tapain aia. Tok thau lac bhum taneh ini pambuak pagam haong dalikan ndom ka urang likai Đăm Di ndaih jioy, kham merat mesruh metak ngan haong dua ong patao aia (yang aia) piah khik taneh. Hadei di tuk jayak yang aia, urang likei Đăm Di padang palei di bhum taneh ini piah mong iek, nan lac palei Sah harei ini.

Dalikan khan brei thau lac, palei Sah harei nan hu biak rilo urang anek dara kamei siam binai, dalam nan hu dua adei sa-ai kamei sahatian hu angan lac H’Bea saong H’Bri gheih yau bingu Pơ lang, ngak ka dom urang likei dam dalam saong langiu palei takre mebuk caik hatian. Yaok harei, dua adei sa-ai jak gauk nao tabiak tapain aia piah menei saong gui ia mek mai sang.

Hu sa biar harei hadei di tuk nao apuh mai, dua urang kamei padhau trun tapain aia menei, ma-in, sap ndom klao yava grauk ceik glai. Urang likei Đăm Di daok dalam glai pang mahit blaoh tui sap yava nan nao jaik tal tapain aia. Ala jalan nduac di aia, kadha siam gheih di dua adei sa-ai H’Bea saong H’Bri ngak ka urang likei mebuk hatai.

Mong mboh urang likei dam, dua adei sa-ai H’Bea saong H’Bri samar drah mek khan ao mbal sir rup nduac tapak mai sang. Urang likei dam Đăm Di mek jagak kapak ba tui rup cih angaok patau thaik binguk dua urang kamei nan blaoh daok dala caik mata mong iek. Dua urang kamei dara oh takre drei ngak binguk brei ka urang likei dam Đăm Di mboh mbaih hatai blaoh mek to jagak kacaoh saong mek takai juak khang trun binguk angaok baoh patau nan. Thun bilan ngak khut khat jalan cih min inem takai di urang likei damsang Đăm Di jeng daok ndam di angaok patau.

Tapain aia Đăm Di oh lac janih ndam gam haong rai diuk bhian harei, blaoh nyu daok lac labik haneik ginreih dalam rai diuk glo akaok di urang bangsa Randaiy. Hadei di yaok bilan pala drak, mikva gilac mai ngak yang di tapain aia kakuh likau angin siam hajan gaih, pala hagait tamuh tagok yau nan, ngak hagait hu nan, puk palei sruan mbuan, salamat.

Nao tapa dom thun bilan, tapain aia Ea Sah jeng daok hu bhap bani pacang khik, mong iek, yaok thun peih ngak yang di ini piah ba-yar dhal phol ka yang mabhang. Tapain aia oh lac pabak brei halaw aia lai la-ar blaoh nyu daok lac labik sahaneik gigreih di puk palei, labik raong ba hatai saneng di dom rai rah.

Kayua yau nan ye, yaom lac mikva dalam puk palei hu bingun ia saong aia hacih ba mai tal sang, urang bangsa Randaiydi tinh Dak Lak jeng daok khik ilamu kadha bhian randap nao rah tabiak tapain aia. Kayua lac urang Randaiy dalam tinh jeng yau urang Randaiy daok di palei Sah tuk halei jeng jia tame bruk pacang khik, daong ba di yang aia. Urang Randaiy jia lac menyum aia mek meng tapain aia di palei ye meda hu yang aia pacang khik, daong ba saong ba brei pren yava. Kayua yau nan ye, tal harei ini biak rilo baoh sang dalam palei hu bingun ia kuac min mikva jeng daok ba gauk nao tabiak tapain aia piah mek aia  ba mai sang piah menyum./.