Hadah page masup aval, palei Coóc Noọc  chreih chrai ndom klao bui sambai; mikva ngui cuk khan ao bhap bini ghrih ghang haong rilo sabo bar hu hlai haong sap khèn, sap hagar bui sambai haong gauk. Makna di harei raya lac adat thac ia – brei mboh ka bruk patiaok dom bruk jhak, likau patuah jamo ka sa bilan pala siam that. Ia mat siam hu rahra thac tame gauk dalam hatai chreih chrai, pambuak pagam bhap bini. Sa-ai Nguyễn Thị Thi – tuai damuai mai meng ban ine Ha Noi oh padauk hu bruk chreih chrai:

“Mbang akaok meti mai tal raya ini, dahlak mboh ini lac raya biak siam gheih. Meng dom bruk gheih di khan ao, dom ragam tamia, adat cambat atau tanarakun thac ia di ini…taong abih jeng ngak jeng sa thaik thaot rilo sambo bar saong ndung bak ilamo. Ilamo bangsa Lào di di ini hu biak rilo kadha piah duah thau, nan dahlak biak khin hu gilac mai tal ini sa mbang tra.

Hadei di ngak adat, harei raya rah tabiak chreih chrai ngan haong rilo danak dak siam gheih yau ye mek ikan ia craoh, kacah kaya mbang bangsa, nao angaok tatua plaih mabuh di ia craoh, paplah baoh còn… Yaok danak dak jeng dui pachreih rilo rahra saong tuai damuai hu mbaok tame, ngak jeng sa bruk chreih chrai, ndung bak sap klao. Abih di nyu nan lac, labik kaya mbang hu rilo kaya mbang bhap bini di urang bangsa Lào yau ikan am, ndiuk, ia bai masam…jeng bruk dui pachreih naih gheih. Dom tadai parang kaya OCOP, ia taiy saong kaya mbang bhum palei jeng daong yaih khan thaik thaot bhum taneh Bản Bo saong Lai Chau nao tal tuai damuai jirah rivang. Sa-ai kamei Hoàng Thị Ban – sa urang di bhum palei ndom lac:

"Mikva khol dahlak biak bui sambai tuk hu mbaok tame harei raya. Caong khin karja palei saong Karja nagar thun hadei hu peih ngak piah ka mikva bui me-in. Thun ini lac biak bui sambai paje, thun hadei mikva gilac khin bui jang veik."

Tui dom urang taha, Bun Vốc Năm oh lac harei raya, blaoh daok ba tui makna yang mebang. Ong taha palei Vàng Văn Bang ndom meyai lac:

"Harei Raya Bun Vốc Nặm lac adat likau yang patei saong po lingik pambuak haong gauk piah daong prein mikva rahra. Raya piah likau hajan siam angin lagaih, mikva tuk halei jeng khang kadang, padai bak sang, manuk bak ro saong ngak hagait, raong anek hagait jeng hu jak jeng. Ini lac ilamo bangsa Lào oh meda klak hu, lac adat cambat suai lavik mai bo mukkei caik veik ka anek taco."

Thun ini, harei raya dak harei dak hu makna tuk hu peih ngak dalam tuk bhum palei bahrau pagam, peih tabiak dom kein lagaih patagok bahrau. Tui Ong Nguyễn Văn Chiến, Phaok Akaok UB Bhap bini xa Bản Bo, Raya Bun Vốc Năm di xa Bản Bo lac sa raya biak hu angan di bangsa Lào. Tapa bruk peih ngak harei raya ini hu brei mboh hu bruk duh yang mebang di bangsa Lào meng jaman meng kal mai saong tal tukvak urak ini hu khik tani tanat 5 thun. Khol dahlak jeng brei mboh bruk khik tani tanat lac sa bruk hu makna, piah khik ramik ilamo bangsa pagam haong patagok bruk ngak jirah rivang.

Harei Raya Bum Vốc Năm hu peih ngak oh tok lac bam ai dom bruk chreih chrai, blaoh daok pambak tabiak ilamo siam gheih di bangsa Lào daok di Lai Chau, jeng yau peih tabiak jalan nao karo kajap dalam bruk ngak mbang patagok kinh te, parilo jien mek tame ka bhum urang bangsa bhum ceik glaong./.