Bhap bani dalam bhum bhian iew baha Khmer lac Wat Sala Phôthi Sêrey Sakô ieu lac sa baoh baha Bahrau, kayua bahrau padang di thun 1938, dalam tuk nan jaik abih dom baoh baha Khmer di Soc Trang jeng hu yaok rituh thun umo. Hoa thuong Thạch Phết , urang dang akaok baha, brei thau tuk padang baha, davang bilik kreih di baoh baha hu brei padang ralo janih, bingu hala dreh yau baha Cim Dhul, min tapa lavik thun nyu khut khat biak ralo.  Tal thun 2011, di kreih baha hu brei padang ngak pasiam bahrau salah blaoh di thun 2018.

Langiu di bruk pandar ilamo meng kan di urang Khmer gah Meraong Nagar, tuk padang ngak bahrau, baha hu pambuak pagam jang jalan kien truc di Idian, Xiem Pasak baha hu pdang ngak siam gheih ngan haong tabung hu ngak glaong, hu 3 tal dak tagok gauk. Kadha biak karei abih di tabung sang baha nan ieu lac hu thaik binguk putra Tất Đạt Đa ndik asaih tame glai (tuk trun mbuk kuah akaok) hu ba caik di kreih baha.

Di mblang baha daok hu Sang bac pakat sa ngan haong 20 duk bilik, Sang bac pakat so cap Pali hu padang ngak di thun 1995. Mbluak abih dalam nan lac baoh bimon paling rup patau Bhik Thik Ka, glaong 1,5 m, triak jaik 3 tan, kayua Hoa thuong Thạch Phết panduan meng Campuchia mai di thun 2013. Tal thun 2015, hoa thuong Thạch Phết panduan 1 baoh rup patau Bhat Thik Ka tra saong ba caik dalam baoh sang Sala.

Rilo urang anek taco Bhat saong tuai damuai atah jaik thau tal baha Bahrau kayua di ini ieu lac baoh baha Khmer hu sa baoh kabo ikan lamen hu padang ngak biak siam mekre dalam mblang bein di baha. Mek tame meta di abih nan lac thaik binguk Ong ikan hu ngak meng xi măng biak gheih, ndih angaok gai caik glaong jaik 1m, hu peit bingula yau mblang tasik.

Bhap bani daok di puk palei khan mayai brei thau, thun 2013, di ar tasik Vinh Chau, hu sa drei ikan lamen theih tavak mbaok tasik. Ikan atah labaih 12,5 m, cagar praong 2,4 m, glaong 1,4 m, kuhria teik triak labaih 10 tan. Yau nan min, ikan nyu labait blaoh metai truh mada yaom hu karja puk palei saong bhap bani kham merat daong veih.

Hadei di ong ikan metai, hoa thuong Thạch Phết gam saong mikva dalam bhum srok rik daong pren yava, jien padai peih ngak yang likau raok ba ong ikan tame kakuh di dalam baha, iew lac Ong Ikan, blaoh ngak kabo saong peih ngak adat ba dhar tui njauk adat cambat di urang daok di bhum tasik. Tal harei ini, jabat karja jeng oh ka thau janih ikan lamen ini pajaih hagait. 

Yaok thun, gam haong bruk peih ngak ma-in ilamo, adat cambat tanarakun tui ugama Therawada, baha Bahrau daok ngak adat likau patuah jamo kajap karo salamat ka Ong ikan lamen di harei 7.9 saka aia bulan.

Meng harei ba Ong ikan lamen trun dar kabo, biak rilo tuai damuai atah jaik mai cuh gilau kakuh likau dhar ka Ong ikan lamen, abih di nyu lac bhap bani ndam gam haong bruk nao tasik. Tabung glaong, dalam dom harei raya yang mabang adat cambat baha pachreih yaok ribau urang mai rivang iek, kakuh likau paling Ong ikan. Langiu di kabo ikan lamen hu padang ngak piah kakuh paling gah langiu, dalam duk raok tuai di baha daok paling sa yau (gu) talang akaok Ong ikan lamen, glaong 2 m.

Yaok harei, tuai damuai saong anek taco Bhat mai jirah baha Khmer di ini jeng hu mai cuh gilau, lapeik talang akaok ikan Ong, lakau brei ka rup babhap hu rilo pren yava, manuac urang dalam baoh sang jap karo po jeng./.