Tui adat, yaok baoh sang urang bangsa LoLo jeng hu labik duh paling mukkei, min adat duh paling haong gauk akaok meti di but pajaih tok hu peih ngak di sang urang akaok but pajaih. Urang akaok but pajaih lac urang dang tabiak ba drei tame adat, dom baoh sang dalam but pajaih rik daong tui prein di drei. Adat duh paling di urang bangsa LoLo di palei LoLo Chải hu peih ngak haong gauk dalam bol bhap rahra piah rahra dalam palei gam pamaong tal mukkei saong bui sambai haong harei adat ilamo bangsa.

Adat duh paling mukkei di urang bangsa LoLo hu klau adat paling, pahadar harei ba palao. Dahlau harei adat, urang dang akaok dalam but pajaih brei caga kaya adat dalam nan hu 1 drei menuk, 3 pangin alak, ndiuk, bangu, baoh kayau, jien ameh. Dahlau diah adat duh paling mukkei brei hu dom kaya yau ye: 1 drei lamo, 1 drei pabui, 1 drei menuk, ndiuk, alak, jien ameh, gom menyek, yau hagar kang. Dom urang nan sahaneng lac, mukkei ieu lac dom urang di dom rairah dahlau, hu halan klak rup drei saong rabha jeng dua gah: mukkei jaik dalam nan hu dom ong meng 3 tal 4 rai, saong mukkei atah lac dom ong meng rai ka 5 atau ka 6 ba tagok.

Yaok thun, karja saong rahra palei LoLo Chải padang peih Adat duh paling  mukkei urang bangsa LoLo dalam bhap bini piah paglaong ilamo siam gheih, paglaong hatai sahaneng ka bol bhap rahra urang bangsa LoLo xa Lũng Cú saong bol bhap dom bangsa dalam bhum.

Ong Sình Dỉ Gai (urang bangsa LoLo), Akaok palei LoLo Chải, xa Lũng Cú brei thau, adat duh paling mukkei di urang bangsa LoLo bhian hu padang di baoh sang, but pajaih piah pato anek taco thau ka halau agha, thau dhar phol mukkei, ngak jeng bruk pambuak pagam di baoh sang, but pajaih, palei pala. Harei ini, Adat duh paling mukkei di urang bangsa LoLo di palei LoLo Chải hu peih padang haong gauk dalam bhap bini piah rahra dalam palei thau tal mukkei saong bui sambai haong gauk dalam harei adat ilamo bangsa.

Thun ini, Adat duh paling mukkei di urang bangsa LoLo xa Lũng Cú ngan haong kadha “Drap ar – labik duah thau ka halau agha” hu banah adat saong raya. Banah adat hu dom bruk hu makna duh paling karei di urang bangsa LoLo yau ye “bhut kamalai”, “plaong chiat dalam adat”, paoh hagar kang… Bruk karei abih dalam adat duh paling di urang bangsa LoLo lac kapul urang plaong chiat tamia dalam thaik thaot “Bhut kamalai”, hu dom khan ao hu ngak meng hareik “su choeo”, sa janih hareik hu di bhum caik. Banah raya hu peih ngak haong rilo danak dak ilamo, adaoh tamia, pahat padhih saong dom kadha me-in bhap bini karei di bhap bini dom bangsa xa Lũng Cú.

Raya adat lac harei piah brei ka tuai damuai di dalam saong langiu negar mai duah thau saong ba drei tame dom ilamo siam gheih di urang bangsa LoLo bhum glaong ceik Đồng Văn.

Ini jeng lac harei piah yaih khan dom ilamo siam gheih bhap bini saong adat cambat di mikva urang bangsa LoLo tal tuai damuai di dalam saong langiu negar, meng nan cambaih laih jang bruk khik ramik saong patagok dom ilamo siam gheih pagam haong bruk rah rivang di bhum palei.