Harei raya Chrôi Rum Chếk peih ngak di palei Cà Lăng A Biển, phường 2, ban Vĩnh Châu, tỉnh Sóc Trăng. Tui urang daok di ini, harei raya hu meng lawik, labaih 300 thun tapa. Raya Chrôi Rum Chếk meng harei 14, 15 bilan 2 Saka ia bilan ieu lac lakau po brei ka kajap karo hajan ralo angin lagaih ka bruk ngak mbang nagar palei siam makre selamat. Harei ieu yang jeng lac brei padar tal mukei urang peih padang taneh ia bhum palei brei ka rahra bhap bini trei sil, dhar phon tal langik tasik brei hu ralo kaya ikan. Ong Sơn Thol, Achar thum praong di baha Sêrây Cro Săng, phường 2, ban Vĩnh Châu, tỉnh Sóc Trăng brei thau: “Mikwa di ini ralo urang ngak mbang taong ikan, raong idang tasik, mai takuh yang thau dhar phol tal po tasik sraong daong kajap karo rai diuk trei sil...”.

Hadei di ngak yang bak dom adat cambat tui ugama hu raya padhit sukan ilamo bangsa. Dom kadha main yau ye pamadeih dom bruk ngak di bhap bini dalau diah. Daoh take main di dalam harei raya jeng pachreih ralo urang mai ieik. Dom ragam tamia sap adaoh, ragu ragam makre di bangsa Khmer.

Dom thun barau di ini, hu karja caik hatai, patacei harei raya Chrôi Rum Chếk oh padeih brei paglaong bruk ngak brei pachreih tuai tamuai ieik mai main kak jeng talei rohim anit ranam daong ba gauk di 3 bangsa adei saai Kinh – Khmer - Hoa daok diuk di bhum taneh tasik ini. Achar Sơn Thol brei thau lac: “Dalau diah ngak sit, harei raya hu khik mbiah tal ini. Dom thun blaoh tapa hu caik hatai iiek glang di Đảng, pakat nagar, karja palei harei raya peih ngak praong jang. Harei ini hu jalan praong, hu gom điện piah ngak harei raya, peih ngak raya hu lagaih siam jang”.

Thun ini, harei raya Chrôi Rum Chếk di bangsa Khmer Vĩnh Châu hu Mintri Ilamu, Padhit sukan dan Jirah brei angan drap ar kaya kan ilamu oh mboh di mata pakat nagar. Ini lac bui sambai praong, nyu brei thau lac bruk kham marat oh thau padeih brei ka bruk khik caga ba tagok ilamu bangsa Khmer di Vĩnh Châu. Ông Sơn Wath, urang Ban Quản trị baha Sêrây Cro Săng, bui sambai khan brei thau: “Anek taco di sang baha Sêrây Cro Săng, mikwa 3 bangsa adei sa ai biak sambai bui, biak chreih, biak uan, harei raya hu meng dom rituh thun blaoh, urak ini biak bui sambai praong kayua hu angan ilamu oh mboh di mata pakat nagar”.

Ong Trần Trí Vân, Phó Chủ tịch UBND ban Vĩnh Châu, tỉnh Sóc Trăng brei thau lac: “Harei raya Chrôi Rum Chếk hu mintri Ilamu. Padhit sukan dan jirah brei angan angan ilamu oh mboh di mata pakat nagar. Kon akau dahalak hulin daok khik daok ngak yaok thun, pamadeih, padang, adat cambat bangsa, dom janih ilamu bangsa gam saong harei raya bangsa”.

Raya Chrôi Rum Chếk hu meng lawik rai mai, hu khik ramik, tapa dom rai rahra. Mada hu tapa dom tagok trun dalam sejarah, mbiah tal ini nyu hu peih praong jeng harei raya hu angan, biak chreih di tỉnh Sóc Trăng, pachreih ralo tuai damuai atah jaik mai./.